Esekiele 47:1-23
47 Eye wa ngambata vali puvelo wonembele+ kuenje nda muilako ovava a kala oku tunda vemẽhi liolukuki luonembele kuenda a kala oku enda konele yutundilo,+ momo onepa yo kovaso yonembele ya kala konele yutundilo. Ovava aco, a kala oku tunda vemẽhi lionele yondio yonembele, kombuelo yutala.
2 Eye wa ngambata kosamua konele yutundilo yombundi+ kuenda wa ngendisa posamua kuenje wa ndi ñualisa kosamua yombundi yi kasi kutundilo+ kuenda nda muĩlako ovava a kala oku tunda oku upisa konele yondio.
3 Eci ulume a tunda konele yutundilo lukolo umue woku seteka peka liaye,+ eye wa seteka eci ci soka 1.000 kovikeya* kuenda wa ndi pitisa vovava; kuenje ovava aco a pitĩla toke ketokekelo liakepa olomãhi.
4 Noke eye wa seteka vali 1.000 yovikeya kuenda wa ndi pitisa vovava kuenje ovava aco a pitĩla toke volongolo.
Eye wa seteka 1.000 yovikeya vikuavo kuenda wa ndi pitisa vovava kuenje ovava aco a pitĩla toke vombunda.
5 Eci a seteka vali 1.000 yovikeya o-o a linga olui lumue okuti sia tẽlele oku lu yoka, momo ovava aco a longele calua okuti ca sukilile oku liteva. Oluo lua kala olui lumue luovava okuti ka ca tavele oku lu yoka lovolu.
6 Eye wa ndi pula hati: “Eci wa ci mola a mõlomunu?”
Kuenje eye wa ngendisa kuenda nda tiukila kohulo yolui.
7 Eci nda tiuka, nda mola okuti kolohulo vivali violui kua kala oviti vialua.+
8 Noke eye wa ndi sapuila hati: “Ovava a-a, a suñamela konele yutundilo yofeka kuenda amamako oku lokila toke ko Araba*+ kuenda ovava aco a pesekela vokalunga. Eci a ka pesekela vokalunga,+ ovava aco a ka talala.
9 Ovinyama vialua vi ka tẽla oku kala apa ovava* a pita. Ku ka kala olõsi vialua, momo ovava aco, oko a ka pita. Ovava o vokalunga a ka talala kuenda kuosi olui lu pesila ku ka kala ovimuenyo.
10 “Vakuakupipa va ka kala kohulo yalio oku upisa ko Engedi+ toke ko Enengilayimi, kuna ku ka kala ocitumãlo cimue coku kukutisa awanda. Ku ka kala apata alua olõsi a sokisiwa lolõsi Viokalunga Kanene.*+
11 “Oko, ku ka kala ovitumãlo viovisave kuenda ovitumãlo viovisimo kuenda ovio ka vi ka talala. Omongua u kamamako oku kala kovitumãlo viaco.+
12 “Oviti viosi viapako,* a ka kulila kolohulo violui. Amẽla alio ka a kowuka; ndaño muẽle oku liwekapo oku ima apako. Osãi losãi ovio vi ka ima apako okaliye, momo ovava alio a tunda kocitumãlo ci kola.+ Apako alio a ka kala okulia kuenda amẽla alio a ka kala oku kayisa.”+
13 Ca popia Ñala Tõlo Yehova ceci hati: “Eci oco ocikanjo ene vu ka eca ndocipiñalo cofeka kueci ci soka 12 kovikoti via va Isareli kuenda Yosefe o ka kuata olonepa vivali.+
14 Ene vu ka yi piñala kuenda vu ka tambula olonepa* vimuamue. Ame nda lisinga oku eca ofeka eyi ku vakukululu yene+ kuenje cilo ya tepisiwa* kokuene ndocipiñalo.
15 “Eyi ongave yofeka konele yonano: Oyo yi tunda oku upisa Kokalunga Kanene yi pita konjila yo Hetilone+ oku enda ko Sedada,+
16 ko Hamati,+ ko Berotiai+ kuenda ko Sivirayi yi kasi pokati kovikanjo vio Damasko kuenda kovikanjo vio Hamati toke ko Hacare-Hatikone, yi kasi kongave yo Hawerana.+
17 Ongave yi ka tunda oku upisa kokalunga toke ko Hacare-Enana,+ ongave yi kasi ocipepi longave yo Damasko toke konele yonano kuenda kongave yo Hamati.+ Eyi oyo ongave yo konano.
18 “Onele yutundilo yi pita pokati ko Hawerana kuenda ko Damasko oku loña ko Yordão, yi kasi pokati ko Gileada+ kuenda ofeka yo Isareli. Ene vu sukila oku seteka ocinãla oku upisa kongave yokalunga* kutundilo. Eyi oyo ongave yo kutundilo.
19 “Ongave yo kombuelo* yi ka tunda oku upisa ko Tamare toke kovava o ko Merivoti-Kadesi,+ oku loña Kekango* toke Kokalunga Kanene.+ Eyi oyo ongave yo kombuelo.*
20 “Onele yutakelo, yi kasi Kokalunga Kanene oku upisa kongave toke kovaso yo Lebo-Hamati.*+ Eyi oyo ongave yonele yutakelo.”
21 “Ene vu sukila oku litepela ofeka eyi pokati kene, pokati kovikoti 12 via Isareli.
22 Ene vu sukila oku yi litepela ndocipiñalo pokati kene kuenda kovingendeleyi via tunga pokati kene okuti vi kuete omãla osimbu vi kasi pokati kene; kuenje ovo va ka kala ndolonyitiwe via va Isareli kokuene. Ovo va ka tambula ocipiñalo cimue kumue lene pokati kovikoti via Isareli.
23 Ene vu sukila oku eca kocingendeleyi ocipiñalo cimue vocikanjo cocikoti muna eye a tunga,” oco Ñala Tõlo Yehova a popia.
Atosi Pombuelo
^ Ci tiamisiwila kovikeya via lepa. Tala Alombo. B14.
^ Ale “etapi lio vekalasoko.”
^ Lit., “olondui vivali.”
^ Okuti, o Mediterraneo.
^ Lit., “viokulia.”
^ Lit., “oku yi piñala, omunu lomunu nda manjaye.”
^ Lit., “oku kupuka.”
^ Okuti, Okalunga ka ka Kuete Akimba.
^ Lit., “onele yombuelo oku loña kombuelo.”
^ Okuti, Ekango lio Kegito.
^ Lit., “onele yombuelo oku loña kombuelo.”
^ Ale “koku iñilila ko Hamati.”
