Esekiele 3:1-27
3 Eye wa ndi sapuila hati: “A mõlomunu, lia eci ci kasi kovaso ove.* Lia ociña eci noke kuende, ka sapuile onjo ya Isareli.”+
2 Omo liaco, nda yikula omẽla wange kuenda eye wa nyĩha ociña cimue oco ndi ci lie.
3 Eye wamisako oku ndi sapuila hati: “A mõlomunu, lia ociña eci ñasi oku ku ĩha kuenda yukisa imo liove lociña caco.” Omo liaco, nda fetika oku ci lia kuenda ca sosẽle ndowiki vomẽla wange.+
4 Eye wa ndi sapuila hati: “A mõlomunu, iñila vokati konjo ya Isareli kuenda va sapuila olondaka viange.
5 Momo ove ku kasi oku tumiwa komanu vamue va vangula elimi limue ka lia lelukile oku kuata elomboloko liaco, hailio lia tĩla oku li vangula, pole, konjo ya Isareli.
6 Ove ku kasi oku tumiwa komanu valua va vangula elimi limue ka lia lelukile oku kuata elomboloko liaco, hailio lia tĩla oku li vangula okuti, ku pondola oku kuata elomboloko liolondaka viavo. Nda nda ku tumĩle kokuavo, nda va ku yevelela.+
7 Pole, onjo ya Isareli yi ka likala oku ku yevelela, momo ovo ka va yongola oku njevelela.+ Vosi vakuanjo ya Isareli vakualonamãlala haivo va siva.+
8 Tala! Nda lingisa okuti, ocipala cove ci kõla ndovipala viavo kuenda upolo wove u kõla ndovipolo viavo.+
9 Nda lingisa upolo wove ndondiamande okuti, wa kõla calua ewe li sule.+ Ku ka va kuatele usumba ale oku yokokela ovipala viavo,+ momo ovo omanu vamue va sina.”
10 Eye wamisako oku popia hati: “A mõlomunu, yevelela kuenda kapa vutima wove olondaka viosi ndi kasi oku ku sapuila.
11 Kuende pokati komanu* vove+ va kasi kumandekua kuenda sapela lavo. Va sapuila ndoco: ‘Eci oco ca popia Ñala Tõlo Yehova,’ ci kaile okuti va yeva ale sio.”+
12 Kuenje espiritu limue lia ngambata+ kuenda nda yeva konyima yange onjuela yalua kumue londaka yimue yiti: “Ulamba wa Yehova u sivayiwe oku upisa kocitumãlo caye.”
13 Kua kala ocileñi cavava oviluvo a kala oku li lamba lamba+ kuenda ocileñi calola a kala ponele yavio+ lonjuela yalua.
14 Noke espiritu lia ndi votola kuenda lia ngambata. Kuenje nda sumua omo liespiritu lionyeño yange kuenda eka lia Yehova lia ndi pamisa.
15 Omo liaco, nda enda komanu va kala kumandekua ko Telavivi vana va tungile ocipepi lolui Kevare+ kuenje nda kala kocitumãlo va tungila; nda kala pokati kavo loku komõha+ vokuenda kuoloneke epanduvali.
16 Kesulilo lioloneke epanduvali ondaka ya Yehova yeya kokuange yiti:
17 “A mõlomunu, nda ku nõla oco o linge ondavululi yonjo ya Isareli;+ kuenda eci o yeva ondaka yimue yi tunda vomẽla wange, o sukila oku eca kokuavo elungulo li tunda kokuange.+
18 Eci ndi sapuila omunu umue ondingaĩvi siti: ‘Ove o ka fa muẽle,’ pole, ove ku u lungula kuenda ku popi cimue oco o lungule ondingaĩvi okuti, yi liwekapo oku linga eci cĩvi oco oyo yamameko lomuenyo,+ oyo yi ka fa omo lieko liaye, momo ondingaĩvi,+ pole, ndi ka kisika osonde yayo kokuove.*+
19 Pole, nda wa lungula ondingaĩvi kuenje oyo ka yi sipo evĩho liayo kuenda ovilinga viayo vĩvi, oyo yi ka fa omo lieko liayo, pole, ove o ka popela omuenyo wove muẽle.+
20 Pole, nda omunu umue ukuesunga o siapo esunga liaye kuenje o linga eci cĩvi, ndi ka kapa kovaso aye ewe limue liocilondokua kuenda eye o ka fa.+ Nda ove kuo lunguile, eye o ka fa omo liekandu liaye kuenda ovilinga viaye viesunga ka vi ka ivalukiwa vali, pole, osonde yaye ndi ka yi kisika kokuove.*+
21 Pole, nda wa lungula ukuesunga oco ka ka linge ekandu kuenje eye ka lingi ekandu, eye o kamamako oku kala lomuenyo momo eye wa lunguiwa+ kuenda ove o ka popela omuenyo wove.”
22 Eka lia Yehova lia mbuilila kocitumãlo caco kuenje eye wa ndi sapuila hati: “Votoka, kuende vocimbota co vetapi kuenda omo ndi ka sapelela love.”
23 Omo liaco, nda votoka kuenda nda enda vocimbota co vetapi kuenje tala! ulamba wa Yehova wa kala vocitumãlo caco,+ ndulamba nda muĩle kolui Kevare+ kuenje nda petamisa ocipala cange posi.
24 Noke espiritu lia Suku lia iñila vokuange kuenda lia ndi talamisa+ kuenje eye wa ndi sapuila hati:
“Kuende, li yikila vonjo yove.
25 Catiamẽla kokuove a mõlomunu, ovo va ka ku kapa ovikolo kuenda va ka ku kuta lavio oco ku ka tunde pokati kavo.
26 Ndi ka lingisa okuti, elimi liove li lamẽlela vuliakusu womẽla wove kuenje ove o ka kala ocitende, ku ka tẽla oku va lungula, momo ovo omanu vamue va sina.
27 Pole, eci ndi vangula love ndi ka yikula omẽla wove kuenda o sukila oku va sapuila hati:+ ‘Eci oco Ñala Tõlo Yehova a popia.’ Una o yongola oku yeva a yeve+ kuenda una o likala oku yevelela a likale, momo ovo omanu vamue va sina.+
Atosi Pombuelo
^ Lit., “lia eci wa sanga.”
^ Lit., “omãla vomanu vove.”
^ Ale “Ndi ka ku kisika osonde yaye.”
^ Ale “Ndi ka ku kisika osonde yaye.”
