Olonganji 20:1-48
-
Uyaki la va Benjamini (1-48)
20 Noke va Isareli vosi va tunda oku upisa ko Dani+ loku lokila ko Beresieva kuenda va tunda kofeka yo Gileada+ kuenje ekongelo liosi lia liongolola lutima umuamue* kovaso a Yehova ko Misipa.+
2 Omo liaco, asongui vomanu kuenda ovikoti viosi vio Isareli va talama vovitumãlo viavo vekongelo liomanu va Suku va soka 400.000 kasualali vana va endela posi haivo va limalẽha lolosipata.+
3 Va Benjamini va yeva okuti, alume va Isareli va lamanela ko Misipa.
Kuenje alume va Isareli va popia vati: “Tu sapuiliko, ocina eci cĩvi ca pita ndati?”+
4 Noke ulume u Lewi okuti,+ ulume wukãi wa pondiwa wa tambulula hati: “Ame nda pitĩla toke ko Givea+ ya Benjamini kumue lukama wange oco tu piteko uteke.
5 Kuenje olonungi* vio ko Givea via ndi katukila kuenda via ñuala ocingonja onjo kuteke. Ovo va yonguile oku ndi ponda, pole, va putula ukama wange kuenje eye wa fa.+
6 Omo liaco, nda kuata etimba liukama wange kuenda nda li teta teta kuenje nda tuma olonepa viaco kolonepa viosi viocipiñalo ca Isareli,+ momo ovo va linga ocina cimue ci kutisa osõi haico ka ca sungulukile vo Isareli.
7 Kaliye ene amanu vosi va Isareli eci ovisimĩlo kuenda elungulo+ liene.”
8 Noke omanu vosi va katuka lutima umuamue* kuenda va popia vati: “Lomue pokati ketu enda vombalaka yaye ale oku tiukila konjo yaye.
9 Kaliye eci tu linga lo Givea ceci: Tu imba ocela kuenda tu yi katukila.+
10 Kovikoti viosi via Isareli, pokati keci ci soka 100 tu nõlapo 10 kalume, pokati keci ci soka 1.000 tu nõlapo 100 kalume kuenda pokati keci ci soka 10.000 tu nõlapo 1.000 kalume oco vongolole okulia kuolohoka okuti, ovo va tẽla oku katukila o Givea ya Benjamini omo lioku linga ocina ci kutisa osõi vo Isareli.”
11 Omo liaco, alume vosi va Isareli va liongolola oco va katukile olupale kuenda va likongela ndava va kuete ongombo yimuamue.*
12 Noke ovikoti via Isareli via tuma alume kalume vosi vocikoti ca Benjamini vati: “Ocina eci cĩvi ca pita pokati kene ci lomboloka nye?
13 Cilo, tu ĩhi alume ka va silivila vo ko Givea+ oco tu va ponde loku imũla eci cĩvi vo Isareli.”+ Pole, va Benjamini va likala oku yevelela vamanjavo va Isareli.
14 Kuenje va Benjamini va tunda kalupale kuenje va liongoluila pamosi ko Givea oco va katukile alume va Isareli.
15 Keteke liaco, va Benjamini vongolola kalupale avo 26.000 kalume va limalẽha lolosipata kuenda kua kalavo 700 kalume va nõliwa vo ko Givea.
16 Volohoka viaco, mua kala 700 kalume va nõliwa vana va kala vakuepĩli. Omunu lomunu pokati kavo wa ponduile oku imba ewe limue lepipili kesinga limue lio vutue lonjila yimue okuti ka ponyi.
17 Alume va Isareli oku upamo va Benjamini, vongolola 400.000 kalume va limalẽha lolosipata viavo+ kuenda omunu lomunu pokati kavo wa kuatele uloño woku linga uyaki.
18 Ovo va katuka kuenda va lamana toke ko Betele oco va kũlĩhĩse Suku.+ Noke omanu va Isareli va pula vati: “Helie pokati ketu o sukila oku songuila uyaki tu ka linga la Benjamini?” Yehova wa tambulula hati: “Yuda eye o kala usongui.”
19 Noke liovina viaco, va Isareli va katuka lomẽle kuenje va tunga ocilombo oco va katukile o Givea.
20 Alume va Isareli va tunda oco va linge uyaki la Benjamini; ovo va lipongiya ndovimunga viasualali oco va va katukile ko Givea.
21 Omo liaco, va Benjamini va tunda ko Givea kuenje va kundula 22.000 kalume va Isareli keteke liaco.
22 Pole, alume volohoka via Isareli va lekisa utõi kuenda ovo va lipongiya vali ndovimunga viasualali oco va linge uyaki vocitumãlo cimuamue ndeci keteke liatete.
23 Noke va Isareli va lamana kuenda va lilila kovaso a Yehova toke koñolosi kuenda va kũlĩhĩsa Yehova vati: “Tu sukila hẽ oku enda vali oku katukila vamanjetu, omanu va Benjamini?”+ Yehova wa tambulula hati: “Va katukili.”
24 Omo liaco, va Isareli vamako ocipepi la va Benjamini keteke liavali.
25 Kuenje, omãla va Benjamini va tunda ko Givea oco va lisange lavo keteke liavali kuenda va ponda vali 18.000 ya va Isareli,+ vosi yavo va limalẽhele lolosipata.
26 Noke alume vosi va Isareli va lamana ko Betele. Ovo va lila loku tumãla kovaso a Yehova+ kuenda keteke liaco, va likandangiya oku lia+ toke koñolosi kuenda va eca ovilumba vioku pia elisi+ lovilumba viombembua+ kovaso a Yehova.
27 Kuenje alume va Isareli va kũlĩhĩsa Yehova,+ momo koloneke viaco ocikasia covisila ca Suku yocili oko ca kala.
28 Koloneke viaco, Finehase+ omõla a Eleasa, omõla a Arone, eye wa kala oku vumbila* kovaso yaco. Ovo va pula vati: “Anga hẽ handi tu sukila oku tunda oco tu liyake la vamanjetu, alume va Benjamini ale tu sukila oku liwekapo?”+ Yehova wa tambulula hati: “Lamani, momo hẽla ndi va eca peka liene.”
29 Noke Isareli wa kapa alume oco va lavekele vonutula+ kolonele viosi vio Givea.
30 Va Isareli va lamana oku katukila va Benjamini keteke liatatu kuenda ovo va lipongiya ndovimunga viasualali oco va katukile o Givea ndeci va linga volonjanja vikuavo.+
31 Eci va Benjamini va tunda oco va li ñualẽhele lolohoka, ovo va kokiwa ocipãla lolupale.+ Noke ndeci va linga volonjanja vikuavo, ovo va fetika oku katukila loku ponda vamue pokati kalume vatapalo, okuti limue pokati ketapalo li lamanela ko Betele kuenda likuavo toke ko Givea, poku ponda 30 kalume va Isareli vepia lia yela.+
32 Omo liaco, va Benjamini va popia vati: “Ovo va kasi oku yuliwa kovaso etu ndeci ca pita kosimbu.”+ Pole, va Isareli va popia vati: “Tu tiukila konyima kuenda tu va kokela ocipãla lolupale katapalo.”
33 Omo liaco, alume vosi va Isareli va katuka kovitumãlo viavo kuenda va lipongiya ndovimunga viasualali ko Baale-Tamare osimbu va Isareli vana va kala oku lavekela va tunda kovitumãlo viavo ocipepi lo Givea.
34 Kuenje 10.000 kalume va nõliwa pokati ka va Isareli vosi veya kovaso yo Givea kuenda uyaki wa luile. Pole, va Benjamini ka va kũlĩhĩle okuti efengi lia kala ocipepi.
35 Yehova wa yula Benjamini+ kovaso a Isareli kuenda keteke liaco, va Isareli va kundula 25.100 kalume vo ko Benjamini, vosi yavo va limalẽhele lolosipata.+
36 Pole, va Benjamini va sima okuti, alume va Isareli va ponduile oku yuliwa eci ovo va tiukila konyima kovaso a Benjamini,+ pole, ovo va tiukila konyima momo va kolelele komanu va kala oku lavekela oco va katukile o Givea.+
37 Vakuakulavekela va ci linga lonjanga yalua kuenda va katukila o Givea. Vakuakulavekela va lisandula kuenda va kundula olupale luosi losipata.
38 Alume va Isareli va li sapelele la vakuakulavekela okuti, va laikele oku linga ondimbukiso yimue yoku lamanisa owisi volupale.
39 Eci va Isareli va tiukila konyima kuyaki, alume va Benjamini va fetika oku va katukila kuenda va ponda 30 kalume va Isareli+ kuenje va popia vati: “Ka kuli atatahãi, ovo va kasi oku yuliwa kovaso etu ndeci kuyaki wa pita.”+
40 Pole, ondimbukiso ya fetika oku lamana oku upisa volupale ndongunji yimue yowisi. Eci alume va Benjamini va ñuala oku vanja, ovo va mola okuti owisi wolupale luosi lua kala oku lamanela vilu.
41 Noke alume va Isareli va ñualapo kuenda alume va Benjamini va saluka, momo ovo va mola okuti efengi lia va kuata.
42 Omo liaco, ovo va tila alume va Isareli oku endela kekalasoko, pole, alume va Isareli va va landula; alume vana va tunda kalupale va likongela koku va kundula.
43 Ovo va ñuala ocingonja va Benjamini kuenda vamamako oku va landula. Ovo va va kosela kovaso yo Givea oku endela kutundilo.
44 Oku sulako, 18.000 kalume va Benjamini va fa, vosi yavo asualali va pama.+
45 Alume va Benjamini va ñualapo kuenda va tilila vekalasoko kewe lia Rimone+ kuenda va Isareli va ponda* 5.000 pokati kavo vatapalo kuenda vamamako oku va landula toke ko Gidoma; omo liaco, ovo va kundula vali 2.000 kalume.
46 Vosi va Benjamini vana va pondiwa keteke liaco, va tẽla 25.000 kalume va limalẽha lolosipata,+ vosi yavo asualali va pama.
47 Pole, ci soka 600 va tilila vekalasoko vewe lia Rimone kuenda ovo vamamako oku kala vewe lia Rimone vokuenda kuolosãi vikuãla.
48 Kuenje alume va Isareli va tiukila konyima oku katukila va Benjamini kuenda va kundula vana va kala volupale losipata oku upisa kulume toke koviunda la cosi ca supamo. Handi vali, kuosi va pita va yoka londalu alupale osi.
Atosi Pombuelo
^ Lit., “ndulume umosi.”
^ Ale pamue, “vamuẽle afeka.”
^ Lit., “ndulume umosi.”
^ Lit., “ndulume umosi.”
^ Lit., “wa kala oku talama.”
^ Lit., “va pupulula.”
