Esekiele 37:1-28
37 Eka lia Yehova lia mbuila kuenda pocakati cespiritu liaye, Yehova wa ñuata kuenda wa ñapa vokati kocimbota+ co vetapi muna mueyukile akepa.
2 Eye wa mitisa kolonele viakepa kuenje nda limbuka okuti vokati kocimbota co vetapi liaco, mua kala akepa alua kuenda akepa aco a kukutile calua.+
3 Eye wa mula hati: “A mõlomunu, anga hẽ akepa a-a a ka kala vali lomuenyo?” Nda tambulula siti: “A Ñala Tõlo Yehova, ove wa ci kũlĩha.”+
4 Omo liaco, eye wa ndi sapuila hati: “Imba owanji watiamẽla kakepa a-a kuenda popia lao hati: ‘Ene akepa a kukuta, yeveleli ondaka ya Yehova:
5 “‘Ca popia Ñala Tõlo Yehova kakepa a-a ceci hati: “Ndi ka koka okuti ofela yomuenyo yi iñila vokuene kuenje vu ka kala vali lomuenyo.+
6 Ndi ka kapa asokoluilo kuenda ositu kokuene kuenje ndi ka vu sitiki lekova loku kapa ofela yomuenyo vokuene kuenda vu ka kala vali lomuenyo; kuenje vu ka kũlĩha okuti, ame ndi Yehova.”’”
7 Noke nda imba owanji ndomo nda handelekiwile. Eci nda mala oku imba owanji kua kala onjuela yimue, ocileñi cimue coku litokeka kuenje akepa a fetika oku litokeka okuti ekepa lekepa.
8 Noke nda mola okuti asokoluilo kuenda ositu, vieya kakepa kuenje ekova lia a sitika. Pole, vakepa aco handi ka mua kaile ofela yomuenyo.
9 Noke eye wa ndi sapuila hati: “Imba owanji kofela. Imba owanji a mõlomunu kuenda sapuila ofela hati: ‘Ca popia Ñala Tõlo Yehova ceci hati: “Afela, enju oku upisa kolonele vikuãla kuenda pepelela komanu ava va pondiwa oco va kale vali lomuenyo.”’”
10 Omo liaco, nda imba owanji ndomo eye a ndi handelekele kuenda ofela yomuenyo yeya vokuavo kuenda ovo va fetika vali oku kala lomuenyo loku talama kuenje ovo va linga ocimunga cimue+ cinene colohoka.
11 Noke eye wa ndi sapuila hati: “A mõlomunu, akepa a-a a lomboloka onjo yosi ya Isareli.+ Ovo va kasi oku popia vati: ‘Akepa etu a kukuta kuenda elavoko lietu lia nyõleha.+ Tua kunduiwa muẽle olumue.’
12 Omo liaco, imba owanji kuenda va sapuila hati: ‘Ca popia Ñala Tõlo Yehova ceci hati: “Ndi ka yikula ayambo ene+ loku vu votoli vayambo ene, amanu vange kuenje ndi vu neni vofeka ya Isareli.+
13 Kuenje vu ka kũlĩha okuti ame ndi Yehova, eci ndi yikula ayambo ene kuenda eci ndu votoli vayambo ene, Amanu vange.”’+
14 ‘Ndi ka kapa espiritu liange vokuene kuenda vu ka kala vali lomuenyo+ kuenje ndi ka vu kapi vofeka yene; kuenje vu ka kũlĩha okuti ame muẽle ndi Yehova, ame nda ci popia kuenda ame nda ci linga,’ oco Yehova a popia.”
15 Ondaka ya Yehova yeya vali kokuange, yiti:
16 “Kuenje ove a mõlomunu, tikula ombueti yimue kuenda sonehamo hati: ‘Ku Yuda kuenda komanu va Isareli va kasi laye.’*+ Noke tikula ombueti yikuavo kuenda sonehamo hati: ‘Ku Yosefe, ombueti ya Efarimi kuenda konjo yosi ya Isareli vana va kasi laye.’*+
17 Noke kongela pamosi olombueti viaco oco vi linge yimosi peka liove.+
18 Eci omanu* vove va ka ku pula vati: ‘Ku ka tu sapuilako hẽ eci ovina evi vi lomboloka?’
19 va sapuila hati: ‘Ca popia Ñala Tõlo Yehova ceci okuti: “Ndi ka tikula ombueti ya Yosefe yina yi kasi peka lia Efarimi kuenda ovikoti via Isareli vina vi kasi laye kuenje ndi ka vi kongela kombueti ya Yuda; ndi ka vi lingisa okuti vi kala ombueti yimosi+ kuenda yi ka linga ombueti yimosi peka liange.”’
20 Olombueti vina ove o ka sonehamo, vi ka kala peka liove oco ovo va vi mole.
21 “Noke va sapuila hati: ‘Ca popia Ñala Tõlo Yehova ceci hati: “Ndi kopa va Isareli pokati kolofeka vina ovo va enda kuenda ndi ka vongolola kolonepa viosi kuenje ndi ka va nena vofeka yavo.+
22 Ndi ka va lingisa okuti va linga ofeka yimosi vofeka,+ kolomunda vio ko Isareli kuenda osoma yimosi yi ka va viala vosi yavo+ kuenje ka va ka linga vali olofeka vivali; ndaño oku tepisua vali vovosoma avali.+
23 Ovo ka va ka li vĩhisa vali loviteka viavo via vĩha,* lovilinga viavo viumbondo kuenda akandu avo osi.+ Ndi ka va yovola kevĩho liavo liosi lina ovo va lueya lalio kuenda ndi ka va yelisa. Ovo va ka linga omanu vange kuenda ame ndi ka kala Suku yavo.+
24 “‘“Ukuenje wange Daviti o ka kala osoma yavo+ kuenda vosi yavo va ka kuata ungombo umosi.+ Ovo va ka endela volonumbi viange kuenda va ka kapako lutate oviholo viange.+
25 Ovo va ka tunga vofeka ame nda eca kukuenje wange Yakoba, kuna vakukululu yene va kala+ kuenda va ka tungamo otembo ka yi pui,+ ovo kumue lomãla vavo kuenda omãla vomãla vavo;+ kuenje Daviti ukuenje wange o ka linga usongui* wavo otembo ka yi pui.+
26 “‘“Kuenje ame ndi ka linga ocisila cimue combembua lavo;+ oco ci ka kala ocisila cimue cotembo ka yi pui kokuavo. Ame ndi ka eca kokuavo ofeka yavo loku va luisa+ kuenda ndi ka kapa ocitumãlo cange ci kola pokati kavo otembo ka yi pui.
27 Ombalaka* yange yi ka kala lavo kuenda ame ndi ka linga Suku yavo kuenje ovo va ka linga omanu vange.+
28 Kuenje olofeka vi ka kũlĩha okuti, ame ndi Yehova, ame ndi kolisa o Isareli eci ocitumãlo cange ci kola ci kala pokati kavo otembo ka yi pui.”’”+
Atosi Pombuelo
^ Ale “okuti akamba vaye.”
^ Ale “okuti akamba vaye.”
^ Lit., “omãla vomanu vove.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Ale “ombuale.”
^ Ale “ocitumãlo coku kala; onjo.”
