Esekiele 5:1-17
5 “Catiamẽla kokuove a mõlomunu, tikula osipata ya lepikiwa kuenda talavaya layo ndomoko yoku teta olonjele. Teta esinga kuenda olonjele viove, kuenje vi pesalisa kuenda vi tepa volonepa vitatu.
2 Eci oloneke viocingonja cove vi ka tẽlisiwa, o ka timĩhila onepa yimue yatatu vokati kolupale.+ Kuenje o ka tikula onepa yikuavo yatatu kuenda o ka yi nyõla losipata kolonepa viosi violupale+ kuenje onepa yatatu ya sulako o ka yi sanduila vofela, noke ndi ka pola osipata oco ndi va landule.+
3 “Tikulavo olofiyu vimue vionepa yatatu ya sulako kuenda vi muñila kasusu* uwalo wove.
4 Kuenje tikula vali onepa yimue yolofiyu viesinga kuenda vimba vondalu kuenje vi timĩha. Ondalu yaco, yi ka li sanduila konjo ya Isareli.+
5 “Ca popia Ñala Tõlo Yehova ceci hati: ‘Eci ci lomboloka o Yerusalãi. Nda yi kapa vokati kolofeka, lovaimbo osi a ñualeleko.
6 Pole, oyo ya sinĩla ovisila kuenda oviholo viange, poku lekisa evĩho lialua okuti, olofeka kuenda ovaimbo osi a ñualeleko ci sule.+ Momo ovo va likala ovisila viange kuenda ka va endelele voviholo viange.’
7 “Omo liaco, ca popia Ñala Tõlo Yehova ceci hati: ‘Omo wa sini calua okuti olofeka viosi via ku ñuali vi sule kuenda ka wa endeleli voviholo ale oku kapako ovisila viange, pole, wa kuami ovisila violofeka viosi via ku ñuali,+
8 eci oco Ñala Tõlo Yehova a popia hati: “Nda linga unyãli wove, ove Alupale+ kuenda ame muẽle ndi ka ku sombisa pokati kove kovaso yolofeka.+
9 Ndi ka ku lingila ocina cimue okuti, lalimue eteke nda ci lingile kuenda lalimue eteke ndi ka ci linga vali, omo liovilinga viove viosi via vĩha.+
10 “‘“Omo liaco, olonjali vi kasi pokati kove, vi ka lia omãla vavo+ kuenda omãla va ka lia olonjali viavo kuenje ndi ka nena esombiso pokati kove kuenda vosi va supapo, ndi ka va sanduila kolonele viosi.”’*+
11 “‘Omo liaco, ndeci ndi kasi lomuenyo,’ oco ca popia Ñala Tõlo Yehova, ‘omo okuti wa vĩhisa ocitumãlo cange ci kola, loviteka viove viosi via vĩha kuenda ovilinga viove viosi ka via sungulukile,+ ame ndi ka ku likalavo;* iso liange ka li ka kuata ohenda kuenda si ka lekisa ocikembe.+
12 Onepa yimue yatatu yene, yi ka fa lefengi* ale yi ka fa omo lionjala. Onepa yikuavo yatatu, yi ka fila kolonele viove viosi losipata.+ Kuenje ndi ka sanduila onepa yatatu ya sulako kolonele* viosi kuenda ndi ka pola osipata oco ndi yi landule.+
13 Kuenje onyeño yange yi ka sulila kuenda onyeño yange kokuavo yi ka tulumũha kuenda ndi ka sanjuka.+ Kuenje ovo va ka kũlĩha okuti ame ndi Yehova, nda ci popela omo liekisika liange okuti, omanu va fendela lika+ eci onyeño yange kokuavo yi tulumũha.
14 “‘Ndi ka ku lingisa ocitumãlo cimue ca nyõliwa kuenda ocikuata cesepu pokati kolofeka via ku ñuala kuenda kovaso yomanu vosi va pita ponele yove.+
15 Ove o ka kala ocikuata cesepu kuenda cepembulo,+ ongangu yimue yelungulo kuenda ocimãho cocinjoko kolofeka via ku ñuala, eci ndi ka nena esombiso kokuove lonyeño kuenda oku tema lekangiso lionyeño yalua. Ame ndi Yehova nda ci popia.
16 “‘Ndi ka tuma kokuavo ovisongo vi ponda vionjala oco vi va kundule. Ovisongo ndi ka tuma vi ka vu kokeli enyõleho.+ Ndi ka piãlisa onjala yene poku tetako olosila viene viokulia.*+
17 Ndi ka tuma kokuene onjala kuenda ovinyama via tema+ viovusenge kuenje ovio ka vi ka kusi lomãla vene. Efengi kuenda oku pesela osonde vi ka ku kokela usumba kuenje ndi ka nena osipata kokuove.+ Ame ndi Yehova nda ci popia.’”
Atosi Pombuelo
^ Ale “asaya.”
^ Lit., “kolofela viosi.”
^ Ale “oku tepulula.”
^ Ale “uvei.”
^ Lit., “kolofela viosi.”
^ Lit., “oku teya ombueti yombolo.” Citava okuti ci tiamisiwila kolombueti va enda oku pateka ombolo.
