Olonganji 18:1-31
18 Koloneke viaco, ka kua kaile osoma ko Isareli.+ Kuenje koloneke viaco, ocikoti ca va Dani+ ca kala oku sandiliya ocitumãlo* coku kala, momo toke kotembo yaco, ka ca tambuile ocipiñalo pokati kovikoti via Isareli.+
2 Va Dani va tuma alume vatãlo pokati kepata liavo okuti, alume vakuotõi vo ko Sora kuenda vo ko Esitaole,+ oco va kũlĩhĩse loku tala eci ci kasi vofeka. Ovo va va sapuila vati: “Kuendi, ka tali eci ci kasi vofeka.” Eci ovo va pitĩla kovaimbo a kasi kolomunda via Efarimi toke konjo ya Mika,+ oko va pita uteke.
3 Osimbu ovo va kala oku panda ocipepi lonjo ya Mika, ovo va limbuka ondaka* yumalẽhe umue u Lewi kuenje va enda toke kokuaye kuenda vo pula vati: “Helie wa ku nena kulo? Nye o kasi oku linga vocitumãlo cilo? Nye ci kasi oku ku vetiya oku kala kulo?”
4 Eye wa va tambulula hati: “Eci oco Mika a linga kokuange kuenda eye wa ndi pañinya oco ndu vumbile ndocitunda.”+
5 Noke ovo vo sapuila vati: “Linga ohenda pula ku Suku nda ungende wetu u ka kuata onima.”
6 Ocitunda ca va sapuila hati: “Kuendi lombembua. Yehova o kasi lene vungende wene.”
7 Omo liaco, alume vatãlo va enda kuenda va pitĩla toke ko Laisi.+ Ovo va mola ndomo omanu va kalamo va likolelele ovo muẽle nda va Sidono. Ovo va kala lombembua kuenda ka va sakalalele+ kuenje vofeka yaco ka mua kaile laumue ukuakutalisa ohali okuti o va sakalaisa. Ovo va kala ocipãla la va Sidono kuenda ka va kuatele ukamba lomanu vakuavo.
8 Eci ovo va tiukila ku vamanjavo ko Sora lo ko Esitaole,+ vamanjavo va popia lavo vati: “Ca enda ndati?”
9 Ovo va tambulula vati: “Tu lamani oco tu va katukili, momo tua limbuka okuti ofeka yiwa calua. Momo lie vu kuetele atatahãi? Ko ka cilui oku enda oku ka tambula ofeka.
10 Eci vu pitĩla vu ka sanga omanu vamue okuti, ka va sakalalele+ kuenda ofeka yaco yinene. Suku wa eca ofeka yaco peka liene okuti, ocitumãlo cimue ka mua kambele lacimue kilu lieve.”+
11 Kuenje ci soka 600 kalume vakuepata lia Dani okuti va limalẽha oco va linge uyaki, va tunda ko Sora lo ko Esitaole.+
12 Ovo va lamana kuenda va tunga ocilombo ko Kiriyata-Yeari+ ko Yuda. Eli olio esunga lieci ocitumãlo caco cina ci kasi kutakelo wo Kiriyata-Yeari ci tukuiwila hati, Mahanedani*+ toke etaili.
13 Ovo va enda oku upisa kocitumãlo caco toke kovaimbo a kasi kolomunda via Efarimi kuenje va pitĩla toke konjo ya Mika.+
14 Noke alume vaco vatãlo vana va endele oku kũlĩhĩsa ofeka yo Laisi+ va popia la vamanjavo vati: “Wa kũlĩhi hẽ okuti volonjo evi mu sangiwa evendalia, oviteka vio vonjo,* ociñumañuma ca songiwa kuenda ociñumañuma cutale?+ Sokololi kovina vu sukila oku linga.”
15 Omo liaco, ovo oko va talama kuenda va pitĩla toke konjo yumalẽhe u Lewi+ konjo ya Mika kuenje va pula ndomo a kasi.
16 Vepuluvi liaco, 600 kalume va Dani+ vana va limalẽha oco va linge uyaki, va talama puvelo wombundi.
17 Alume vatãlo vana va endele oku kũlĩhĩsa ofeka+ va iñila oco vope ociñumañuma ca songiwa, evendalia,+ oviteka vio vonjo*+ kuenda ociñumañuma cutale.+ (Ocitunda+ ca talama puvelo wombundi kuenda 600 kalume vana va limalẽha oco va linge uyaki.)
18 Ovo va iñila vonjo ya Mika kuenje vopa ociñumañuma ca songiwa, evendalia, oviteka vio vonjo* kuenda ociñumañuma cutale. Ocitunda ca va sapuila hati: “Nye vu kasi oku linga?”
19 Pole, ovo vo sapuila vati: “Ũhako. Ku ka vangule lacimue* kuenda enju kumue letu oco o linge isia* kuenda ocitunda cetu. Nye ca velapo kokuove, oku kala ocitunda conjo yomunu umosi+ ale oku kala ocitunda cocikoti cimue kuenda cepata lia Isareli?”+
20 Omo liaco, ocitunda ca ci sanjukila kuenda copa evendalia, oviteka vio vonjo* kuenda ociñumañuma ca songiwa+ kuenje ca enda kumue lomanu vaco.
21 Noke ovo va enda lonjila yavo, va pitisa kovaso yavo omãla, oviunda kuenda ovina via velapo.
22 Ovo va kala ale ocipãla lonjo ya Mika eci alume vana va kala kolonjo via kala ocipepi lonjo ya Mika va liongolola kuenda va landula va Dani.
23 Eci ovo va kalukila va Dani, omãla va Dani va imba ovaso kokuavo kuenda va sapuila Mika vati: “Cipi ocitangi? Momo lie wa liongoluili?”
24 Omo liaco, eye wa popia hati: “Ene wopi olosuku viange nda panga kuenda wambativo ocitunda. Nye nda siala laco? Vu ndi pula ndati okuti, ‘Cipi ocitangi cove?’”
25 Va Dani va tambulula vati: “Ku ka vangule letu lonjila eyi; nda wa ci linga alume va tema* va ku katukila kuenje eci nda ca kokela oku pesela omuenyo wove kumue lovimuenyo via vakuanjo yove.”
26 Omo liaco, va Dani va enda lonjila yavo; kuenda eci Mika a limbuka okuti ovo va pama eye ci sule, wa ñualapo kuenje wa tiukila konjo yaye.
27 Noke lioku tambula ovina Mika a tunga, oku kongelamo ocitunda caye ovo va enda ko Laisi+ komanu vana okuti va kala lombembua kuenda ka va sakalalele.+ Ovo va va kundula losipata kuenda va yoka olupale luaco londalu.
28 Ka kua kaile laumue wa ponduile oku lu yovola momo oluo lua kala ocipãla lo Sidono kuenda ka va kuatele ukamba lomanu vakuavo. Handi vali, olupale luaco lua kala vocimbota co vetapi* ca tiamẽla ko Bete-Rehove.+ Noke ovo va tumbulula olupale kuenda va tungamo.
29 Olupale luaco va lu luka hati, Dani+ ndomo ci likuata londuko ya isiavo Dani una wa kala omõla a Isareli.+ Pole, o Laisi oyo ya kala onduko yosimbu yolupale luaco.+
30 Noke liovina viaco, va Dani va li tumbikila ociñumañuma ca songiwa+ kuenda Yonatão+ omõla a Gerisiomo,+ omõla a Mose kumue lomãla vaye va linga ovitunda viocikoti ca va Dani toke keteke olonungi viofeka via enda kumandekua.
31 Kuenje ovo va tumbika ociñumañuma ca songiwa cina Mika a tunga kuenda ca kalako oloneke viosi osimbu onjo ya Suku yocili ya kala ko Silo.+
Atosi Pombuelo
^ Lit., “ocipiñalo.”
^ Ale “elaka.”
^ Ci lomboloka “Ocilombo ca Dani.”
^ Ale “olosuku vio vonjo.” Lit., “va terafi.”
^ Ale “olosuku vio vonjo.” Lit., “va terafi.”
^ Ale “olosuku vio vonjo.” Lit., “va terafi.”
^ Lit., “Kapa eka liove komẽla wove.”
^ Ale “ondunguli yimue.”
^ Ale “olosuku vio vonjo.” Lit., “va terafi.”
^ Ale “alume vakuanyeño.”
^ Ale “etapi lia vomba.”
