Olonganji 12:1-15
12 Noke alume va Efarimi va kovongiwa kuenje va yoka toke ko Safono* kuenda va sapuila Yefita vati: “Momo lie kua tu kovongelele oku enda love eci wa yoka oku ka yaka la va Amoni?+ Etu tu timĩha londalu onjo yove kumue love.”
2 Pole, Yefita wa va sapuila hati: “Ame kumue lomanu vange, tua kala oku linga uyaki umue unene la va Amoni. Ame nda ku kovongi oco vu ndi kuatisi, pole, ene ka wa ndi popeleli peka liavo.
3 Eci nda mola okuti, ka wa ponduili oku ndi popela nda nõlapo oku kapa omuenyo* wange kohele kuenda nda katukila va Amoni+ kuenje Yehova wa va eca kokuange. Omo liaco, momo lie weyilili etaili oku liyaka lame?”
4 Noke Yefita wongolola alume vosi vo Gileada+ kuenje va liyaka la Efarimi; alume vo Gileada va yula Efarimi, una wa popele hati: “Ene vu va Gileada okuti vu kasi kovikanjo via Efarimi levi via Manase, vucimunga cimue ca vakuakutila va tunda ko Efarimi.”
5 Alume va Gileada va tambula olonepa vioku yoka o Yordão+ kuenje va kapa omanu pocitumãlo caco oco va tateke va Efarimi oku tila; kuenje eci ulume umue u Efarimi a pinga oco a yoke, alume va Gileada va pula vati: “Anga hẽ ove u Efarimi?” Eci eye a tambulula hati: “Sio!”
6 ovo va pinga oco a popie hati: “Civolete.” Pole, eye o popia hati: “Sivolete,” momo va Efarimi ka va tẽlele oku tukula ciwa ondaka “Civolete.” Omo liaco, ovo vo kuata kuenda vo pondela volonepa vioku yoka o Yordão. Kuenje ci soka 42.000 ya va Efarimi va fa vepuluvi liaco.
7 Yefita wa kala onganji vo Isareli vokuenda kueci ci soka anyamo epandu, noke liovina viaco, Yefita u Gileada wa fa kuenje wa kendiwa volupale luaye ko Gileada.
8 Ivisana wo ko Beteleme wa linga onganji yo Isareli noke liaye.+
9 Eye wa kuata 30 komãla valume kuenda 30 komãla vakãi. Eye wa tuma omãla vaye vakãi oco va likuele lalume vana ka va tiamẽlele kocikoti caye kuenda eye wa nena 30 kakãi oco va likuele lomãla vaye valume. Eye wa kala onganji yo Isareli vokuenda kuanyamo epanduvali.
10 Noke Ivisana wa fa kuenje wa kendiwa ko Beteleme.
11 Noke liaye, Eloni u Sevulono wa linga onganji yo Isareli; eye wa kala onganji yo Isareli ci soka ekũi kanyamo.
12 Noke Eloni u Sevulono wa fa kuenje wa kendiwa ko Ayalone ofeka ya Sevulono.
13 Noke liaye, Avidone omõla a Hileli u Piratoni wa linga onganji yo Isareli.
14 Eye wa kuata 40 komãla kuenda 30 kolonekulu vana va endaila kovimbulu vi soka 70. Eye wa linga onganji yo Isareli ci soka anyamo ecelãla.
15 Noke Avidone omõla a Hileli u Piratoni, wa fa kuenje wa kendiwa ko Piratoni kofeka yo Efarimi komunda ya Amaleke.+
