Esekiele 26:1-21
26 Kunyamo wekũi lamosi, ketete liatete liosãi, ondaka ya Yehova yeya kokuange yiti:
2 “A mõlomunu, omo okuti o Turo ya popia loku pembula o Yerusalãi yiti+ ‘Haka ciwa!’ Olombundi viomanu via nyõliwa!+ Ovina viosi vi ka linga viange kuenje ndi ka kala ohuasi omo okuti oyo ya nyõliwa’;
3 omo liaco, ca popia Ñala Tõlo Yehova ceci hati: ‘Nda linga unyãli wove A Turo kuenda ndi ka nena olofeka vialua oco vi ku katukile, ndeci okalunga ka tumõla akimba alio.
4 Ovo va ka kundula ovimbaka vio Turo loku lundula olosapalalo vialio+ kuenje ndi ka kolonga osi oco yi linge ohanda.
5 O Turo yi ka linga ocitumãlo cimue coku kukutisa awanda vokati kokalunga.’+
“‘Momo ame muẽle nda ci popia,’ oco Ñala Tõlo Yehova a popia, ‘kuenje oyo yi ka kala ocina cimue ca pundiwa colofeka.
6 Kuenje olonungi* vi kasi vovaimbo o Turo, vi ka pondiwa losipata kuenda omanu va ka kũlĩha okuti, ame ndi Yehova.’
7 “Ca popia Ñala Tõlo Yehova ceci hati: ‘Ñasi oku nena Nevukandesa soma yo Bavulono oku upisa konele yonano, oco a katukile o Turo;+ eye soma yolosoma,+ lolokavalu,+ lakãlu uyaki,+ lalume va endela kolokavalu kuenda olohoka vialua viasualali.*
8 Eye o ka kundula olonungi viove viovaimbo losipata kuenda eye o ka tunga ocimano cimue ci ku ñuala ocingonja loku votola ocimbaka cimue coku ku katukila kuenje o ka ku votuila ociyepelo cimue cinene.
9 Eye o ka lundula ovimbaka viove lolomakina* viaye vioku nyõla kuenda lolondiaviti* viaye, o ka nyõla olosapalalo viove.
10 Olokavalu viaye vi ka lua okuti vi ka ku sitika loneketela kuenda ocileñi cava va endela kolokavalu, calola kuenda cakãlu, vi ka lulumisa ovimbaka viove eci ovo va ka iñilila polombundi viove, ndalume va iñila lombuanja volupale lumue luovimbaka via teka.
11 Akonjo olokavalu viaye a ka kosa olokololo viove viosi;+ eye o ka ponda omanu vove vosi losipata kuenje olongunji viove via pama vi ka kupukila posi.
12 Ovo va ka tambula ovokuasi ove, va ka punda olomĩlu viove,+ va ka lundula ovimbaka viove kuenda va ka kupuila posi olonjo viove via fina; kuenje ovawe ove kuenda ovopange ove osi avaya lovimalañanya viove, vi ka imbiwa vokalunga.’
13 “‘Ndi ka malako onjuela yovisungo viene kuenje ocileñi colohalupa viene ka ci ka yevala vali.+
14 Noke ndi ka ku lingisa ohanda yimue kuenda o ka linga ocitumãlo cimue coku kukutisa awanda.+ Ove lalimue eteke o ka tumbuluiwa vali, momo ame muẽle ndi Yehova ame nda ci popia,’ oco Ñala Tõlo Yehova a popia.
15 “Ca popia Ñala Tõlo Yehova ko Turo ceci hati: ‘Anga hẽ ovifuka ka vi ka luluma?+ omo liocileñi coku kupuka kuove, eci vana va lemẽhiwa okuti va kasi oku panda koku fa* va leña leña, eci pokati kove pa kala oku pondiwa?
16 Olombuale* viosi vio vokalunga, vi ka loka kovialo viavo kuenda vi ka lula ovikutu* viavo loku lula ovowalo avo a tutiwa kuenje va ka kuatiwa* lusumba. Ovo va ka tumãla posi kuenda va ka luluma otembo yosi loku ku vandekela loku saluka.+
17 Kuenje ovo va ka ku imbila ocisungo cimue celisiõsuĩlo*+ kuenda va ku sapuila vati:
“Ove wa nyõliwa calua,+ haive wa kala onungi yo vokalunga, olupale lua sivayiwa;Ove kuenda olonungi viove* wa kali vakuonene vokalunga,+Haene wa sanduili ocinjoko kolonungi viosi vio kilu lieve!
18 Ovifuka vi ka luluma keteke o ka kupuiwa,Ovifuka vio vokalunga vi ka kuata usumba eci ove o ka nyõliwa.”’+
19 “Ca popia Ñala Tõlo Yehova ceci hati: ‘Eci ndi ka ku nyõla loku ku lingisa ndalupale ka a kuete olonungi, eci ndi ka ku yukisa lovava a tumõha kuenda eci okalunga ka ka ku tuvika,+
20 ndi ka ku nena kumue la vana va lokila vocitunu,* komanu vana vo kosimbu; ndi ka lingisa okuti o ka kala vocitumãlo cimue ca longa, ndovitumãlo vimue viosimbu vina via siala alunda, kumue la vana va lokila vocitunu+ oco okuti lomue vali o ka tungila vokuove. Noke ndi ka sivaya* ofeka yava va kasi lomuenyo.
21 “‘Vocipikipiki ndi ka nena kokuove ohali kuenda ove ku ka kalako vali.+ Ovo va ka ku sandiliya, pole, ove lalimue eteke o ka sangiwa vali,’ oco Ñala Tõlo Yehova a popia.”
Atosi Pombuelo
^ Lit., “omãla vakãi.”
^ Lit., “omanu.”
^ Ale “omakina yaye yuyaki.”
^ Ale “olosipata.”
^ Lit., “oku pondiwa.”
^ Ale “asongui.”
^ Ale “ovikutu ka vi kuete ovoko.”
^ Lit., “oku waliwa lu.”
^ Ale “ocisungo cesumuo.”
^ Lit., “Oluo.”
^ Ale “veyambo.”
^ Ale “oku posuisa.”
