Olonganji 15:1-20
-
Efetuluinyo lia Samisone ku va Filisiti (1-20)
15 Noke yotembo yimue, koloneke vioku ungula otiliku, Samisone wa enda oco a ka nyule ukãi waye kuenda wambata okahombo kamue. Eye wa popia hati: “Ndi yongola oku kala vohondo* lukãi wange.” Pole, isia yukãi waye ko wecelele oku iñila.
2 Isia yukãi waye wa popia hati: “Ame nda sima okuti, ‘Ove wo suvuka.’+ Omo liaco, ndo weca kombangi yove yuvala.+ Manjaye umalẽhe ka finile vali calua okuti eye o sule? Linga ohenda kala laye.”
3 Pole, Samisone wa popia hati: “Onjanja eyi, ka citava okuti va Filisiti va ndi kapa eko omo lioku va linga cĩvi.”
4 Omo liaco, Samisone wa enda kuenda wa kuata 300 kolombulu. Noke wa tikula ovitonga, wa kuta olombulu vivali vivali kovicĩla kuenda wa kapa ocitonga cimue pokati kovicĩla violombulu viaco.
5 Noke eye wa kapa ondalu kovitonga kuenda wa tuma olombulu vokati kovapia olomema a va Filisiti. Eye wa timĩha ovina viosi oku upisa kovitungu kuenda olomena vina okuti ka via onguiwile, ndaño muẽle oviti viayuva kuenda oviti vio oliveira.
6 Va Filisiti va pula vati: “Helie wa ci linga?” Va va sapuila hati: “Samisone ulume womõla ukãi u Timina eye wa ci linga, momo eye wa tambula ukãi wa Samisone kuenje wo weca kombangi yaye yuvala.”+ Omo liovina viaco, va Filisiti va lamana kuenda va timĩha londalu, ukãi waco kumue la isiaye.+
7 Noke Samisone wa va sapuila hati: “Nda eci oco vu linga, ame si liwekapo toke eci ndu vu fetuluinyi.”+
8 Noke eye wa va katukila umosi umosi* lekundu limue linene kuenje eye wa loka kuenda wa kala veleva* liewe limue lia Etami.
9 Noke va Filisiti va lamana loku tunga ocilombo vo ko Yuda kuenda va kala oku ñuala o Lehi.+
10 Kuenje alume vo Yuda va popia vati: “Momo lie weyilili oku tu katukila?” kuenje ovo va tambulula vati: “Tueya oku kuata* Samisone, oco tu linge laye ndeci a linga letu.”
11 Omo liaco, 3.000 kalume vo ko Yuda va lokila toke keleva* liewe lia Etami kuenje va sapuila Samisone vati: “Kua kũlĩhĩle hẽ okuti va Filisiti ovo va kasi oku tu viala?+ Momo lie wa tu lingila ovina evi?” Eye wa va sapuila hati: “Ndeci ovo va ndi linga haico nda va lingavo.”
12 Pole, ovo vo sapuila vati: “Tueya oku ku kuata* oco tu ku ece peka lia va Filisiti.” Noke Samisone wa popia hati: “Lisili lame okuti ene muẽle ka vu ndi katukila.”
13 Ovo vo sapuila vati: “Sio, tu ku kuta ño kuenda tu ku eca kokuavo, pole, ka tu ku pondi.”
Omo liaco, ovo vo kuta lovikolo vivali viokaliye kuenda vo upa veleva.
14 Eci eye a pitĩla ko Lehi, va Filisiti va kaluka londaka yeyulo poku lisanga laye. Kuenje espiritu lia Yehova lio wĩha unene+ kuenje ovikolo via kala kovoko aye, via linga ndutele wa tutiwa okuti wa kakuiwa londalu kuenje via kupuka kovoko aye.+
15 Eye wa sanga olumbanjo lumue lu talala luocimbulu cimue; eye wolõla eka loku lu kuata kuenda wa ponda laluo 1.000 kalume.+
16 Noke Samisone wa popia hati:
“Lolumbanjo luocimbulu cimue, ondunda yimosi, olondunda vivali!
Lolumbanjo luocimbulu cimue, nda ponda 1.000 kalume.”+
17 Eci a mala oku vangula, eye wa inasi olumbanjo luaco kuenje wa tukula ocitumãlo caco hati, Ramati-Lehi.*+
18 Noke wa kuata enyona lialua kuenje wa vilikiya ku Yehova loku popia hati: “Ove wa eca epopelo eli linene peka liukuenje wove. Pole, anga hẽ cilo ndi fa lenyona loku kupukila povaka oviyamba?”
19 Omo liaco, Suku wa yikula epangu limue lia kala ko Lehi kuenje mua tunda ovava.+ Eci eye a nyua, ongusu* yaye ya tiuka kuenda ka lambukile vali. Eli olio esunga lieci a lukila ocitumãlo caco hati, Enihakore* okuti yi kasi ko Lehi toke etaili.
20 Kuenje eye wa linga onganji yo Isareli koloneke via va Filisiti eci ci soka 20 kanyamo.+
Atosi Pombuelo
^ Ale “ohondo yo vokati.”
^ Lit., “wa va katukila kovolu toke kovikalo.”
^ Ale “epangu.”
^ Ale “oku kuta.”
^ Ale “epangu.”
^ Ale “oku kuta.”
^ Ci lomboloka “Ocitumãlo ca Lepa Columbanjo.”
^ Lit., “espiritu liaye lia tiuka.”
^ Ci lomboloka “Ono ya Una o Vilikiya.”
