Esekiele 31:1-18
-
Enyõleho lio Egito, osedru ya lepa calua (1-18)
31 Kunyamo 11 kosãi yatatu, keteke liatete yosãi, ondaka ya Yehova yeya vali kokuange yiti:
2 “A mõlomunu, sapuila Fareo soma Yegito kuenda owiñi waye hati:+
‘Helie o sokisiwa love kunene?
3 Kua kala u Asuria umue, uti umue wosedru ko Levanone,
Wa kuata ovianja vimue via posoka via kala ndoviti via pulika vi eca ulembo okuti, via lepa calua;
Osungu yaco, ya kala pokati kalende.
4 Ovava a kulisa calua uti waco, olono viovava a longa a kulisa uti waco toke eci wa lepa.
Olondui via ñualele ocitumãlo pa kũlĩwa uti waco;
Olono viovava via enda oku tapela oviti viosi viovusenge.
5 Eli olio esunga lieci uti waco wa lepela calua okuti, oviti viosi vikuavo viovusenge vi sule.
Olonavi vialio via livokiya kuenda ovianja vialio via tanda
Omo liovava alua olondui viaco.
6 Olonjila viosi vio kilu via tungile ovianju volonavi viaco,
Ovinyama viosi viovusenge via enda oku citila vemẽhi liovianja viaco,
Kuenda olofeka viosi vinene via tungile vulembo waco.
7 Owo wa piãla keposo kuenda kutunga wovianja vialio,
Momo olombombo vialio via tanda toke vovava alua.
8 Ka kuli olosedru vikuavo vocumbo ca Suku+ vi sokisiwa luti waco.
Laumue uti wongaye wa kuata olonavi ndevi vialio,
Kuenda laumue uti wofaya wa kuata ovianja ndevi vialio.
Laumue uti ukuavo vocumbo ca Suku, wa kuata eposo nduti waco.
9 Nda u posuisa lamẽla alua,
Kuenje oviti viosi vikuavo vio Edene, ocumbo ca Suku yocili via kuatela onya uti waco.’
10 “Ca popia Ñala Tõlo Yehova ceci hati: ‘Omo okuti owo* wa lepa calua losungu yalio ya pitĩla pokati kalende kuenda utima walio wa linga ukuepela omo liutunga walio,
11 Ame ndi ka eca uti waco peka liombiali ya pama yolofeka.+ Oyo yi ka katukila muẽle uti waco kuenda ame ndi ka u likala omo lievĩho liawo.
12 Kuenje ovingendeleyi okuti, olofeka via piãla kungangala, vi ka timbula uti waco kuenda va ka u sia kolomunda kuenje amẽla alio, a ka kupukila vovimbota viosi kuenda ovianja vialio vi ka kupukila volondui viosi viofeka.+ Omanu vosi vo kilu lieve va ka tunda vulembo walio kuenje va ka siapo uti waco.
13 Olonjila viosi vio kilu vi ka tungila vononga yalio ya kupuka kuenje ovinyama viosi viovusenge vi ka kala vovianja vialio.+
14 Eci ca lingiwa oco okuti, laumue uti u kasi ocipepi lovava u kula calua ale osungu yaco yi pitĩla pokati kalende kuenda oco okuti laumue uti wa tapeliwa ciwa u pitĩla vutunga walende. Momo oviti viosi vi ka nyõliwa valondo ongongo, kumue lomãla vomanu vana va kasi oku lokila vocitunu.’*
15 “Ca popia Ñala Tõlo Yehova ceci hati: ‘Eteke owo u lokila Vonjembo* ndi ka kokela omanu oku lila. Omo liaco, ndi ka tuvika ovava a longa poku yika olondui vialio oco okuti ovava alua a talama. Ndi ka tekãvisa o Levanone omo liuti waco kuenda oviti viosi viovusenge vi kowuka.
16 Ndi ka lulumisa olofeka locindindimo coku kupuka kuti waco eci ndi u lokisa Vonjembo* la vosi vana va kasi oku lokila vocitunu* kuenda oviti viosi vio Edene+ via posoka kuenda vina via velapo vio ko Levanone, viosi vina via tapeliwa ciwa vi ka lembelekiwa valondo ongongo.
17 Ovo va lokila laye* Vonjembo,* ku vana va pondiwa losipata+ kumue la vana vo kuatisa* okuti, va tungile vulembo waye vokati kolofeka.’+
18 “‘Pokati koviti vio Edene uti upi u sokisiwa love kesivayo kuenda kunene?+ Pole, ove o ka tualiwa vombuelo kumue loviti vio Edene toke valondo ongongo. Ove o ka pekela pokati ka vana ka va seviwile evamba, kumue la vana va pondiwa losipata. Eci oco ci ka pita la Fareo kuenda owiñi waye wosi,’ oco Ñala Tõlo Yehova a popia.”
Atosi Pombuelo
^ Lit., “ove.”
^ Ale “veyambo.”
^ Okuti, ocitumãlo mu kendiwa omanu va fa.
^ Ale “veyambo.”
^ Okuti, ocitumãlo mu kendiwa omanu va fa.
^ Okuti, “uti wosedru ko Levanone.”
^ Okuti, ocitumãlo mu kendiwa omanu va fa.
^ Lit., “okuokuo.”
