Olonganji 11:1-40
11 Yefita+ u Gileada wa kala esualali limue lia pama; eye wa kala omõla wukãi umue ocipuepue kuenda Gileada eye wa kala isia ya Yefita.
2 Pole, ukãi wa Gileada wo citilavo omãla. Eci omãla vukãi waye va kula, va lupuisa Yefita kuenda vo sapuila hati: “Ove ku ka kuata ocipiñalo konjo ya isietu momo, ove wumõla wukãi ukuavo.”
3 Omo liaco, Yefita wa tila vamanjaye kuenda wa tungila kofeka yo Tova. Kuenje alume vakuawesi va likongela la Yefita kuenda vo kuama.
4 Noke yotembo yimue, va Amoni va liyaka lo Isareli.+
5 Kuenje eci va Amoni va liyaka lo Isareli, vepuluvi liaco akulu vo Gileada va enda oco va kope Yefita kofeka yo Tova.
6 Ovo va sapuila Yefita vati: “Enju kuenda linga kesongo ketu oco tu tẽle oku liyaka la va Amoni.”
7 Pole, Yefita wa sapuila akulu vo Gileada hati: “Haneko hẽ wa ndi suvuki calua toke eci wa ndi tundisi konjo ya isiange?+ Momo lie wiyilili kokuange cilo okuti, vu kasi lesakalalo?”
8 Omo liaco, akulu vo Gileada va sapuila Yefita vati: “Eli olio esunga lieci tua tiukila kokuove. Nda ove wa enda letu loku liyaka la va Amoni, o linga usongui wetu, kolonungi viosi vio Gileada.”+
9 Kuenje Yefita wa sapuila akulu vo Gileada hati: “Nda ene wa ngambati oco ndi liyake la va Amoni kuenda Yehova o va kundula vonduko yange, ame ndi kala usongui wene!”
10 Akulu vo Gileada va sapuila Yefita vati: “Yehova a kale ombangi* pokati ketu nda ka tua lingile ndomo ove wa popia.”
11 Omo liaco, Yefita wa enda kumue lakulu vo ko Gileada kuenje omanu vo lingisa usongui kuenda kesongo kavo. Noke Yefita wa pitulula olondaka viaye viosi kovaso a Yehova ko Misipa.+
12 Kuenje Yefita wa tuma olomunga ku soma ya va Amoni+ hati: “O kueteko nye lame* okuti wiya oku katukila ofeka yange?”
13 Kuenje soma ya va Amoni wa sapuila olomunga via Yefita hati: “Ndi ci lingila omo okuti, o Isareli ya tambula ofeka yange eci ovo va tunda Kegito,+ oku upisa ko Arinone+ toke ko Yavoke kuenda toke ko Yordão.+ Kaliye, yi tiula lombembua.”
14 Pole, Yefita wa tuma vali olomunga ku soma ya va Amoni,
15 oco vo sapuile viti:
“Ca popia Yefita ceci hati: ‘Isareli ka tambuile ofeka ya va Moavi+ lofeka ya va Amoni,+
16 momo eci ovo va tunda Kegito, Isareli wa pita vekalasoko toke Kokalunga Kakusuka+ kuenda veya toke ko Kadesi.+
17 Noke Isareli wa tuma olomunga ku soma yo Edome+ hati: “Linga ohenda tu ecelele oku pita vofeka yove,” pole, soma yo Edome ka yevelile. Handi vali, ku soma yo Moavi+ ovo va tumisa ondaka, pole, eye ka tavele. Omo liaco, Isareli wamamako oku kala ko Kadesi.+
18 Eci ovo va pita vekalasoko va likonda vofeka yo Edome+ lofeka yo Moavi. Ovo va linga ungende poku pita kutundilo wofeka yo Moavi+ kuenje va tunga ocilombo vofeka yo Arinone; ovo ka va iñilile vokati kongave yo Moavi+ momo o Arinone ya kala ongave yo Moavi.
19 “‘Noke liovina viaco, Isareli wa tuma olomunga ku Sihoni soma ya va Amori, soma yo Hesibone kuenda Isareli wo sapuila hati: “Linga ohenda tu ecelele oku pita vofeka yove oco tu ende kocitumãlo cetu muẽle.”+
20 Pole, Sihoni ka kolelele Isareli kuenda ka ecelele okuti, o yokela kocikanjo caye, omo liaco, Sihoni wongoluila pamosi omanu vaye vosi kuenda wa tunga ocilombo ko Yahaca kuenje wa liyaka la Isareli.+
21 Omo liovina viaco, Yehova Suku ya Isareli wa eca Sihoni kumue lomanu vaye vosi peka lia Isareli kuenje ovo va va kundula kuenda Isareli wa piñala ofeka yosi ya va Amori, haivo olonungi viofeka yaco.+
22 Noke ovo va piñala ovikanjo viosi via va Amori oku upisa ko Arinone toke ko Yavoke kuenda oku upisa kekalasoko toke ko Yordão.+
23 “‘Yehova Suku ya Isareli eye wa tundisa va Amori kovaso yomanu vaye okuti o Isareli,+ pole, cilo ove o yongola oku va tundisa?
24 Anga hẽ ku piñala ovina viosi suku yove Kemosi+ a ku ĩha? Omo liaco, omunu wosi una Yehova Suku yetu a tundisa kovaso yetu, eye tu tundisa.+
25 Anga hẽ ove wa velapo okuti, Balaka+ omõla a Sipore soma yo Moavi o sule? Anga hẽ eteke limue eye wa likatanga la Isareli ale oku liyaka lavo?
26 Osimbu Isareli a kala ko Hesibone kumue lalupale a sungueko+ lo ko Aroere kumue lalupale a sungueko lo kalupale osi ana okuti a kasi kolonele vio Arinone vokuenda kueci ci soka 300 kanyamo, momo lie ene lalimue eteke wa setekeli oku a tambula vokuenda kuotembo yaco?+
27 Ame sia ku lueyelele, pole, ove wa lueya omo lioku ndi katukila. Yehova onganji,+ a linge onganji pokati komanu va Isareli lomanu va Amoni.’”
28 Pole, soma ya va Amoni ka yevele kesapulo lina Yefita a tumĩle kokuaye.
29 Espiritu lia Yehova lia wila Yefita+ kuenje eye wa pita ko Gileada lo ko Manase oco a ende ko Misipa yo Gileada+ kuenje oku upisa ko Misipa yo Gileada wamako toke ku va Amoni.
30 Noke Yefita wa linga ohuminyo yimue+ ku Yehova kuenje wa popia hati: “Nda wa eca va Amoni peka liange,
31 wosi o tunda kepito lionjo yange oku ñualẽhela lame eci ame ndi tiuka lombembua ku va Amoni, o linga wa Yehova+ kuenda ndu weca ndocilumba coku pia elisi.”+
32 Omo liaco, Yefita wa enda oku ka liyaka la va Amoni kuenda Yehova wa va eca peka liaye.
33 Eye wa va katukila poku va nenela ekundu limue linene oku upisa ko Aroere toke ko Miniti okuti, 20 kalupale kuenda toke ko Abelikerami. Omo liaco, va Amoni va yuliwa kovaso a va Isareli.
34 Oku sulako Yefita weya konjo yaye ko Misipa+ kuenje tala! Omõlaye ufeko wa kala oku iya oku lisanga laye kuenda wa kala oku sika opandelu loku piluka! Eye wa kala omõlaye wongunga. Ka kuatele vali omõla ukuavo ndaño wulume ale wukãi.
35 Eci eye o mola wa tola uwalo waye kuenda wa popia hati: “Avoyo we, amõlange! Ove wa teya utima* wange, momo wa linga omunu una nda tundisa. Nda linga ohuminyo* yimue ku Yehova kuenje si tẽla oku litiukamo.”+
36 Pole, omõlaye wo sapuila hati: “A isiange, nda wa linga ohuminyo yimue ku Yehova linga kokuange ndomo wa likuminya,+ momo Yehova wa ku fetuluinyilako ovanyãli vove va Amoni.”
37 Ufeko wa sapuila isiaye hati: “Ndi pinga lika ocina cimosi: Ngecelele oku kala lika liange vokuenda kuolosãi vivali kuenda ngecelelevo oku enda kolomunda loku lila usombo wange kumue lakamba* vange akãi.”
38 Eye wa popia hati: “Kuende!” Omo liaco, eye wo wecelela oku enda volosãi vivali kuenje ufeko wa enda kolomunda kumue lakamba vaye oco a lile usombo waye.
39 Kesulilo liolosãi vivali, ufeko wa tiukila ku isiaye noke isiaye wa tẽlisa ohuminyo a lingile yatiamẽla kokuaye.+ Eye lalimue eteke a lipekelele lulume umue. Kuenje eci ca linga ocituwa* cimue vo Isareli:
40 Unyamo lunyamo afeko vo Isareli va endaile oku u nyula loku eca epandiyo komõla ufeko wa Yefita u Gileada, oloneke vikuãla vunyamo.
Atosi Pombuelo
^ Lit., “una o yevelela.”
^ Lit., “Nye kokuange kuenda kokuove?”
^ Lit., “ove wa ndi kapa calua vemi.”
^ Lit., “nda yikula omẽla wange.”
^ Ale “oku lila lakamba vange, momo lalimue eteke ndi ka kuela.”
^ Ale “ocihilahila.”
