Olonganji 1:1-36
1 Noke yolofa via Yehosua,+ va Isareli* va kũlĩhĩsa Yehova+ vati: “Helie pokati ketu o lamana tete oco a ka liyake la va Kanana?”
2 Yehova wa tambulula hati: “Yuda eye o lamana.+ Tali! Ndi kasi oku eca* ofeka peka liaye.”
3 Kuenje Yuda wa sapuila manjaye Simeone hati: “Lamanela kumue lame kocikanjo*+ cange va ndi ilikila, oco tu ka liyake la va Kanana. Noke ngenda love kocikanjo cove va ku ilikila.” Omo liaco, Simeone wa enda kumue laye.
4 Eci Yuda a lamana, Yehova wa eca va Kanana la va Perisi povaka avo+ kuenda ovo va yula 10.000 kalume ko Beseke.
5 Ovo va sanga Adoni-Beseke ko Beseke yu va liyaka laye kuenje va yula va Kanana+ kumue la va Perisi.+
6 Eci Adoni-Beseke a tila, ovo vo landula kuenje vo kuata loku u teta ovimuine vinene vio kovoko levi vio kovolu.
7 Noke Adoni-Beseke wa popia hati: “Kuli 70 kolosoma via tetiwa ovimuine vinene vio kovoko kuenda vio kovolu kuenje va kasi oku nõla okulia vemẽhi liomesa yange. Ndeci ame nda linga haico Suku a ndi fetuluinya.” Noke liovina viaco, vo nena ko Yerusalãi+ kuenda oko a fila.
8 Handi vali, alume va Yuda va liyaka lo Yerusalãi+ kuenje va yi tambula; ovo va yi kundula losipata kuenda va timĩha olupale londalu.
9 Noke alume va Yuda va loka oco va yake la va Kanana vana va kala kovaimbo a kasi kolomunda kuenda ko Negeve lo ko Sefela.+
10 Kuenje Yuda wa enda ku va Kanana vana va kala ko Hevirone (kosimbu, onduko yo Hevirone ya kũlĩhĩwile okuti, Kiriyata-Ariba) kuenje va ponda Sesai, Ahimana kuenda Talimai.+
11 Oku tundako va enda oku ka liyaka lolonungi vio ko Deviri.+ (Kosimbu onduko yo Deviri ya tukuiwile okuti, o Kiriyata-Sefere.)+
12 Noke Kalembe+ wa popia hati: “Ulume wosi o kundula o Kiriyata-Sefere loku yi tambula, ngeca kokuaye omõlange ukãi Akisa oco a linge ukãi waye.”+
13 Kuenje Otiniyele+ omõla a Kenasi+ manji umalẽhe wa Kalembe, wa yi tambula. Omo liaco, wo wĩha omõlaye ukãi Akisa oco a linge ukãi waye.
14 Osimbu Akisa a kala oku enda konjo yulume waye, wa lipilikila ulume waye Otiniyele oco a pinge epia limue ku isiaye. Kuenje Akisa wa loka kocimbulu* caye. Kalembe wo pula hati: “Nye o yongola?”
15 Akisa wa tambulula hati: “Mange ohenda, nyĩhe esumũlũho limue, momo wa nyĩha onepa yimue yofeka kombuelo;* nyĩhevo o Guloti-Mayima.”* Omo liaco, Kalembe wa eca kokuaye o Guloti yo Konano kuenda o Guloti yo Kombuelo.
16 Kuenje ovitumbulukila via Keni,+ ndatembo+ ya Mose, via lamana oku upisa kolupale luoviti vieva+ kumue lomanu vo Yuda toke vekalasoko lio Yuda kombuelo yo Arade.+ Ovo va endako kuenda va tunga pokati komanu.+
17 Pole, Yuda wa enda kumue la manjaye Simeone kuenje va katukila va Kanana vana va kala ko Cefata kuenda va yi kundula.+ Omo liaco, ovo va luka olupale luaco hati, o Horima.*+
18 Noke Yuda wa tambula o Gasa+ kumue locikanjo caco lo Asikelone+ kumue locikanjo caco kuenda o Ekirone+ kumue locikanjo caco.
19 Yehova wa kala la Yuda kuenje ovo va tambula ovaimbo a kasi kolomunda, pole, ka va tẽlele oku tundisa olonungi vio ketapi,* momo ovio via kuatele akãlu wuyaki kumue lakãlu utale.+
20 Ovo va eca o Hevirone ku Kalembe ndomo Mose a likuminyile+ kuenje eye wa tundisamo omãla vatatu va Anaki.+
21 Pole, va Benjamini ka va tundisile va Yevusi vana va kala ko Yerusalãi, omo liaco, va Yevusi vamamako oku tunga kumue la va Benjamini vo Yerusalãi toke etaili.+
22 Vokuenda kuotembo yaco, ovitumbulukila via Yosefe+ via lamanela ko Betele kuenda Yehova wa kala kumue lavo.+
23 Ovitumbulukila via Yosefe via kala oku kũlĩhĩsa o Betele (kosimbu onduko yolupale ya kala o Lusi),+
24 kuenje olondavululi via mola ulume umue wa kala oku tunda volupale. Omo liaco, ovo va popia laye vati: “Linga ohenda, tu lekise onjila yoku iñila volupale kuenda tu ku tata lohenda.”*
25 Omo liaco, ulume wa va lekisa onjila yoku iñila volupale kuenje ovo va kundula olupale losipata, pole, va popela ulume waco kumue lepata liaye liosi.+
26 Ulume wa enda kofeka ya va Hiti kuenda wa tunga olupale lumue kuenje wa lu luka hati, o Lusi okuti oyo onduko yaco toke etaili.
27 Manase ka tambuile o Bete-Siane kumue lalupale a sungueko, o Taanake+ kumue lalupale a sungueko, olonungi vio ko Dori kumue lalupale a sungueko, olonungi vio ko Yivileama kumue lalupale a sungueko kuenda olonungi vio ko Megido kumue lalupale a sungueko.+ Va Kanana vamamako oku tunga vofeka yaco.
28 Eci o Isareli ya fetika oku pama, ovo va kisika va Kanana oku linga upange wa tĩla,+ pole, ovo ka va va tundisile vosi.+
29 Efarimi ka tundisilevo va Kanana vana va kala ko Gesere. Va Kanana vamamako oku tunga pokati kavo ko Gesere.+
30 Sevulono ka tundisile olonungi vio ko Kitirone lolonungi vio ko Nahalole.+ Va Kanana vamamako oku tunga pokati kavo kuenda va kisikiwa oku linga upange wa tĩla.+
31 Asiyere ka tundisile olonungi vio ko Ako lolonungi vio ko Sidono,+ vio ko Ahilava, vio ko Akisivi,+ vio ko Heliba, vio ko Afiki+ levi vio ko Rehove.+
32 Omo liaco, va Asiyere vamamako oku tunga pokati ka va Kanana vana va kala vofeka, momo ovo ka va va tundisile.
33 Nafitali ka tundisile olonungi vio ko Bete-Siemese lolonungi vio ko Betanate,+ pole, ovo vamamako oku tunga pokati ka va Kanana vana va kala vofeka.+ Olonungi vio ko Bete-Siemese lolonungi vio ko Betanate va linga vakuakulinga upange wa tĩla kokuavo.
34 Va Amori ka va ecelele okuti, omãla va Dani va lokila ketapi,* pole, va va kisika oku kala kovaimbo a kasi kolomunda.+
35 Va Amori vamamako oku tunga Komunda Heresi, ko Ayalone+ kuenda ko Sialabime.+ Pole, unene* wovitumbulukila via Yosefe wa livokiya* kuenje ovo va kisikiwa oku linga upange wa tĩla.
36 Ocikanjo ca va Amori ca kala oku upisa konjila yi lamanela ko Akirabi,+ oku upisa ko Sela koku lamanela.
Atosi Pombuelo
^ Lit., “omãla va Isareli.”
^ Ale “nda eca.”
^ Lit., “kocela cange.”
^ Ale pamue, “eye wa pandula osimbu a kala kocimbulu.”
^ Ale “o Negeve.”
^ Ci lomboloka “Olombasiya (Atiyela) Ovava.”
^ Ci lomboloka, “Ca Nõliwila oku Nyõliwa.”
^ Ale “etapi lia vomba.”
^ Lit., “tu lekisa kokuove ocisola ka ci pongoloka.”
^ Ale “etapi lia vomba.”
^ Lit., “eka.”
^ Lit., “lia lema.”
