Isaya 19:1-25
19 Esapulo limue lioku katukila o Egito+ liokuti:
Tali! Yehova o kasi oku endela velende limue li lupuka kuenda eye o kasi oku iñila Vegito.
Olosuku vina ka vi kuete esilivilo vio ko Egito vi ka lulumĩla kovaso aye,+Kuenda ovitima viomanu vo ko Egito vi ka kuata usumba walua.
2 “Ndi ka lingisa okuti, va Egito va katukila va Egito,Kuenda ovo va ka liyaka pokati,Omunu lomunu o katukila manjaye kuenda una a lisungue laye,Olupale lu katukila olupale, usoma u katukila usoma.
3 O Egito yi ka kuata usumba vokati kayo,Kuenda ndi ka tatamisa asokiyo avo.+
Ovo va ka lupukila kolosuku ka vi kuete esilivilo,Kovimbanda, ku vakuakuvangula lolondele kuenda ku vakuakutãha.+
4 Ndi ka eca o Egito ku cime umue ongangala,Kuenda osoma yimue ka yi kuete ohenda yi ka va viala,”+ oco ca popia Ñala yocili, Yehova ukualohoka.
5 Ovava o vokalunga a ka takata,Kuenda olui lu ka tepuluka kuenje lu ka kukuta+
6 Olondui vi ka lẽha lavĩ;Olono vio Nilu yo Egito, vi ka tepuluka loku kotoka.
Olondeya kuenda asisa vi ka vola.+
7 Ovikũla vi kasi kohulo Yolui Nilu, pasango o Nilu,Kuenda osi yosi ya limiwa kohulo yo Nilu+ yi ka kukuta.+
Cosi ci kambatiwa lofela kuenda ka ci ka kalako vali.
8 Kuenje vakuakupipa va ka sumua,Vana va kasi oku imba olonjolo vo Nilu va ka lisiõsiõla,Kuenda vana va imba awanda avo vovava va ka tepuluka.
9 Vana va panga olonanga lelinyu+La vakuakupota olonanga vi yela, va ka kutisiwa osõi.
10 Va Egito vakuakututa va ka nyanyuiwa;Olonalavayi viosi vi fetiwa, vi ka sakalala.
11 Olombuale vio ko Coana+ aveke.
Olondunguli via Fareo vina vi kuetepo vali olondunge, vi eca elungulo ka lia sungulukile.+
Vu pondola oku popia ndati ku Fareo hati:
“Ndicitumbulukila ca vakualondunge,Ocitumbulukila cimue colosoma vio kosimbu”?
12 Oco hẽ, alume vove vakualondunge va kasi pi?+
Ecelela okuti, va ku sapuila nda ovo va kũlĩha eci Yehova ukualohoka a nõlapo oku linga lo Egito.
13 Olombuale vio ko Coana via lekisa uveke;Olombuale vio ko Nofe*+ via kembiwa;Asongui vovikoti viavo va yapuisa o Egito.
14 Yehova wa kapa Vegito espiritu limue liombuanja;+Kuenda asongui vavo va yapuisa o Egito kovina viosi oyo yi linga,Ndeci oholua yimue yi li tiñolola volosanjo viaye.
15 Kuenje ka ku ka kala cimue o Egito yi pondola oku linga,Ci kaile utue ale ucĩla, ocanja ale asisa.*
16 Keteke liaco, va Egito va ka kala ndakãi, va ka luluma kuenda va ka kuata usumba omo lieka li koka usumba lina Yehova ukualohoka a katuila kokuavo.+
17 Ofeka yo Yuda yi ka yokokisa o Egito. Eci va Egito va ka yeva ovina viatiamẽla kokuayo, ovo va ka kuata usumba omo lionjila Yehova ukualohoka a nõlapo oku linga kokuavo.+
18 Keteke liaco, ku ka kala alupale atãlo kofeka Yegito a ka vangula elimi lia va Kanana+ kuenda va ka lisinga oku kala vakuacili ku Yehova ukualohoka. Pokati kalupale aco, lumue lu ka tukuiwa okuti, Olupale Luekundu.
19 Keteke liaco, ku ka kala utala umue wa Yehova vokati kofeka Yegito kuenda ongunji yimue ya Yehova kongave yocikanjo caco.
20 Owo u ka kala ndondimbukiso kuenda nduvangi watiamẽla ku Yehova ukualohoka vofeka Yegito; momo ovo va ka kalukila Yehova omo lia vakuakutalisa ohali kuenje eye o ka tuma onjovoli yimue yinene, yina yi ka va popela.
21 Kuenje Yehova o ka kũlĩhĩwa la va Egito kuenda va Egito va ka kũlĩha Yehova keteke liaco, ovo va ka eca ovilumba kuenda olombanjaile, va ka linga ocisila cimue ku Yehova loku ci tẽlisa.
22 Yehova o ka yambula o Egito,+ o ka yi yambula loku yi sakula; kuenje ovo va ka tiuka ku Yehova kuenda eye o ka tambulula apingilo avo loku va sakula.
23 Keteke liaco, ku ka kala onjila+ yi ka tunda Kegito oku loña ko Asuria. Kuenje va Asuria va ka enda Kegito kuenda va Egito va ka enda ko Asuria, va Egito va ka vumba Suku kumue la va Asuria.
24 Keteke liaco, Isareli o ka kala watatu kumue lo Egito kuenda lo Asuria,+ esumũlũho limue kilu lieve,
25 momo Yehova ukualohoka o ko sumũlũisa loku popia hati: “Va sumũlũha omanu vange, o Egito kuenda upange wovaka ange, o Asuria kuenda ocipiñalo cange, o Isareli.”+
