Olonganji 19:1-30
-
Ekandu liukahonga lia va Benjamini ko Givea (1-30)
19 Koloneke viaco, eci ka kua kaile osoma ko Isareli,+ u Lewi umue una wa kala konepa yimue ocipãla kovaimbo a kasi kolomunda vio Efarimi,+ wa lisandela ukãi umue wo ko Beteleme+ ko Yuda oco a linge ukama waye.
2 Pole, ukama waye wa fetika oku linga ukahonga kuenda ukama waco wo siapo oco a ende konjo ya isiaye ko Beteleme ko Yuda. Eye wa kalako vokuenda kuolosãi vikuãla.
3 Noke ulume waye wo landula oco o vetiye oku tiuka; eye wa enda loñuatisi yaye kumue lovimbulu vivali. Kuenje ukãi wo wiñisa vonjo ya isiaye. Eci isia yukãi o mola, wa kuata esanju lioku u sanga.
4 Omo liaco, ndatembo yulume waco okuti isia yufeko, wo vetiya oku kala kumue laye oloneke vitatu; kuenje ovo va lia lia, va nyua nyua kuenda ulume wa enda oku pitako uteke.
5 Keteke lia kuãla eci ovo va pasuka selo lomẽle oco va ende, isia yufeko wa sapuila ndatembo yaye hati: “Lia cimue oco cu ku ĩhe ongusu* noke citava oku enda.”
6 Omo liaco, ovo va tumãla kuenda kavali kavo va lia loku nyuila kumosi; noke liovina viaco, isia yufeko wa sapuila ulume hati: “Linga ohenda, pita uteke kulo kuenda sanjuka.”*
7 Eci ulume a katuka oco a ende, ndatembo yaye wamamako oku u peya kuenje eye wa pitako vali uteke.
8 Eci a pasuka selo lomẽle keteke liatãlo oco a ende, isia yufeko wa popia hati: “Linga ohenda, lia cimue oco ci ku ĩhe ongusu.”* Kuenje ovo va kala kumosi toke eci ekumbi lia enda kuenda kavali kavo vamamako oku lia.
9 Eci ulume a katuka oco a ende kumue lukama waye kuenda oñuatisi yaye, ndatembo yaye, okuti isia yufeko, wo sapuila hati: “Kaliye, tala! Ndopo ku tekãva. Linga ohenda, piti uteke kulo. Ekumbi li kasi oku iñila. Pita uteke kulo kuenda sanjuka. Hẽla vu pondola oku pasuka selo oco vu linge ungende wene loku enda konjo* yove.”
10 Pole, ulume ka yonguile vali oku pitako uteke ukuavo, omo liaco, wa katuka kuenje wa linga ungende toke ko Yevusi okuti, o Yerusalãi.+ Eye wambatele ovimbulu vivali via longekiwa, ukama waye kuenda oñuatisi yaye.
11 Eci ovo va kala ocipepi lo Yevusi ekumbi lia kala oku iñila. Omo liaco, oñuatisi ya sapuila cime caye hati: “Tu sukila hẽ oku talama volupale olu lua va Yevusi kuenda oku pitamo uteke?”
12 Pole, cime caye wo sapuila hati: “Ka tu sukila oku talama volupale lumue luovingendeleyi okuti, ka via tiamẽlele ku va Isareli. Etu tuamako toke ko Givea.”+
13 Noke eye wa sapuila oñuatisi yaye hati: “Enju kuenda tu seteke oku sanga cimue pokati kovitumãlo ovio; tu ka pita uteke ko Givea ale ko Rama.”+
14 Omo liaco, ovo va enda lonjila yavo kuenda ekumbi lia fetika oku iñila eci va kala ocipepi lo Givea, yina yi tiamẽla ku Benjamini.
15 Omo liaco, ovo va talama ko Givea kuenda va iñilamo oco va pite uteke. Omo okuti va kala ale vokati kolupale, ovo va tumãla vokololo yolupale, pole, lomue wa va yekisa vonjo yaye oco va pitemo uteke.+
16 Oku sulako kuteke waco, ulume umue wa kuka wa tunda kepia kupange waye. Eye wo kovaimbo a kasi kolomunda via Efarimi+ kuenda o kasi ale ko Givea vokuenda kuotembo yimue; pole, olonungi violupale via kala va Benjamini.+
17 Eci ulume wa kuka a vanja loku mola ongende vokololo yolupale, eye wa pula hati: “Wenda pi kuenda pi wa tunda?”
18 Eye wa tambulula hati: “Tu kasi oku tunda ko Beteleme ko Yuda kuenda tu enda konepa yimue ocipãla lovaimbo a kasi kolomunda vio Efarimi, kuna ame nda tiamẽla. Nda endele ko Beteleme ko Yuda+ kuenda ñasi oku enda konjo ya Yehova* pole, lomue wa ndi yekisa vonjo yaye.
19 Etu tu kuete owangu wa kukuta kuenda okulia ku tẽla kuovimbulu vietu,+ handi vali, tu kuete ombolo+ lovinyu yoku li tekula ame kumue lukãi kuenda oñuatisi yetu. Lacimue ca tu kambela.”
20 Pole, ulume wa kuka wo tambulula hati: “Ombembua yi kale love! Cosi o sukila ecelela okuti ndi ci tẽlisa. Ku ka pite uteke vokololo.”
21 Omo liaco, wo wambata konjo yaye kuenda wa eca okulia* kovimbulu. Noke ovo va sukula olomãhi viavo kuenje va lia loku nyua.
22 Osimbu ovo va kala oku lisanjuisa, alume vamue ka va silivila vo volupale luaco, va ñuala ocingonja onjo kuenda va kala oku veta kepito kuenje vamamako oku sapuila kulume wa kuka okuti muẽle yonjo vati: “Tundisa ulume una weya vonjo yove oco tu lipekele laye.”+
23 Kuenje muẽle yonjo wa tunda kuenda wa va sapuila hati: “Sio a vamanjange, ko ka lingi eci cĩvi. Ulume u ukombe vonjo yange. Ko ka lingi elinga eli li kutisa osõi.
24 Omõlange ukãi okuti osombo kuenda ukama wulume u, va kasi mulo. Linga ndi va nene posamua kuenda citava oku va lavisa nda vu yongoli.*+ Pole, ko ka lingi elinga eli li kutisa osõi kulume u.”
25 Pole, alume va likala oku u yevelela, omo liaco ulume u Lewi wa kuata ukama waye+ kuenje wo wambata posamua kokuavo. Ovo vo putula kuenda vo lavisa vokuenda kuteke wosi toke lomẽle. Noke ovo vo tuma oco a ende poku tunda kuekumbi.
26 Lomẽle, ukãi weya kuenda wa kupukila puvelo wonjo yulume muna mua kala cime caye kuenda wa kala pocitumãlo caco toke eci kua ca.
27 Eci cime caye a pasuka lomẽle kuenda wa yikula apito o vonjo oco a tunde loku amamako lungende waye, eye wa mola ukãi haeye ukama waye okuti, wa kupukila puvelo wonjo kuenda ovoko aye a kala puvelo.
28 Omo liaco, eye wo sapuila hati: “Katuka; tu ende.” Pole ka kua kaile etambululo. Noke ulume wo kapa kocimbulu kuenje wa enda konjo yaye.
29 Eci a pitĩla konjo yaye, eye wa tikula omoko yoku ponda kuenda wa kuata ukama waye kuenda wo teta volonepa 12 kuenje onepa lonepa wa yi tumisa kovikanjo viosi vio Isareli.
30 Omanu vosi va ci mola, va popia vati: “Ka kua la pita ocina cimue ndeci kuenda ka ca la muiwa tunde keteke va Isareli va tunda kofeka Yegito toke etaili. Ci kũlĩhĩsi,* lisapeli+ kuenda tu sapuiliko eci tu sukila oku linga.”
Atosi Pombuelo
^ Ale “oco o pamise utima wove.”
^ Ale “ecelela okuti utima wove u kala ciwa.”
^ Ale “oco o pamise utima wove.”
^ Lit., “ombalaka.”
^ Ale pamue, “kuenda ame ndi kasi oku vumba konjo ya Yehova.”
^ Ale “wa eca okulia kua tengiwa.”
^ Ale “va lavisi kuenda lingi eci ca sunguluka kovaso ene.”
^ Ale “Tiamisili ovitima viene kelinga eli.”
