Olonganji 17:1-13
-
Oviteka via Mika kuenda ocitunda caye (1-13)
17 Kua kala ulume umue kovaimbo a kasi kolomunda vio Efarimi,+ o tukuiwa hati Mika.
2 Eye wa sapuila inaye hati: “Ivaluka hẽ 1.100 kolopalata vina viopiwa kokuove kuenje ove wa siñala omunu wa viupa kuenda wa ci popelavo vovatũi ange? Olopalata viaco vi kasi lame. Ame nda viupa.” Omo liaco, inaye wo sapuila hati: “Yehova a sumũlũise omõlange.”
3 Kuenje eye wa tiula 1.100 kolopalata ku inaye, pole, inaye wo sapuila hati: “Ndi ka eca* olopalata viange ku Yehova. Ame ndi yongola okuti, ove muẽle o talavaya lavio oco ku lingiwe ociñumañuma ca songiwa kuenda ociñumañuma cutale.+ Omo liaco, olopalata evi vi kala viove.”
4 Noke lioku tiula olopalata ku inaye, inaye wa tikula 200 kolopalata kuenje wa vi eca kukuakutela opalata. Eye wa linga ociñumañuma ca songiwa kuenda ociñumañuma cutale; kuenje ovio via kapiwa vonjo ya Mika.
5 Ulume waco Mika wa kuatele onjo yimue yolosuku kuenda eye wa tunga evendalia limue+ kuenda oviteka vio vonjo*+ kuenje wa tumbika* umue pokati komãla vaye oco o vumbile ndocitunda.+
6 Koloneke viaco, ka kua kale osoma ko Isareli.+ Omunu lomunu wa enda oku linga eci co sungulukila kovaso aye.*+
7 Kua kala umalẽhe umue wo ko Beteleme+ ko Yuda wa kala ukuepata lia Yuda. Eye wa kala u Lewi+ kuenda eye wa kalako otembo yimue.
8 Ulume waco, wa tunda volupale luo Beteleme ko Yuda oco a sange ocitumãlo cimue coku kala. Osimbu a kala oku linga ungende, wa pitĩla kovaimbo a kasi kolomunda vio Efarimi toke konjo ya Mika.+
9 Kuenje Mika wo pula hati: “Wa tunda pi?” Eye wa tambulula hati: “Ame ndu Lewi wo ko Beteleme yo Yuda kuenda ñasi oku sandiliya ocitumãlo cimue coku kala.”
10 Omo liaco, Mika wo sapuila hati: “Kala lame kuenda vumba nda isia* umue kuenda ndocitunda cimue kokuange. Ame ndu ku ĩha ekũi kolopalata vunyamo kuenda ovowalo lokulia kuove.” Omo liaco, u Lewi wa iñila.
11 Noke u Lewi wa tava oku kala kumue lulume kuenda umalẽhe wa linga nda umue pokati komãla vaye.
12 Kuenje Mika wa tumbika* u Lewi oco o vumbile ndocitunda cimue+ kuenda eye wa kala konjo ya Mika.
13 Noke Mika wa popia hati: “Kaliye nda limbuka okuti Yehova o ka ndi sumũlũisa, momo u Lewi wa linga ocitunda cange.”
Atosi Pombuelo
^ Lit., “ndi kolisa.”
^ Ale “olosuku vio vonjo.” Lit., “va terafi.”
^ Lit., “wa yukisa eka lia.”
^ Ale “ceci a sima okuti ca sunguluka.”
^ Ale “ondunguli yimue.”
^ Lit., “wa yukisa eka lia.”
