Esekiele 9:1-11
9 Eye wa vilikiya lolukandi vatũi ange hati: “Kovonga vosi vana va ka nena ekangiso volupale, omunu lomunu locimalẽho caye coku ponda peka liaye!”
2 Nda mola alume epandu va kala oku tunda konele yombundi ya velapo+ ya imba ovaso konano, omunu lomunu pokati kavo locimalẽho caye coku ponda peka; kuenje pokati kavo pa kala umue wa wala uwalo wovalatanya locikuata cimue ci kuete otinda vombunda yaye kuenje ovo veya kuenda va talama ocipepi lutala wosipi.+
3 Kuenje ulamba wa Suku ya Isareli,+ wa tunda apa wa kala kilu lia va keruvi kuenda wa enda toke kolukuki wuvelo wonembele+ kuenje eye wa fetika oku vilikiya ulume wa wala uwalo wovalatanya locikuata cimue ci kuete otinda vombunda yaye.
4 Yehova wo sapuila hati: “Kuende volupale, pita vo Yerusalãi kuenda kapa ondimbukiso kovipolo vialume vana va kasi oku lisiõsiõla loku leña leña,+ omo liovina viosi vĩvi vi kasi oku lingiwa volupale.”+
5 Noke wa sapuila vakuavo kuenje nda yeva eci a popia hati: “Kuendi volupale konyima yaye kuenda pondi omanu. Iso liene ka li ka kuate ohenda ndaño oku lekisa ocikembe.+
6 Vu sukila oku ponda alume va kuka, amalẽhe alume, afeko vosombo, omãla vatito kuenda akãi.+ Pole, ka citava oku ponda omunu laumue o kuete ondimbukiso.+ Vu sukila oku fetikila vocitumãlo cange ci kola.”+ Omo liaco, ovo va fetikila kakulu va kala kovaso yonjo.+
7 Kuenje eye wa va sapuila hati: “Vĩhisi onjo kuenda yukisi ovitali viaco lovivimbi.+ Kuendi!” Noke, ovo va enda kuenda va fetika oku ponda omanu vo volupale.
8 Osimbu ovo va kala oku ponda, ame lika nda supapo kuenje nda petamisa ocipala cange posi loku kaluka siti: “Avoyo we! A Ñala Tõlo Yehova! Anga hẽ o kundula vosi vana va supa ko Isareli poku lekisa onyeño yove vo Yerusalãi?”+
9 Kuenje eye wa nambulula hati: “Ekandu lionjo ya Isareli kuenda lionjo ya Yuda lialua, lialua enene.+ Ofeka yeyuka loku pesiwa kuosonde+ kuenda yeyuka ovitukiko.+ Momo ovo va popia vati: ‘Yehova wa yanduluka ofeka kuenda Yehova ka ci lete.’+
10 Catiamẽla kokuange, iso liange ka li ka kuata ohenda; kuenda si ka lekisa ocikembe.+ Ndi ka lingisa okuti ovitangi viovilinga viavo, vi ka kupukila kovitue viavo muẽle.”
11 Noke nda mola ulume wa wala uwalo wovalatanya locikuata cimue ci kuete otinda vombunda yaye okuti, wa kala oku tiuka loku popia hati: “Nda linga ndomo wa ndi handeleka.”
