Olonganji 16:1-31
16 Eteke limue, Samisone wa enda ko Gasa kuenje wa muilako ukãi umue ocipuepue kuenda eye wa iñila vonjo yukãi waco.
2 Va Gasa va va sapuila vati: “Samisone weya kulo.” Omo liaco, vo ñuala ocingonja kuenda vo lavekela vokuenda kuteke wosi pombundi yolupale. Ovo võha vokuenda kuteke waco wosi kuenda va livangula pokati vati: “Eci ku ca tu u ponda.”
3 Pole, Samisone oko a pekela toke vokati kuteke. Noke eye wa katuka vokati kuteke kuenje wa kuata apito ombundi yolupale kumue lovikuli viaco vivali kuenda wa vi tukũla kumue locikundiko. Wa vi kapa kapepe aye kuenda wa vi ambata kilu liomunda ya imba ovaso ko Hevirone.
4 Noke liovina viaco, eye wa sola ukãi umue wo Kocimbota* co Soreke okuti onduko yaye Delila.+
5 Omo liaco, olombiali via va Filisiti via amela kukãi waco loku u sapuila hati: “U yonja*+ kuenda limbuka eci ca siata oku wĩha ongusu yalua kuenda ndomo tu tẽla oku u kuata loku u kuta kuenda oku u yula. Nda wa ci linga, omunu lomunu pokati ketu o ku ĩha 1.100 kolopalata.”
6 Noke Delila wa sapuila Samisone hati: “Linga ohenda ndi sapuile oku ku tunda ongusu yove yalua kuenda eci ci pondola oku lingiwa oco o kutiwe loku ku yula.”
7 Samisone wo sapuila hati: “Nda va ndi kuta likolo epanduvali vi talala viohonji, okuti ka via kukutile handi, ndi pua ongusu ndulume waño.”
8 Omo liaco, olombiali via va Filisiti via nena kokuaye ovikolo epanduvali vi talala viohonji okuti, ka via kukutile handi kuenda ukãi wo kuta lavio.
9 Ovo va salamẽle vohondo yo vokati kuenje ukãi wo kalukila hati: “Va Filisiti va kasi kulo a Samisone!” Kuenje wa tepa ovikolo viohonji lonjila yimue ya leluka ndeci utele umue wolinyu u tepa eci u lamba kondalu.+ Elumbu liongusu yaye ka lia limbukiwile.
10 Noke Delila wa sapuila Samisone hati: “Tala! Wa ndi limbika* kuenda wa ndi sapuila ovohembi. Kaliye linga ohenda ndi sapuileko eci o pondola oku kutiwa laco.”
11 Omo liaco, eye wa sapuila ukãi hati: “Nda va ndi kuta lovikolo viokaliye okuti ka va talavayele lavio ndi pua ongusu ndulume waño.”
12 Omo liaco, Delila wa tikula ovikolo viokaliye kuenda wo kuta lavio kuenje wa kaluka hati: “Va Filisiti va kasi kulo a Samisone!” (Osimbu alume va kala oku salama vohondo yo vokati.) Kuenje eye wa tepa ovikolo viaco via kala kovoko nditele.+
13 Noke liovina viaco, Delila wa sapuila Samisone hati: “Toke cilo wa ndi limbika kuenda wa ndi sapuila ovohembi.+ Ndi sapuileko eci o pondola oku kutiwa laco.” Kuenje eye wa sapuila ukãi hati: “Nda wa kuta atombi epanduvali o vutue wange lutele woku tuta womakina yoku pota, ndi pua ongusu yange.”
14 Omo liaco, ukãi wa ci linga kuenda wa a tokeka longuya yimue kuenje wo kalukila hati: “Va Filisiti va kasi kulo a Samisone!” Omo liaco, eye wa pasuka kotulo kuenje wa tukũla onguya yomakina yoku pota kuenda utele woku tuta.
15 Ukãi wo sapuila hati: “O popia ndati okuti, ‘ndu ku sole,’+ nda utima wove ka u kasi lame? Volonjanja evi vitatu, ove wa ndi limbika kuenda kua ndi sapuilile ono yongusu yove yalua.”+
16 Omo okuti eteke leteke ukãi wa kala oku u sakalaisa loku u kisika, eye wa kavele calua okuti wa livela oku fa.+
17 Oku sulako eye wa situlula utima waye kukãi poku popia hati: “Esinga liutue wange lalimue eteke lia tetiwile, momo ndu Nasiri wa Suku tunde koku citiwa.*+ Nda esinga liovutue wange lia tetiwa ongusu yange yi ndi tunda kuenda ndi pua ongusu loku kala ndalume vosi vakuavo.”
18 Eci Delila a limbuka okuti eye wa situlula utima waye kokuaye, vepuluvi liaco, wa kovonga olombiali via va Filisiti+ poku popia hati: “Enjui onjanja yilo, momo eye wa situlula utima waye kokuange.” Omo liaco, olombiali va Filisiti veya kokuaye kuenda va nena olombongo.
19 Ukãi wa lingisa okuti, eye o pekela kovolu aye; noke ukãi wa vilikiya ulume umue kuenda wo teta atombi epanduvali o vutue waye. Noke liovina viaco, ukãi wa fetika oku u viala momo ongusu yaye ya kala oku u tunda.
20 Kuenje eye wa kaluka hati: “Va Filisiti va kasi kulo a Samisone!” Eye wa pasuka kotulo kuenda wa popia hati: “Ndi tunda ndeci nda siata oku linga olonjanja vikuavo+ kuenda ndi li yovola.” Pole, eye ka kũlĩhĩle okuti Yehova wo yanduluka.
21 Omo liaco, va Filisiti vo kuata kuenda va tofola ovaso aye. Noke vo tuala kombuelo ko Gasa kuenda vo kuta lalienge avali osipi kuenje eye wa linga ukuakufula olomema vokayike.
22 Pole, esinga lio vutue waye lia fetika vali oku kula noke lioku tetiwa.+
23 Olombiali via va Filisiti via liongoluila pamosi oco va ece ocilumba cimue cinene ku suku yavo Dagoni+ loku linga ocipito momo va popia vati: “Samisone unyãli wetu, suku yetu wo weca peka lietu!”
24 Eci omanu vo mola va sivaya suku yavo poku popia vati: “Unyãli wetu, una wa kundula ofeka yetu+ haeye wa ponda omanu valua pokati ketu, suku yetu wo weca peka lietu.”+
25 Omo okuti ovitima viavo via sanjukile, ovo va popia vati: “Vilikiyi Samisone oco a tu papalise.” Omo liaco, ovo va vilikiya Samisone vokayike oco a va papalise; ovo vo talamisa pokati kolongunji.
26 Noke Samisone wa sapuila umalẽhe una wa kala oku u kuata peka hati: “Ngecelele oku lamba kolongunji via pamisa onjo oco okuti ndi li kunamako.”
27 (Ca kala okuti, onjo yeyukile lalume kuenda lakãi. Olombiali viosi via va Filisiti omo via kala kuenda kolusoka kua kala 3.000 kalume lakãi vana va kala oku tala osimbu Samisone a kala oku va papalisa.)
28 Noke Samisone+ wa kalukila ku Yehova hati: “A Ñala Tõlo Yehova, mange ohenda njivaluke kuenda ndi pamise+ vali onjanja eyi A Suku kuenda ecelela okuti ndi fetuluinya ño va Filisiti omo lia limue pokati kovaso ange avali.”+
29 Noke Samisone wa li kunama kolongunji vivali vio vokati vina via pamisa onjo kuenda wa kuata yimue leka liondio kuenda yikuavo leka liepĩli.
30 Samisone wa kaluka hati: “Ndi fe kumue la va Filisiti!” Noke eye wa sinda longusu yaye yosi kuenje onjo ya kupukila olombiali lomanu vosi va kalamo.+ Omo liaco, eye wa ponda vali valua voku fa kuaye okuti ava a ponda vokuenda kuomuenyo waye ci sule.+
31 Noke vamanjaye kuenda epata liosi lia isiaye va lokilako oco va kope etimba liaye. Ovo vo nena kuenda vo kenda pokati ko Sora+ lo Esitaole veyambo lia isiaye Manoa.+ Eye wa linga onganji yo Isareli ci soka 20 kanyamo.+
Atosi Pombuelo
^ Ale “Ekango.”
^ Ale “Oku Vetiya.”
^ Ale “wa ndi fuanguila.”
^ Lit., “tunde vimo lia ina yange.”
