Esekiele 40:1-49
40 Kunyamo 25 wumandekua wetu+ kefetikilo liunyamo, keteke liekũi liosãi, kunyamo 14 noke lioku nyõliwa kuolupale,+ keteke liaco muẽle, eka lia Yehova lia mbuila kuenda eye wa ngambata volupale.+
2 Suku wa ndi lekisa ocina cimue kuenda oco ca setahãla eci nda muile kofeka yo Isareli. Eye wa ngambata kofeka yo Isareli kuenje wa ndi talamisa komunda yimue ya lepa calua,+ kombuelo kua kala ocitungilo cimue ca soka ndolupale lumue.
3 Eci a ngambata kocitumãlo caco, nda mola ulume umue wa kala oku nina ndosipi.+ Eye wa kuata peka ukolo umue welinyu kuenda olundeya* lumue luoku seteka+ kuenje wa talama pombundi.
4 Ulume waco wa ndi sapuila hati: “A mõlomunu, vanja lovaso ove muẽle, yevelela lutate kuenda kapako* ovina viosi ndu ku lekisa, momo eli olio esunga lieci Suku a ku nenela kulo. Sapuila onjo ya Isareli ovina viosi o lete.”+
5 Nda mola ocimbaka cimue ca ñuala konele yonembele.* Peka liulume pa kala olundeya luoku seteka wolonjongo epandu (konjongo lonjongo kua vokiyiwa upati weka).* Eye wa fetika oku seteka ocimbaka kuenda upati walio wa kala ndolundeya lumosi loku lepa kualio kua kalavo ndolundeya lumosi.
6 Kuenje eye wa enda toke pombundi ya imba ovaso kutundilo+ kuenda wa londa kolosikata vialio. Eci eye a seteka olukuki luombundi, upati walio wa sokele olundeya lumosi kuenda upati wonele yikuavo wolukuki wa sokelevo lolundeya lumosi.
7 Ohondo lohondo yondavululi usõvi waco wa sokele olundeya lumosi kuenda upati waco wa sokele olundeya lumosi kuenje kua kala ovikeya vitãlo pokati kolohondo violondavululi.+ Olukuki luombundi lua kala konele yocindumba combundi yecelela oku iñila vokati, ya sokele olundeya lumosi.
8 Eye wa seteka ocindumba combundi cecelela oku iñila vokati kuenda ca sokele olundeya lumosi.
9 Noke eye wa seteka ocindumba combundi okuti ca sokele ovikeya ecelãla; kuenda eye wa seteka olongunji vialio okuti via sokele ovikeya vivali; kuenje ocindumba combundi ca kala konele ya imba ovaso vokati.
10 Kua kala olohondo vitatu viondavululi konele lonele yombundi yutundilo. Olonele viaco vitatu, via kuata oseteko yimuamue kuenda olongunji via kala kolonele viaco, via kuata oseteko yimuamue.
11 Noke eye wa seteka upati wo puvelo wombundi okuti, wa sokele 10 kovikeya; kuenda usõvi wombundi yaco, wa sokele 13 kovikeya.
12 Onele ya ñualiwa locindumba kovaso yolohondo viondavululi yina ya kala konele lonele, ya sokele ukeya umosi. Olohondo viondavululi vina via kala kolonele vivali, via sokele ovikeya epandu okuti onele lonele.
13 Noke eye wa seteka ombundi oku upisa kolusoka lumue luohondo* yondavululi toke kolusoka lukuavo kuenje upati walio wa soka 25 kovikeya; oku iñilila kuohondo yimue kua imba ovaso kohondo yikuavo.+
14 Noke wa seteka olongunji kuenje via sokele 60 kovikeya koku lepa, oku kongelamo olongunji volombundi via ñuala ocitali.
15 Oku upisa konepa yo kovaso yombundi toke kovaso yocindumba ca imba ovaso vokati kombundi, ya sokele 50 kovikeya.
16 Vokati kombundi, volohondo violondavululi+ kuenda kolongunji vialio konele lonele yombundi, kua kala olonjanela via likupika.* Vokati kocindumba, mua kalavo olonjanela okuti konele lonele kuenda kolonele violongunji+ kua kala oviluvialuvia viuti weva.
17 Noke eye wa ngambata vokati kocitali co kosamua kuenje nda mola olohondo vioku lilamo+ kuenda kolonele viocitali kua kanduiwa lovawe. Kua kala 30 kolohondo vioku lilamo posi ya kanduiwa lovawe.
18 Osi ya kanduiwa lovawe konele yolombundi, oku lepa kualio, kua lisoka loku lepa kuolombundi okuti, oyo ya kala osi yi sule ya kanduiwa lovawe.
19 Kuenje eye wa seteka ocinãla* oku upisa kovaso yombundi yi sulemo toke kefetikilo liocitali co vokati. Oco ca kuata 100 kovikeya konele yutundilo kuenda konele yonano.
20 Kocitali co kosamua, kua kala ombundi yimue ya imba ovaso konano kuenda eye wa seteka usõvi walio lupati walio.
21 Konele lonele kua kala olohondo vitatu viondavululi. Olongunji vialio kuenda ocindumba via kuata oseteko yimuamue ndeyi yombundi yatete. Oyo ya sokele 50 kovikeya vusõvi kuenda 25 vupati.
22 Olonjanela vialio, ocindumba calio kuenda oviluvialuvia viuti weva,+ via kuata oseteko yimuamue ndeyi yombundi yo kutundilo. Omanu va ponduile oku iñilamo poku londa olosikata epanduvali kuenda ocindumba calio ca kala kovaso yavo.
23 Kocitali co vokati, kua kala ombundi yimue kovaso yombundi yo konano kuenda yikuavo kovaso yombundi yo kutundilo. Eye wa seteka ocinãla ci kasi pokati kombundi yimue toke kombundi yikuavo kuenda ya sokele 100 kovikeya.
24 Noke eye wa ngambata toke konele yombuelo kuenje nda mola ombundi yimue konele yombuelo.+ Eye wa seteka olongunji vio kolonele vialio kuenda ocindumba calio, ovio via kuata oseteko yimuamue ndolombundi vikuavo.
25 Kua kala olonjanela kolonele viosi viombundi kuenda viocindumba, ndolonjanela vikuavo. Oyo ya kuata 50 kovikeya vupati kuenda 25 kovikeya vusõvi.
26 Kua kala olosikata epanduvali vioku londako+ kuenda ocindumba calio, ca kala kovaso yalio. Oco ca setahãlele oviluvialuvia viuti weva kolongunji violonele vialio okuti, konele lonele.
27 Ocitali co vokati, ca kuata ombundi yimue konele yombuelo; eye wa seteka onele yombuelo oku upisa kombundi yimue toke kombundi yikuavo kuenje ocinãla caco ca soka 100 kovikeya.
28 Noke wa ngambata vocitali co vokati poku pita pombundi yo konele yombuelo; eci eye a seteka onele yombuelo yombundi, oseteko yaco ya kala yimuamue ndolombundi vikuavo.
29 Olohondo vialio viondavululi, lolongunji via kala kolonele vialio kuenda ocindumba calio ca kuata oseteko yimuamue ndolombundi vikuavo. Konele lonele yocindumba kua kala olonjanela. Ombundi yaco ya kuata 50 kovikeya vusõvi kuenda vupati 25 kovikeya.+
30 Kolonele viaco viosi, kua kala ovindumba; vusõvi via sokele 25 kovikeya kuenda vupati ovikeya 5.
31 Ocindumba combundi yonele yombuelo ca imba ovaso kocitali co kosamua kuenda konele yolongunji vialio kua kala oviluvialuvia viuti weva+ kuenda olosikata ecelãla vi ecelela oku pitako.+
32 Eci eye a ngambata vocitali co vokati oku upisa kutundilo, eye wa seteka ombundi kuenje oyo ya kuata oseteko yimuamue ndolombundi vikuavo.
33 Olohondo vialio viondavululi, lolongunji via kala kolonele vialio kuenda ocindumba calio ca kuata oseteko yimuamue ndolombundi vikuavo kuenje konele lonele kuenda kocindumba calio kua kala olonjanela. Ocitali caco ca kuata 50 kovikeya vusõvi kuenda vupati 25 kovikeya.
34 Ocindumba calio ca kala kocitali co kosamua kuenda kua kala oviluvialuvia viuti weva konele lonele yolongunji kuenda olosikata ecelãla vi ecelela oku pitako.
35 Noke eye wa ngambata kombundi yo konano+ kuenje wa yi seteka; oyo ya kuata oseteko yimuamue ndolombundi vikuavo.
36 Olohondo vialio viondavululi, lolongunji vialio kuenda ocindumba calio, via kuata oseteko yimuamue ndolombundi vikuavo. Oyo ya kuata olonjanela konele lonele. Ombundi yaco, ya kuata 50 kovikeya vusõvi kuenda vupati 25 kovikeya.
37 Olongunji vio kolonele viaco, via kala kocitali co kosamua kuenda kua kala oviluvialuvia viuti weva konele lonele yolongunji kuenda olosikata ecelãla vi ecelela oku pitako.
38 Ocipepi lolongunji violombundi, kua kala ohondo yimue yoku lilamo ya kuata uvelo umue, muna va enda oku sukuila ovilumba vioku pia elisi.+
39 Konele lonele yocindumba combundi, kua kala olomesa vivali kuna va enda oku pondela ovilumba viosi vioku pia elisi,+ ovilumba viekandu+ kuenda ovilumba vieko.+
40 Kosamua yoku iñilila kuombundi yo konano, kua kala olomesa vivali. Kua kalavo olomesa vivali konele yikuavo yocindumba combundi.
41 Kua kala olomesa vikuãla konele lonele yombundi okuti, vocosi via tẽla olomesa ecelãla kolonele viosi kuna va enda oku pondela ovilumba.
42 Olomesa vikuãla vioku eca ocilumba coku pia elisi, via kala viovawe a songiwa. Ovio via kuata ukeya umosi lomeyu vusõvi kuenda ukeya umosi lomeyu vupati lukeya umosi koku lepa. Kilu liaco, kua kapiwile ovikuata va enda oku talavaya lavio poku ponda ovilumba vioku pia elisi kuenda ovilumba vikuavo.
43 Olopatulela via soka lupati weka, via kapiwile kolonele viosi viovimano vio vokati; kuenda ositu yovilumba ya kapiwile kolomesa viaco.
44 Kosamua yombundi yo vokati kua kala olohondo vioku lilamo violonjimbi;+ ovio via kala vocitali co vokati ocipepi lombundi yo konano ya imba ovaso kombuelo. Ohondo yikuavo yoku lilamo ya kala ocipepi lombundi yo kutundilo ya imba ovaso konano.
45 Eye wa ndi sapuila hati: “Ohondo eyi yoku lilamo okuti ya imba ovaso kombuelo, yovitunda vina vi kuete ocikele coku linga ovopange vonembele.+
46 Ohondo yoku lilamo okuti ya imba ovaso konano, ya kala yovitunda vina vi kuete ocikele coku linga upange kutala.+ Ovo omãla va Sadoke+ vana va tunda pokati ka va Lewi okuti va nõliwa oco va amele ku Yehova oco vo vumbe.”+
47 Noke eye wa seteka ocitali co vokati. Oco ca kuata 100 kovikeya vusõvi kuenda vupati 100 kovikeya. Utala waco wa kala kovaso yonembele.
48 Noke eye wa ngambata vokati kocindumba conembele+ kuenda wa seteka onele yongunji yocindumba kuenje oyo ya kuata ovikeya vitãlo konele yimue kuenda ovikeya vitãlo konele yikuavo. Upati wombundi wa kala wovikeya vitatu konele yimue kuenda ovikeya vitatu konele yikuavo.
49 Ocindumba ca kuata 20 kovikeya vusõvi kuenda 11* kovikeya vupati. Omanu va ponduile oku pitĩlako poku londela kolosikata. Oko kua kala olongunji kovimbaka vio konele okuti, ongunji yimosi konele lonele.+
Atosi Pombuelo
^ Tala Alombo. B14.
^ Lit., “tiamisila utima wove.”
^ Lit., “onjo.” Ondaka eyi yi pongoluiwa okuti, “onembele” kovipama 40-48, nda onjo yi tiamisiwila konembele yinene ale koku tungiwa kuonembele yaco.
^ Lit., “oluneva lumosi luolonjongo epandu, onjongo yimosi kuenda upati weka.” Ci tiamisiwila konjongo ya lepa. Tala Alombo. B14.
^ Pamue yi tiamisiwila kolusoka luocimbaka cohondo yondavululi.
^ Ale “olonjanela violonepa vivali.”
^ Lit., “upati.”
^ Ale pamue, “12.”
