Ku Filemone 1:1-25
1 Ame ndi Paulu. Ndimandekua+ mekonda lia Kristu Yesu kuenda manjetu Timoteo,+ ñasi oku ku sonehela ukanda owu a Filemone, ekamba lietu liupange haive wa soliwa,
2 kuenda Afia manjetu ukãi la Arkipo okuti,+ esualali lia Kristu kumue letu kuenda ekongelo li liongoluila konjo yove:+
3 Ohenda ya piãla lombembua vi tunda ku Suku Isietu kuenda ku Ñala Yesu Kristu vi kale lene.
4 Olonjanja viosi ndi pandula Suku yange eci ndu ku tukula volohutililo viange,+
5 osimbu ndamamako oku yeva catiamẽla kekolelo liove locisola o kuetele Ñala Yesu kuenda olosandu viosi.
6 Ndi likutilila okuti ekolelo o lekisa, liu ku vetiya oku kũlĩha ovina viosi viwa tu kuete pocakati ca Kristu.
7 Nda yeva esanju lialua kuenda elembeleko poku yeva catiamẽla kocisola cove, momo ovitima* violosandu via kavuluisiwa mekonda liove wumanji.
8 Eli olio esunga lieci okuti, ndaño ñuete utõi woku vangula mekonda lia Kristu loku ku handeleka oco o linge eci ca sunguluka,
9 ndi nõlapo oku ku livondela locisola, momo ame ndi Paulu nda kuka, haime ndi mandekua mekonda lia Kristu Yesu.
10 Ndu ku livondela omo liomõlange Onesimo+ una okuti, nda linga isiaye+ osimbu nda kala vokayike.*
11 Tete eye ka kuatele esilivilo kokuove, pole, cilo o kuete esilivilo kokuove kuenda kokuange.
12 Ñasi oku tiula Onesimo kokuove, ocili eye una ndi sole calua.
13 Nda yonguile okuti, eye amamako oku kala kulo lame okuti, o ñuatisa pomangu yove osimbu ndi kasi vokayike omo liolondaka viwa.+
14 Pole, si yongola oku linga cimue nda ove ku ci tava oco okuti, elinga liove liwa ka li lingiwa locikukũi, te lutima wosi.+
15 Pamue eli olio esunga lieci eye a litepela kokuove okatembo kamue* okuti, o tiuka vali kokuove otembo ka yi pui,
16 eye ka kala lika ndupika,+ pole, o lingavo nda manjove, nda manjove wa soliwa,+ ca piãla enene kokuange, puãi ca velapo vali kokuove omo eye o linga manjove vetimba kuenda kupange wa Ñala.
17 Kuenje nda okuti ove o ndi tenda ndekamba,* u tambula locisola ndeci nda wa linga lame.
18 Puãi nda wa ku linga cimue cĩvi, ale wa ku levala cimue, ndi ci feta.
19 Ame ndi Paulu, ñasi oku soneha leka liange muẽle: Ndi ci feta, si sukila oku ku ci sapuila okuti ove wa ndi levala omuenyo wove muẽle.
20 Ocili, a manjange ndi sesamẽla oku tambula ekuatiso eli kokuove mekonda lia Ñala; kavuluisa utima wange* mekonda lia Kristu.
21 Nda kolela okuti, o ka linga eci nda pinga, eli olio esunga lieci nda ku sonehelela, momo nda kũlĩha okuti o ka linga eci ca velapo okuti, eci ñasi loku popia ci sule.
22 Handi vali, ndi pongiyilevo ocitumãlo coku kala, momo nda kolela okuti, omo liolohutililo viene ndi tiuka vali kokuene.*+
23 Epafra wa ku tumisa ovilamo,+ ekamba liange liumandekua vomunga kumue la Kristu Yesu,
24 la Marko, Aristarko,+ Dema+ kuenda Luka+ akamba vange vupange.
25 Ohenda ya piãla ya Ñala Yesu Kristu, yi kale lespiritu vu lekisa.
Atosi Pombuelo
^ Ale “ocikembe.”
^ Lit., “kovikolo.”
^ Lit., “owola yimosi.”
^ Lit., “oñuatisi.”
^ Ale “ocikembe.”
^ Ale “oku yovuiwa omo liene.”
