Olonganji 13:1-25
13 Va Isareli va linga vali eci cĩvi kovaso a Yehova+ kuenje Yehova wa va eca peka lia va Filisiti+ ci soka 40 kanyamo.
2 Kotembo yaco, kua kala ulume umue wo ko Sora+ ukuepata lia va Dani+ okuti onduko yaye Manoa.+ Ukãi waye wa kala osiũle kuenda ka kuatele omõla.+
3 Vokuenda kuotembo, ungelo wa Yehova wa molẽha kukãi kuenda wo sapuila hati: “Tala, ove wusiũle kuenda ku kuete omõla. Pole, ove o ka mina kuenda o ka cita omõla umue ulume.+
4 Cilo kuata utate ku ka nyue ovinyu ale ocina cikuavo ci koluisa+ kuenda ku ka lie lacimue ca vĩhisiwa.+
5 Tala! Ove o ka mina kuenda o ka cita omõla umue ulume kuenje esinga liaye lio vutue lalimue eteke ka li ka tetiwe,+ momo omõla o ka kala u Nasiri wa Suku tunde koku citiwa* kuenda eye o ka kala usongui koku popela o Isareli peka lia va Filisiti.”+
6 Noke ukãi wa enda kuenda wa sapuila ulume waye hati: “Ulume umue wa Suku yocili weyile kokuange kuenda emolẽho liaye lia setahãla ndungelo umue wa Suku yocili kuenda li komõhisa. Ame sio pulisile oku a tundilila kuenda eye ka ndi sapuilile onduko yaye.+
7 Pole, eye wa ndi sapuila hati: ‘Tala! Ove o ka mina kuenda o ka cita omõla umue ulume. Kaliye ku ka nyue ovinyu ale ocina cikuavo ci koluisa kuenda ku ka lie lacimue ca vĩhisiwa momo, omõla o ka kala u Nasiri wa Suku tunde koku citiwa* toke keteke liolofa viaye.’”
8 Manoa wa pinga ku Yehova kuenda wa popia hati: “Ngecele a Yehova. Linga ohenda, ulume wa Suku yocili una ove wa tumĩle, eye vali kokuetu oco a tu longise eci catiamẽla kovina tu sukila oku linga lomõla o laika oku citiwa.”
9 Omo liaco, Suku yocili wa yevelela Manoa kuenje ungelo wa Suku yocili weya vali kukãi osimbu eye a kala oku tumãla vepia; ulume waye Manoa ka kaile laye.
10 Lonjanga yalua ukãi wa lupuka kuenda wa sapuila ulume waye hati: “Tala! Ulume una weyile kokuange eteke lina, wa molẽha vali kokuange.”+
11 Noke Manoa wa katuka kuenje wa enda kumue lukãi waye. Eye wa pitĩla toke kulume waco kuenje wo pula hati: “Ove hẽ wulume una wa sapelele lukãi wange? Eye wa tambulula hati: “Ame.”
12 Noke Manoa wa popia hati: “Olondaka viove vi tẽlisiwe! Ekalo liomuenyo waye li ka kala ndati kuenda o ka linga upange upi?”+
13 Omo liaco, ungelo wa Yehova wa sapuila Manoa hati: “Ukãi wove o sukila oku yuvula ovina viosi ame ndo sapuila.+
14 Eye ka ka lie lacimue ca tunda kuti wuyuva, ka ka nyue ovinyu ale ocina cikuavo ci koluisa+ kuenda ka ka lie lacimue ca vĩhisiwa.+ Eye a tẽlise ovina viosi ndo handeleka.”
15 Manoa wa sapuila ungelo wa Yehova hati: “Linga ohenda, siala kuenda tu ecelele oku ku pongiyilako okahombo kamue.”+
16 Pole, ungelo wa Yehova wa popia la Manoa hati: “Nda nda siala, si ka lia okulia kuove; pole, nda o yongola oku eca ocilumba cimue coku pia elisi ku Yehova, citava oku ci lumba. Pole, Manoa ka kũlĩhĩle okuti, eye wa kala ungelo wa Yehova.
17 Noke Manoa wa sapuila ungelo wa Yehova hati: “Onduko yove helie,+ oco tu ku sivaye eci ondaka yove yi tẽlisiwa?”
18 Pole, ungelo wa Yehova wo sapuila hati: “Momo lie o pulisila onduko yange, nda okuti oyo yi komõhisa?”
19 Noke Manoa wa tikula okahombo kumue locilumba colomema kuenje wa vi lumbila ku Yehova kewe. Kuenje Eye wa kala oku linga ocina cimue ci komõhisa osimbu Manoa kumue lukãi waye va kala oku ci vandekela.
20 Osimbu ondalu ya kala oku lamana kilu oku upisa kutala, ungelo wa Yehova wa lamanela vulienge wondalu oku upisa kutala, osimbu Manoa kumue lukãi waye va kala oku ci vandekela. Vepuluvi liaco, ovo va petama lovipala viavo posi.
21 Ungelo wa Yehova ka molẽhele vali ku Manoa kumue lukãi waye. Noke Manoa wa limbuka okuti eye wa kala ungelo wa Yehova.+
22 Noke Manoa wa sapuila ukãi waye hati: “Ocili okuti tu fa, momo tua mola Suku.”+
23 Pole, ukãi waye wo sapuila hati: “Nda Yehova wa yonguile okuti tu fa, nda ka tavele ocilumba coku pia elisi+ kumue locilumba colomema peka lietu, eye nda ka lekisile kokuetu ovina viosi evi kuenda nda ka tu sapuilile lacimue catiamẽla kovina evi.”
24 Noke ukãi wa cita omõla umue ulume kuenje wo luka hati, Samisone;+ osimbu umalẽhe a kala oku kula, Yehova wamamako oku u sumũlũisa.
25 Vokuenda kuotembo, espiritu lia Yehova lia fetika oku kala laye+ ko Mahanedani+ pokati ko Sora lo Esitaole.+
