Esekiele 39:1-29
39 “Catiamẽla kokuove a mõlomunu imba owanji woku pisa Goge+ kuenda u sapuila hati: ‘Ca popia Ñala Tõlo Yehova ceci hati: “Nda linga unyãli wove A Goge, usongui wa velapo* wo Meseke kuenda wo Tuvale.+
2 Ndi ka pongolola ocimãho cove kuenda ndi ka ku songuila loku ecelela okuti, ove o tunda kolonepa viocipãla vio konano+ loku ku nena kolomunda vio Isareli.
3 Ndi ka nyõla ohonji yi kasi peka liove liepĩli kuenda ovisongo vi kasi peka liove liondio vi ka kupuka povaka ove.
4 Ove o ka kupukila kolomunda vio Isareli+ ove kumue lasualali vove vosi kuenda omanu va ka kala love. Ame ndi ka ku eca ndokulia kolonjila viosi kuenda kovinyama viovusenge.”’+
5 “‘Ove o ka kupukila venyãla,+ momo ame muẽle nda ci popia,’ oco Ñala Tõlo Yehova a popia.
6 “‘Kuenje ndi ka tuma ondalu ku Magoge kuenda ku vana va tunga vovifuka+ loku kolapo kuenje ovo va ka kũlĩha okuti, ame ndi Yehova.
7 Ndi ka ecelela okuti onduko yange yi kola, yi kũlĩhĩwa pokati komanu vange va Isareli kuenda si ka ecelela okuti onduko yange yi kola yi sepuiwa vali; kuenje olofeka vi ka kũlĩha okuti, ame ndi Yehova,+ U o Kola ko Isareli.’+
8 “‘Ocili muẽle, ovina viaco vi kasi oku iya kuenda vi ka tẽlisiwa,’ oco Ñala Tõlo Yehova a popia. ‘Eli olio eteke nda popele.
9 Olonungi vialupale o Isareli vi ka tundamo kuenda vi ka siakãla ondalu lovota, oviyepelo vinene levi vitito, olohonji, ovisongo, olombueti viuyaki kuenda olonjelia. Kuenje ovo va ka talavaya lavio oco va siakãle ondalu+ vokuenda kuanyamo epanduvali.
10 Ovo ka va ka sukila oku kopa avaya vovapia ale oku tiaña olohũi vusenge momo va ka talavaya lovota avo oco va siakãle ondalu.’
“‘Ovo va ka tambula ovina via pundiwa ku vana va va punda kuenda va ka punda vana va va pundavo,’ oco Ñala Tõlo Yehova a popia.
11 “‘Keteke liaco, ndi ka eca ku Goge+ eyambo limue kocitumãlo caco ko Isareli vocimbota ca vana va linga ungende kutundilo wokalunga kuenje ocimbota caco, ci ka sitika onjila ya vana va pitamo. Kocitumãlo caco, oko va ka kenda Goge kumue lowiñi waye wosi kuenje va ka tukula ocitumãlo caco hati, Ocimbota co Hamone-Goge.*+
12 Onjo ya Isareli yi ka pita olosãi epanduvali poku va kenda oco ofeka yi yelisiwe.+
13 Omanu vosi vo vofeka eyi va ka kuatisa kupange woku va kenda kuenda ci ka va nenela ekemãlo keteke ndi ka li muisa ame muẽle ulamba,’+ oco Ñala Tõlo Yehova a popia.
14 “‘Ku ka nõliwa Alume oco vamameko oku kũlĩhĩsa ofeka kuenda oku kenda ovivimbi vina via supapo kilu lieve, oco li yelisiwe. Ovo va kamamako oku kũlĩhĩsa vokuenda kuolosãi epanduvali.
15 Eci alume vana va kũlĩhĩsa ofeka va mola ekepa liomunu umue, ovo va ka kapa ondimbukiso ponele yalio. Kuenje vana va nõliwa oco va kende, va ka kenda ekepa liaco Vocimbota co Hamone-Goge.*+
16 Kuenje ku ka kalavo olupale lu tukuiwa hati, Hamona.* Kuenje ovo va ka yelisa ofeka.’+
17 “Catiamẽla kokuove a mõlomunu, ca popia Ñala Tõlo Yehova ceci hati: ‘Sapuila apata osi olonjila kuenda ovinyama viosi viovusenge hati: “Liongoluili ene muẽle pamosi kuenda enjui. Ongolokeli kolonele viosi viocilumba ndi kasi oku vu pongiyili okuti, ocilumba cimue cinene kolomunda via Isareli.+ Vu ka lia ositu kuenda oku nyua osonde.+
18 Vu ka lia ositu yalume vakuonene kuenda oku nyua osonde yasongui vo kilu lieve, yovitupi violomeme, yotulomeme, yovitupi violohombo kuenda yolongombe okuti, ovinyama viosi via neta vio ko Basiane.
19 Vu kekuta ene muẽle lulela kuenda vu ka nyua osonde toke eci vu kolua locilumba ndi kasi oku vu pongiyili.”’
20 “‘Komesa yange ene vu kekuta lolokavalu kuenda lalume vakuakuendisa akãlu uyaki, lalume va kemãla kuenda asualali vosi,’+ oco Ñala Tõlo Yehova a popia.
21 “‘Ndi ka lekisa ulamba wange pokati kolofeka kuenda olofeka viosi vi ka limbuka esombiso ndi ka linga kuenda unene* ndi ka lekisa pokati kavo.+
22 Oku upisa keteke liaco, onjo ya Isareli yi ka kũlĩha okuti, ame ndi Yehova Suku yavo.
23 Kuenje olofeka vi ka kũlĩha okuti onjo ya Isareli ya enda kumandekua omo liekandu liavo muẽle, momo ovo va lekisa ekambo liekolelo kokuange.+ Omo liaco, nda sitika ocipala cange kokuavo+ kuenda nda va eca kovanyãli vavo+ kuenje vosi yavo va pondiwa losipata.
24 Nda linga lavo ndomo ci likuata levĩho liavo kuenda akandu avo kuenje nda sitika ocipala cange kokuavo.’
25 “Ca popia Ñala Tõlo Yehova ceci hati: ‘Ndi ka nena vali olomandekua via Yakoba+ kuenda ndi ka lekisa ohenda konjo yosi ya Isareli;+ kuenje ndi ka lekisa ombili poku teyuila* onduko yange yi kola.+
26 Noke yoku kutisiwa osõi omo liovilinga viavo viosi viekambo liekolelo,+ ovo va ka tunga vofeka yavo loku kolapo okuti lomue o va lingisa usumba.+
27 Eci ndi ka va nena vali pokati komanu kuenda oku vongolola kolofeka viovanyãli vavo,+ ndi ka likolisavo ame muẽle pokati kavo kovaso yolofeka vialua.’+
28 “‘Ovo va ka kũlĩha okuti ame ndi Yehova Suku yavo, eci ndi ka va tuma kumandekua pokati kolofeka kuenda oku vongoluila vali vofeka yavo okuti, lomue pokati kavo o siala konyima.+
29 Si ka sitika vali kokuavo ocipala cange+ momo ndi ka sukumuĩla espiritu liange konjo ya Isareli,’+ oco Ñala Tõlo Yehova a popia.”
Atosi Pombuelo
^ Ale “usongui ombuale.”
^ Ale “Ocimbota Cowiñi wa Goge.”
^ Ale “Ocimbota Cowiñi wa Goge.”
^ Ci lomboloka “Owiñi.”
^ Lit., “eka.”
^ Lit., “oku lekisa okuti va fendela lika.”
