Esekiele 8:1-18
8 Kunyamo wepandu, kosãi yepandu, keteke liatãlo liosãi, eci nda tumãlele vonjo yange kuenda akulu vo ko Yuda va tumãlele kovaso yange, eka lia Ñala Tõlo Yehova, lieya kokuange oku upisa kocitumãlo caco.
2 Osimbu nda kala oku vanja, nda mola cimue ca soka ndondalu; vemẽhi lieci ca molẽhele ndu okuti ombunda yaye,+ mua kala ondalu kuenje oku upisa kombunda yaye toke kilu, emolẽho liaye lia kala oku nina ndulu wa tengiwa lopalata.+
3 Noke eye wolõla eci ca kala ndeka kuenje wa ñuata kesinga liutue wange kuenda espiritu limue lia ndi tikula pokati kongongo lovailu kuenje lia ngambata ko Yerusalãi pocakati covinjonde via tunda ku Suku, toke koku iñilila kuombundi yo vokati+ ya imba ovaso konano, kuna kua kala ondimbukiso* yociteka cesepa cina ci vetiya esepa.+
4 Kuenje tala! ulamba wa Suku ya Isareli oko wa kala,+ owo wa lisoka lowu nda muĩle vocimbota co vetapi.+
5 Noke eye wa ndi sapuila hati: “A mõlomunu, linga ohenda petuila ovaso ove konele yonano.” Noke nda petuila ovaso ange konele yonano kuenda oko, okuti konano yombundi yutala, kua kala ondimbukiso* yesepa.
6 Kuenda eye wa ndi sapuila hati: “A mõlomunu, o lete hẽ ovina evi via vĩha haivio viumbondo onjo ya Isareli yi kasi oku linga,+ ovina vi ndi vetiya oku enda ocipãla locitumãlo cange ci kola?+ Pole, ove o ka mola ovina viumbondo okuti via vĩhapo vali calua.”
7 Noke eye wa ndi nena toke puvelo wocitali kuenje eci nda vanja, nda mola epangu limue vocimano.
8 Eye wa ndi sapuila hati: “A mõlomunu, linga ohenda vokiya epangu li kasi vocimano.” Kuenje nda vokiya epangu vocimano kuenda nda mola uvelo umue.
9 Eye wa ndi sapuila hati: “Iñila kuenda tala ovina vĩvi haivio ka via sungulukile vi kasi oku lingiwamo.”
10 Omo liaco, nda iñila kuenje nda vanja kuenda nda mola oviluvialuvia vioviñumañuma viovinyama viosi vi likoka posi lovinyama via vĩha+ kuenda oviteka* viosi via vĩha vionjo ya Isareli;+ ovio via sokotuiwa kolonele viosi viocimano.
11 Kuenje kovaso yavio, kua kala 70 kakulu vonjo ya Isareli, pokati kavo pa kala Yasaniya omõla a Siafane.+ Omunu lomunu wa kuata ociyukilo caye peka liaye kuenda elende lionguendu linsensu yelemba liwa, lia kala oku lamana.+
12 Eye wa ndi sapuila hati: “A mõlomunu, o lete hẽ eci akulu vo vonjo ya Isareli va kasi oku linga vowelema okuti, omunu lomunu vohondo yaye yo vokati muna oviteka viaye vi lekisiwa? Momo ovo va kasi oku popia vati: ‘Yehova ka tu lete. Yehova wa yanduluka ofeka.’”+
13 Eye wamisako loku ndi sapuila hati: “Ove o ka mola ovina viumbondo vina via vĩhapo vali calua ovo va kasi oku linga.”
14 Omo liaco, eye wa ngambata toke puvelo wombundi yo konano yonjo ya Yehova kuenje nda mola akãi va tumãla kuenda va kala oku lila omo lia suku yavo Tamusi.
15 Kuenje eye wamisako loku ndi sapuila hati: “A mõlomunu, o lete hẽ eci? Ove o ka mola ovina viumbondo via vĩhapo vali calua okuti, evi vi sule.”+
16 Noke eye wa ngambata vocitali co vokati conjo ya Yehova.+ Puvelo wonembele ya Yehova pokati kocindumba lutala, pa kala 25 kalume va imba onyima konembele ya Yehova kuenda ovipala viavo via imba ovaso kutundilo; ovo va kala oku kekamẽla ekumbi konele yutundilo.+
17 Eye wa ndi sapuila hati: “A mõlomunu, o lete hẽ eci? Ka ci tẽla hẽ konjo ya Yuda oku linga ovina evi vĩvi loku yukisa ofeka lungangala+ kuenda oku amamako oku ndingila ovina vĩvi? Ovo va nyanyumuĩla ocanja* kenyulu liange.
18 Omo liaco, ndi ka lekisa onyeño. Iso liange ka li ka kuata ohenda; kuenda si ka lekisa ocikembe.+ Ndaño okuti va kalukila lolukandi vovatũi ange, si ka va yeva.”+
Atosi Pombuelo
^ Ale “ociluvialuvia.”
^ Ale “ociluvialuvia.”
^ Ondaka yaco kelimi lio Heveru citava okuti, yi tiamisiwila kondaka “aniña” kuenda ya enda oku tukuiwavo ndondaka yoku nyehũla.
^ Pamue yi tiamisiwila kocanja cimue coku fendela oviteka.
