Esekiele 18:1-32
18 Ondaka ya Yehova yeya vali kokuange yiti:
2 “Elomboloko lipi li kuete olusapo luna wa tukuli kofeka yo Isareli luokuti: ‘Va isia ovo va lia ayuva a ngangama, pole, ovayo omãla o-o a kuatiwa luña’?+
3 “‘Ndeci ame ndi kasi lomuenyo,’ oco Ñala Tõlo Yehova a popia, ‘ka vu kamamako oku tukula olusapo olu ko Isareli.
4 Tala! Ovimuenyo viosi via tiamẽla kokuange. Ci kaile omuenyo wa isia kuenda omuenyo womõla, viosi via tiamẽla kokuange. Omunu wosi o linga ekandu eye o ka fa.
5 “‘Sokolola okuti, omunu umue ukuesunga kuenje o linga eci ca sunguluka haico ciwa.
6 Eye ka li ovilumba vioviteka kolomunda;+ eye ka imbi ovaso koviteka via vĩha* vionjo ya Isareli; eye ka vĩhisa ukãi wulume a lisungue laye,+ ale oku lipekela lukãi o kasi kocituwa;+
7 eye ka tati lãvi ukuavo,+ pole, o tiuwiya cosi ca eciwa ndonjeke* ku una wo levalele;+ eye ka nyani laumue,+ pole, eca okulia kuaye muẽle komunu o kasi lonjala+ kuenda o walisa u o kasi epẽle;+
8 eye ka levalisa losindike ale oku sanda onganyu,+ pole, o yuvula oku lekisa ekambo liesunga;+ kuenda o sombisa lesunga omunu lukuavo;+
9 eye amamako oku endela volonumbi viange kuenda o pokola kolonjila viange viesunga poku kala ukuacili. Omunu waco ukuesunga kuenda o sesamẽla oku kala lomuenyo,’+ oco Ñala Tõlo Yehova a popia.
10 “‘Pole, sokolola okuti eye o linga isia yomõla umue ocimunu,+ ale omondi,*+ ale o linga ocina cimue pokati kovina via tukuiwa
11 (ndaño okuti isia ka la linga ovina viaco) eye o lia ovilumba vioviteka, o vĩhisa ukãi wulume a lisungue laye,
12 o talisa ohali osuke ale ohukũi,+ o nyana ovina, ka tiuwiya cosi ca eciwa ndonjeke,+ imba ovaso kolosuku via vĩha, o linga ovina viumbondo,+
13 o levalisa losindike kuenda+ o sanda onganyu, omõlaco ka kala lomuenyo. Omo liovina viosi viumbondo a siata oku linga, eye o sesamẽla muẽle oku pondiwa. Eye o ka kuata eko omo liolofa viaye.*
14 “‘Pole, sokolola okuti isia umue o kuete omõla umue o mola akandu osi isiaye a siata oku linga kuenda ndaño okuti o mola ovina viaco, eye ka vi lingi.
15 Eye ka li ovilumba vioviteka kolomunda; eye ka imbi ovaso koviteka via vĩha vionjo ya Isareli; ka vĩhisa ukãi wulume a lisungue laye;
16 eye ka talisa ohali omunu umue; ka kuatela ocipululu ovina via eciwa ndonjeke; ka nyani cimue; eca okulia kuaye komunu o kasi lonjala kuenda o walisa u o kasi epẽle;
17 eye o yuvula oku talisa ohali ohukũi; ka levalisa losindike ale oku sanda onganyu; eye o pokola kolonjila viange viesunga kuenda endela voviholo viange. Omunu waco, ka ka fa omo lieko lia isiaye. Eye o kamamako oku kala lomuenyo.
18 Pole, omo okuti isiaye wa punda poku nyana manjaye kuenda wa linga eci cĩvi pokati komanu vaye, eye o ka fa omo lieko liaye.
19 “‘Pole, ene vu ka pula hati: “Momo lie omõla ka kuatela eko omo liekandu lia isiaye?” Momo omõla wa linga eci cesunga haico ciwa kuenda wa siata oku pokola koviholo viange viosi loku vi kapako, eye o kamamako muẽle oku kala lomuenyo.+
20 Omunu o linga ekandu o ka fa.+ Omõla ka ka kuata eko omo liekandu lia isiaye kuenda isia ka ka kuata eko omo liekandu liomõlaye. Esunga liomunu ukuesunga li ka tendiwa lika kokuaye muẽle kuenda ũvi womunu ondingaĩvi, u ka tendiwa lika kokuaye muẽle.+
21 “‘Cilo, nda omunu umue ondingaĩvi o siapo oku linga akandu osi a enda oku linga kuenda amamako oku lava oviholo viange loku linga eci ciwa haico cesunga, eye o kamamako muẽle lomuenyo. Eye ka ka fa.+
22 Ame si ko yambula* vali omo liakandu a linga.+ Eye o kamamako lomuenyo omo lioku linga eci ca sunguluka.’+
23 “‘Anga hẽ ndi sanjukila oku fa kuomunu umue ondingaĩvi?’+ oco Ñala Tõlo Yehova a popia. ‘Siti ndi yongola okuti eye o tinduka kolonjila viaye kuenje amamako lomuenyo?’+
24 “‘Pole, nda omunu umue ukuesunga o siapo esunga liaye kuenje o linga eci cĩvi, poku linga ovina viosi viumbondo olondingaĩvi via siata oku linga, eye hẽ o kala lomuenyo? Lavimue pokati kovilinga viaye viesunga vina a linga vi ka ivalukiwa.+ Eye o ka fa, omo lioku lueya kuaye kuenda ekandu a linga.+
25 “‘Pole, ene vu ka popia hati: “Onjila ya Yehova ka ya sungulukile.”+ Lingi ohenda, yeveleli Anjo ya Isareli! Onjila yange oyo ka ya sungulukile?+ Siti olonjila viene ovio ka via sungulukile?+
26 “‘Nda omunu umue ukuesunga o siapo esunga liaye kuenda o linga eci cĩvi kuenje o fa omo lielinga liaco, eye o ka fa omo lieci cĩvi a linga.
27 “‘Kuenje nda omunu umue ondingaĩvi o siapo ovina vĩvi a enda oku linga kuenda o fetika oku linga eci ciwa haico cesunga, eye o popela omuenyo waye muẽle.+
28 Nda eye o ci limbuka kuenda o liwekapo oku linga akandu osi a enda oku linga, eye o kamamako muẽle lomuenyo. Eye ka ka fa.
29 “‘Pole, onjo ya Isareli yi ka popia yiti: “Onjila ya Yehova ka ya sungulukile.” Olonjila viange ovio ka via sungulukile, Anjo ya Isarel?+ Siti olonjila viene ovio ka via sungulukile?’
30 “‘Omo liaco, ndi ka sombisa omunu lomunu pokati kene ndomo ci likuata lovilinga viaye,+ Anjo ya Isareli,’ oco Ñala Tõlo Yehova a popia. ‘Liwekipo, sipo muẽle akandu ene osi, oco ka a ka kale ndewe liocilondokua poku vu neneli eko.
31 Sipo akandu ene osi wa lingi+ kuenda kuati* utima wokaliye lespiritu+ liokaliye, momo lie vu fila,+ Anjo ya Isareli?’
32 “‘Ame si sanjukila olofa viomunu umue,’+ oco Ñala Tõlo Yehova a popia. Omo liaco, ‘Tiuki kokuange kuenje vu kala lomuenyo.’”+
Atosi Pombuelo
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Okuti, uvangi wokuti omunu o ka tẽlisa eci a likuminya.
^ Lit., “ukuakupesela osonde.”
^ Ale “osonde yaye yi ka wila kokuaye muẽle.”
^ Lit., “oku ivaluka.”
^ Lit., “kuati ene muẽle.”
