Esekiele 22:1-31
22 Ondaka ya Yehova yeya vali kokuange yiti:
2 “Catiamẽla kokuove a mõlomunu, anga hẽ wa lipongiya oco o sandeke esombiso kolupale* lu kuete eko liosonde+ loku situlula kokualio ovilinga vialio viosi vĩvi?+
3 Ove o sukila oku popia ndoco: ‘Ca popia Ñala Tõlo Yehova ceci hati: “Alupale lu pesela+ osonde vokati kalio muẽle, luna okuti otembo yalio yi kasi oku iya,+ luna lu kasi oku linga oviteka vialio via vĩha oco u li vĩhise oluo muẽle,+
4 osonde ove wa pesela ya ku nenela eko+ kuenda oviteka viove vĩvi via siata oku ku vĩhisa.+ Ove wa yayuisa esulilo lioloneke viove kuenda esulilo lianyamo ove, lia pitĩla. Eli olio esunga lieci ndi ka ku lingisila ocikuata cimue cesepu kolofeka kuenda ocikuata celaviso kolofeka viosi.+
5 Ovaimbo a lisungue love kuenda ana a kasi ocipãla love+ a ka ku pembula ove o kuete onduko ya vĩhisiwa haiyo yeyuka evĩho.
6 Tala! Asongui vosi vo ko Isareli vana va kasi pokati kove, va talavaya lunene wavo oco va pesele osonde.+
7 Pokati kove ovo va tata isiavo kuenda ina yavo lesepu.+ Ovo va punda ocingendeleyi kuenda va talisa ohali omõla ka kuete isia* locimbumba.”’”+
8 “‘Ovitumãlo viange vi kola o vi pembula kuenda o sepula asambata ange.+
9 Pokati kove pali vakualundi vakuambili yoku pesela osonde.+ Pokati kove ovo va lia ovilumba vi eciwa kolomunda kuenda va lekisa ovituwa ka via sungulukile pokati kove.+
10 Pokati kove ovo va lavisa ula wa isiavo*+ kuenda va lipekela lukãi osimbu eye a kasi kocituwa caye.+
11 Pokati kove ulume umue o lekisa ovituwa ka via sungulukile kukãi wulume ukuavo,+ ukuavo o lavisa ukãi womõlaye ulume poku lekisa ovituwa ka via sungulukile+ kuenda ukuavo o putula manjaye ukãi, omõla a isiaye muẽle.+
12 Pokati kove ovo va tava ocitukiko oco ku pesiwe osonde.+ Ove o levalisa losindike+ ale lombandeke* kuenda oku punda olombongo ku vana va lisungue love.+ Ocili muẽle okuti ove wa njivala,’ oco Ñala Tõlo Yehova a popia.
13 “‘Tala! Ame ndi pandula lovaka ange lesumuo omo lionganyu yove yevĩho kuenda omo liovilinga viove vioku pesela osonde pokati kove.
14 Anga hẽ ove o ka kuata utõi* woku pandikisa kuenda ovaka ove a kamamako oku pama koloneke ndi ka ku katukila?+ Ame muẽle ndi Yehova, ame nda ci popia kuenda ndi ka ci linga.
15 Ame ndi ka ku sanduila pokati kolofeka kuenda oku ku sanduila kovaimbo+ kuenje ndi ka malako evĩho liove liosi.+
16 Ove o ka sepuiwa kovaso yolofeka kuenda o ka kũlĩha okuti, ame ndi Yehova.’”+
17 Ondaka ya Yehova yeya vali kokuange yiti:
18 “A mõlomunu, onjo ya Isareli ka yi silivila kokuange ya linga ndeyala limue. Vosi yavo osipi, o estanyu,* utale kuenda osumbu via kapiwa vofolono yoku yengulula. Ovo va linga ndeyala limue ka li silivila liopalata.+
19 “Omo liaco, ca popia Ñala Tõlo Yehova ceci hati: ‘Omo okuti vosi yene ka vu silivila, wa lingi ndeyala,+ ndi ka vu ongoluili pamosi vokati ko Yerusalãi.
20 Ndeci opalata, osipi, utale, osumbu kuenda o estanyu viongoluiwa vofolono yoku yengulula oco vi kapiwe ondalu okuti vi yenguluka, cimuamue haico ndi ka linga okuti, ndi ka vu ongoluili pamosi vonyeño yange kuenda voku tema kuange kuenje ndi ka yi pepelila kokuene noke vu yenguluka.+
21 Ndi ka vu ongololi loku pepelela kokuene londalu yonyeño yange+ kuenje ene vu ka yengulukila vokati kalio.+
22 Ndeci opalata yi yenguluka vokati kofolono yoku yengulula, ene vu ka yengulukila vokati kalio; kuenda vu ka kũlĩha okuti, ame muẽle ndi Yehova, nda wenguila onyeño yange kokuene.’”
23 Ondaka ya Yehova yeya vali kokuange yiti:
24 A mõlomunu, sapuila o Yerusalãi hati: ‘Ove wufeka yimue okuti, ka yi ka yelisiwa ndaño muẽle ombela ka yi lokilamo keteke lionyeño yange yalua.
25 Ovaprofeto valio va yi lingila usuanji,+ ndohosi yimue yi koma yi nyanyõla ocinyama cimue ca kuatiwa.+ Ovo va siata oku lia omanu. Ovo va tambula ovokuasi kuenda ovina vi kuete esilivilo. Ovo va lingisa okuti vokati kalio mu kala ovimbumba vialua.
26 Ovitunda vialio via siata oku sinĩla ocihandeleko cange+ kuenda va sepula ovitumãlo viange vi kola.+ Ovo ka va tẽla oku tepisa pokati keci ci kola leci caño+ kuenda ka va tẽla oku situlula eci ca liña leci ca yela,+ va likala oku lava asambata ange kuenda va ndi vĩhisa pokati kavo.
27 Olombuale vialio vina vi kasi pokati kalio, vi kasi ndolombinji vi nyanyõla ocinyama ca kuatiwa; ovio vi pesela osonde kuenda vi ponda omanu oco vi kuate onganyu yevĩho.+
28 Pole, ovaprofeto valio, va siata oku limbika ovituwa viavo lohala. Va siata oku kuata ovinjonde viesanda+ kuenda ovitumasuku viuhembi kuenje va popia vati: “Eci oco Ñala Tõlo Yehova a popia,” osimbu okuti ame muẽle ndi Yehova, sia ci popele.
29 Omanu vo vofeka va siata oku kemba loku nyana,+ va siata oku talisa ohali osuke lohukũi, ovo va siata oku kemba ocingendeleyi kuenda ka va lekisa esunga kokuaye.’
30 “‘Nda kala oku sandiliya pokati kavo ulume umue wa ponduile oku semũlũla ocimbaka covawe ale oku talama kovaso yange vepangu liocimbaka oco okuti, ka ci nyõliwa,+ pole, sia sangele laumue.
31 Omo liaco, ndi ka sukumuila onyeño yange yalua kokualio kuenda ndi ka va kundula londalu yonyeño yange. Ndi ka lingisa okuti ovitangi viovilinga viavo vi ka kupukila kovitue viavo muẽle,’ oco Ñala Tõlo Yehova a popia.”
Atosi Pombuelo
^ Lit., “ove o ka sombisa, ove o ka sombisa.”
^ Ale “osiwe.”
^ Lit., “va situlula epõlõla lia isiavo.”
^ Ale “loku sanda onganyu.”
^ Lit., “utima.”
^ Okuti, “utale umue u yela wa leñela.”
