Olonganji 10:1-18
10 Noke yotembo ya Avimeleke, ulume umue u Isakare o tukuiwa hati Tola, okuti omõla a Puwa omõla a Dodo, wa katuka oco a popele o Isareli.+ Eye wa kala ko Siamiri kovaimbo a kasi kolomunda via Efarimi.
2 Eye wa linga onganji yo Isareli vokuenda kueci ci soka 23 kanyamo. Kuenje wa fa kuenda wa kendiwa ko Siamiri.
3 Noke liaye, Yairi u Gileada wa katuka kuenda wa linga onganji yo Isareli vokuenda kueci ci soka 22 kanyamo.
4 Eye wa kuata 30 komãla valume vana va enda oku endela kovimbulu vi soka 30 kuenda va kuata 30 kalupale ana okuti toke etaili a tukuiwa hati, Hawote-Yairi;+ alupale aco a kasi vofeka yo Gileada.
5 Noke liovina viaco, Yairi wa fa kuenje wa kendiwa ko Kamone.
6 Va Isareli va linga vali eci cĩvi kovaso a Yehova+ kuenda va fetika oku vumba va Baale,+ oviñumañuma via Asitorete, olosuku via Arama,* olosuku via Sidono, olosuku via Moavi,+ olosuku via va Amoni+ kuenda olosuku via va Filisiti.+ Ovo va siapo Yehova kuenda ka vo vumbile.
7 Kuenje onyeño ya Yehova ya wengukila o Isareli kuenda eye wa va landisa povaka a va Filisiti kuenda a va Amoni.+
8 Omo liaco, ovo va lambalala kuenda va talisa ohali yalua va Isareli kunyamo waco. Vokuenda kueci ci soka 18 kanyamo, ovo va talisa ohali va Isareli vosi kesinya lio Yordão yina ya kala ofeka ya va Amori ko Gileada.
9 Va Amoni va endavo oku yoka o Yordão oco va liyake la Yuda kuenda la Benjamini lonjo ya Efarimi; kuenje o Isareli ya kuatele esumuo lialua.
10 Noke va Isareli va pinga ekuatiso+ ku Yehova vati: “Tua ku lingila ekandu momo tua siapo Suku yetu kuenda tua vumba va Baale.”+
11 Pole, Yehova wa sapuila va Isareli hati: “Ame sia ku popeleli hẽ povaka a va Egito+ kuenda a va Amori,+ a va Amoni, a va Filisiti+
12 a va Sidono, a Amaleke kuenda o Midiane eci ovo vo talisi ohali? Eci ene wa ndi kalukili ame nda ku popeli peka liavo.
13 Pole, ene wa ndi sipo kuenda wa vumbi olosuku vikuavo.+ Eli olio esunga lieci okuti si vu popeli vali.+
14 Kuendi kolosuku vina ene wa nõli kuenda pingi ekuatiso kokuavio.+ Vi ku popeli kotembo yene yohali.”+
15 Pole, va Isareli va popia la Yehova vati: “Tua linga ekandu. Linga letu eci ca sunguluka kovaso ove. Pole, linga ohenda, tu popele ño keteke lietaili.”
16 Kuenje ovo va tundisa pokati kavo olosuku viñi kuenda va vumba Yehova,+ omo liaco eye ka tẽlele vali oku likandangiya* poku mola ohali yo Isareli.+
17 Vokuenda kuotembo, va Amoni+ va kovongiwa kuenda va tunga ocilombo ko Gileada. Omo liaco, va Isareli va liongoluila pamosi kuenda va tunga ocilombo ko Misipa.
18 Omanu kuenda olombuale vio Gileada via sapuila omunu lukuavo vati: “Helie o tu songuila poku liyaka la va Amoni?+ Eye a linge usongui wolonungi viosi vio Gileada.”
