Esekiele 28:1-26
28 Ondaka ya Yehova yeya vali kokuange yiti:
2 “A mõlomunu, sapuila usongui wo Turo okuti: ‘Ca popia Ñala Tõlo Yehova ceci hati:
“Omo okuti utima wove wa linga ukuepela,+ ove o kasi oku amamako oku popia hati: ‘Ame ndi suku yimue.
Nda tumãla kocalo cosuku yimue vokati kokalunga.’+
Pole, ove wulume umue ño, ku sukuko.
Ndaño okuti vutima wove wa siata oku sima okuti, wu suku yimue.
3 Tala! Ove o sima okuti o kuete vali olondunge okuti, Daniele ci sule.+
Ka kuli ocina cimue ca salamisua kokuove.
4 Ove wa linga ohuasi lolondunge viove muẽle kuenda uloño wove,Kuenje o kasi oku amamako oku liongoluila opalata lulu vohondo yoku seleka ovokuasi viove.+
5 Uloño wove woku linga olomĩlu wa ku nenela ukuasi walua,+Kuenda utima wove weyuka epela omo liukuasi wove.”’
6 “‘Omo liaco, ca popia Ñala Tõlo Yehova ceci hati:
“Omo okuti vutima wove o kasi oku sima okuti wu suku yimue,
7 Ndi kasi oku ku nenela ovingendeleyi oco vi ku katukile okuti, ovio olofeka via velapo kungangala,+Kuenda ovio vi ka pola olosipata viavo oco vi nyõle ovina viwa wa sandiliya lolondunge viove
Kuenje vi ka vĩhisa oku nina kuove kualua.+
8 Ovo va ka ku lokisa vocitunu,*Kuenda ove o ka fa pole, ku ka fa omo liungangala ale omo liuyaki.+
9 Anga hẽ ove o kamamako oku popia okuti: ‘Ame ndi suku yimue,’ ku una o ka ku ponda?
Ove o ka kala ulume umue waño, ku ka kala osuku yimue peka lia vana va ka ku tomba.”’
10 ‘Ove o ka pondiwa ndalume vana ka va seviwile evamba peka liovingendeleyi,
Momo ame muẽle nda ci popia,’ oco Ñala Tõlo Yehova a popia.”
11 Kuenje ondaka ya Yehova yeya vali kokuange yiti:
12 “A mõlomunu, imba ocisungo celisiõsuĩlo* catiamẽla ku soma yo Turo kuenda u sapuila hati: ‘Ca popia Ñala Tõlo Yehova ceci hati:
“Ove wa kala ongangu yoku lipua,*Weyukile olondunge+ kuenda wa lipuile keposo.+
13 Ove wa kala vo Edene, ocumbo ca Suku.
Ove wa posuisiwile lovawe osi a tĩla
Okuti: Ewe lio rubi, lio topasiu, ewe lio jaspe;lio krisolitu, lio onixi kuenda lio jade; lio safira, lio turkesa+ kuenda lio emeralda;Ovivela kuenda oviyekelo viavo, via pangiwa lulu.
Ovina viaco viosi via pongiyiwa keteke ove wa lulikiwa.
14 Nda ku nõla ndukeruvi ukuakuteyuila okuti, ombuavekua.
Ove wa kala komunda yi kola ya Suku+ kuenda wa endaila pokati kovawe ondalu.
15 Ove wa lipuile volonjila viove tunde keteke wa lulikiwaToke eci wa fetika oku lekisa ekambo liesunga.+
16 Omo liolomĩlu viove vialua,+Ove wa yukisiwa lungangala kuenda wa fetika oku linga ekandu.+
Omo liaco, ndi ka ku tundisa ndocina cimue ca vĩha komunda ya Suku kuenda ndi ka ku kundula,+A keruvi ukuakuteyuila, ndi ka ku tundisa kocitumãlo cove pokati kovawe ondalu.
17 Utima wove wa linga wepela omo lieposo liove.+
Ulamba wove wa nyõla olondunge viove.+
Ndi ka ku imba posi+
Kuenda olosoma vi ka ku imba ovaso.
18 Omo lieko liove linene kuenda olomĩlu viove viuhembi, ove wa vĩhisa ovitumãlo viove vi kola.
Ndi ka linga okuti pokati kove pa molẽha ondalu kuenda oyo yi ka ku timĩha.+
Ndi ka ku pongoluisa etiko kilu lieve kovaso a vosi vana va ku vandekela.
19 Vosi vana va ku kũlĩha pokati komanu, va ka ku vandekela loku komõha.+
Esulilo liove li keya ocipikipiki kuenda li ka koka usumba,Kuenje ove ku ka kalako vali otembo yosi.”’”+
20 Ondaka ya Yehova yeya vali kokuange yiti:
21 “A mõlomunu, imba ovaso ove ko Sidono+ kuenda imba owanji woku yi katukila.
22 O sukila oku popia hati: ‘Ca popia Ñala Tõlo Yehova ceci hati:
“Nda linga unyãli wove, a Sidono kuenda ndi ka sivayiwa pokati kove;Eci ndi ka nena eyambulo kokuove loku lekisa okuti ame ndi Suku yi kola, vosi va ka kũlĩha okuti, ame ndi Yehova.
23 Ndi ka tuma efengi kokualio kuenda osonde yi ka pupila volokololo vialio.
Vana va fa va ka kupukila vokati kalio eci osipata yi ka katukila olonele vialio viosi;Kuenje ovo va ka kũlĩha okuti, ame ndi Yehova.+
24 “‘“Kuenje onjo ya Isareli ka yi ka ñualiwa vali locambanda kuenda olosongo+ okuti, vana va va tata lepembulo; kuenda omanu va ka kũlĩha okuti, ame Ñala Tõlo Yehova.”’
25 “‘Ca popia Ñala Tõlo Yehova ceci hati: “Eci ndi kongolola onjo ya Isareli pokati komanu vana ovo va sanduiwila,+ ndi ka sivayiwa pokati kavo kovaso yolofeka.+ Kuenje ovo va ka tunga vofeka yavo+ yina nda eca kukuenje wange Yakoba.+
26 Ovo va ka tunga loku kolapo+ kuenda va ka tunga olonjo loku kũla oviumbo viayuva+ kuenje va ka tunga loku kolapo eci ndi ka nena esombiso ku vosi vana va lisungue lavo haivo va va tata lepembulo;+ kuenje ovo va ka kũlĩha okuti, ame Yehova Suku yavo.”’”
