Esekiele 34:1-31
34 Ondaka ya Yehova yeya vali kokuange yiti:
2 “A mõlomunu, imba owanji woku pisa angombo va Isareli. Imba owanji kuenda sapuila angombo hati: ‘Ca popia Ñala Tõlo Yehova ceci hati: “Ngongo yangombo va Isareli+ vana va litekula lika ovo muẽle! Angombo hẽ ka va sesamẽlele oku lisa ocunda?+
3 Ene vu lia ulela wovinyama, vu liwalisa ene muẽle lovowalo a pangiwa lovonya olomeme kuenda vu ponda ocinyama ca netapo vali,+ pole, ka vu tati ocunda.+
4 Ene ka wa pamisili vina via hongua ale oku kayisa vina vi vela ale oku itika vina via lemẽhiwa ndaño oku ondolola vina via pambuka ale oku sandiliya vina via nyelela;+ pole, wa vi viali lungangala kuenda oku vi kangisa.+
5 Omo liaco, ovio via sanduiwa momo ka kua kaile ungombo;+ ovio via sanduiwa kuenda via linga okulia kuovinyama viosi viovusenge.
6 Olomeme viange via nyelela kolomunda viosi kuenda koviwulu viosi via lepa; olomeme viange via sanduiwa kolonepa viosi viongongo kuenda lomue wa vi sanda ale oku vi vanjiliya oco vi sangiwe.
7 “‘“Omo liaco, ene angombo, yeveleli ondaka ya Yehova:
8 ‘“Ndeci ñasi muẽle lomuenyo,” oco Ñala Tõlo Yehova a popia hati: “Omo okuti olomeme viange via kuatiwa kuenje via linga okulia kuovinyama viosi viovusenge, momo ka kua kaile laumue ungombo kuenda angombo vange ka va sandiliyile olomeme viange; pole, ovo vamamako oku litekula ovo muẽle kuenda ka va lisile olomeme viange,”’
9 omo liaco, ene angombo yeveleli ondaka ya Yehova.
10 Ca popia Ñala Tõlo Yehova ceci hati: ‘Ndi ka yambula angombo loku va kisika oku lombolola ndomo va tata olomeme viange* kuenda si ka va ecelela vali oku lisa* olomeme viange+ kuenje angombo ka va ka litekula vali ovo muẽle. Ndi ka yovola olomeme viange vomẽla wavo kuenda ovio ka vi ka kala vali okulia kuavo.’”
11 “‘Momo ca popia Ñala Tõlo Yehova ceci hati: “Ñasi palo kuenda ndi ka sandiliya ame muẽle olomeme viange kuenje ndi ka vi tata.+
12 Ndi ka tata olomeme viange ndeci ungombo umue a sanga olomeme viaye via sanduiwile kuenje o vi lisa.+ Ndi ka vi yovola kovitumãlo viosi via sandokaila keteke lialende kuenda liowelema walua.+
13 Ndi ka vi upa pokati komanu loku viongoluila pamosi oku upisa kolofeka kuenda ndi ka vi tuala kofeka yavio kuenje ndi ka vi lisila kolomunda via Isareli,+ ocipepi lolondui kuenda kovitumãlo viosi viofeka ku sangiwa omanu.
14 Ndi ka vi lisila kocitumãlo cimue ciwa kuenda ovio vi ka lisiwila kolomunda via lepa viofeka yo Isareli.+ Ovio vi ka pekela kofeka yaco kocitumãlo cimue ciwa coku lisila+ kuenda vi ka lisiwa kovisenge vina vioku lisila oviunda via nõliwa kolomunda vio Isareli.”
15 “‘“Ame muẽle ndi ka lisa olomeme viange+ kuenda ame muẽle ndi ka vi songuila oco vi puyuke,”+ oco Ñala Tõlo Yehova a popia.
16 “Eyi ya nyelẽla ndi ka yi sandiliya,+ eyi ya pambuka ndi yi nena vali, eyi ya lemẽhiwa ndi yitika kuenda eyi ya hongua ndi ka yi pamisa; pole, yina ya neta leyi ya pama, ndi ka vi kundula. Ndi ka vi lisa lesombiso.”
17 “‘Catiamẽla kokuene alomeme viange, oco ca popia Ñala Tõlo Yehova hati: “Ame ndi laika oku sombisa pokati komeme yimue lomeme yikuavo kuenda pokati kovitupi violomeme lovitupi violohombo.+
18 Ka ci tẽla hẽ ene oku lisila vovisengue viosi via velapo? Anga hẽ vu sukilavo oku liata vovisenge vikuavo lovolu ene? Kuenda noke yoku nyua ovava a yela ciwa, vu sukila hẽ oku liata vovava loku a lĩhisa lolomãhi viene?
19 Olomeme viange hẽ vi pondola oku lisiwila vusenge una ene wa liati lolomãhi viene kuenda oku nyua ovava wa lĩhisi lolomãhi viene?”
20 “‘Omo liaco, eci oco Ñala Tõlo Yehova a va sapuila hati: “Ame ñasi palo kuenda ame muẽle ndi ka sombisa pokati komeme ya neta leyi ya kopa,
21 momo latimba ene wamamiko oku sinda kuenda lolombinga viene wamamiko oku sinda olomeme viosi vi vela toke eci ene wa vi sanduili kupãla.
22 Ame ndi ka popela olomeme viange kuenda ovio ka vi ka kala vali ndocina cimue ci kuatiwa;+ kuenje ndi ka sombisa pokati komeme yimue lomeme yikuavo.
23 Ndi ka vi kapela ungombo umue+ okuti, ukuenje wange Daviti+ kuenje eye o ka vi lisa. Eye muẽle o ka vi lisa kuenda o ka kala ungombo wavio.+
24 Kuenje ame ndi Yehova, ndi ka linga Suku yavio+ kuenda ukuenje wange Daviti, o ka linga usongui pokati kavio.+ Ame muẽle ndi Yehova, ame nda ci popia.
25 “‘“Ndi ka linga lavio ocisila cimue combembua+ kuenda ndi ka yovola ofeka eyi kovinyama via tema+ oco okuti, ovio vi tunga loku kolapo vekalasoko kuenda vi pekela vovisenge.+
26 Ndi ka lingisa okuti ovio kumue lonepa ya ñuala owulu wange, vi linga esumũlũho+ kuenda ndi ka lokisa ombela votembo ya sokiyiwa. Asumũlũho aco a ka loka ndombela.+
27 Oviti viovusenge vi ka ima apako alio kuenda osi yi ka ima ovaima alio+ kuenje ovio vi ka tunga loku kolapo vofeka. Noke ovio vi ka kũlĩha okuti, ame ndi Yehova eci ndi ka teya okanga yavio+ loku vi popela ku vana va vi talisa ohali.
28 Ovio ka vi ka kala vali ocina cimue ci kuatiwa lolofeka kuenda ka vi ka liwa vali lovinyama viovusenge vio kilu lieve kuenda ovio vi ka tunga loku kolapo kuenje lomue o ka vi lingisa vali usumba.+
29 “‘“Ndi ka vi kũlĩla ocikũla cimue ci ka kemãla* kuenje ovio ka vi ka fa vali lonjala vofeka+ kuenda ka vi ka kutisiwa vali osõi lolofeka.+
30 ‘Kuenje ovio vi ka kũlĩha okuti, ame ndi Yehova Suku yavio, ndi kasi lavio kuenda ovio okuti, onjo ya Isareli omanu vange,’+ oco Ñala Tõlo Yehova a popia.”’
31 “‘Catiamẽla kokuene, alomeme viange,+ alomeme vina ndi kasi oku tata, ene vumanu vaño kuenda ame ndi Suku yene,’ oco Ñala Tõlo Yehova a popia.”
Atosi Pombuelo
^ Ale “ndi ka pinga olomeme viange peka liavo.”
^ Ale “oku tata.”
^ Lit., “conduko yimue.”
