Olonganji 21:1-25
-
Ocikoti ca Benjamini ci yovuiwa (1-25)
21 Alume va Isareli va lingile ocisila eci ko Misipa cokuti:+ “Lomue pokati ketu o ka eca omõlaye ukãi kulume umue u Benjamini.”+
2 Omo liaco, omanu veya toke ko Betele+ kuenda oko va tumãla kovaso ya Suku yocili toke koñolosi kuenda va kala oku kaluka loku lila calua.
3 Ovo va kala loku popia vati: “A Yehova Suku ya Isareli, momo lie ocina eci ca pitila vo Isareli? Momo lie ku kambela ocikoti cimue etaili ko Isareli?”
4 Keteke lia kuamamo, omanu va pasuka selo kuenda va tungilako utala umue oco va lumbileko ovilumba vioku pia elisi lovilumba viombembua.+
5 Noke omanu va Isareli va popia vati: “Pokati kovikoti viosi via Isareli, cipi okuti ka ca lamanele oku liongoluila kovaso a Yehova?” Momo ovo va lingile ocisila cinene cokuti wosi keyile kovaso a Yehova ko Misipa o pondiwa muẽle.
6 Omo liaco, omanu va Isareli va kuata ohenda omo lieci ca pita la Benjamini manjavo. Ovo va popia vati: “Etaili ocikoti cimue ca tepiwa ko Isareli.
7 Nye tu sukila oku linga oco tu ece akãi ku vana va supapo, cilo okuti tua lisila ale ku Yehova+ okuti ka tu eci kokuavo laumue pokati komãla vetu oco va linge akãi vavo?”+
8 Ovo va pula vati: “Helie pokati kovikoti via Isareli okuti ka lamanele ku Yehova ko Misipa?”+ Ca pita okuti lomue wo ko Yavesi-Gileada weya kocilombo muna ekongelo lia kala.
9 Eci omanu va tendiwa, ovo va mola okuti lomue pokati kolonungi vio ko Yavesi-Gileada wa kalapo.
10 Omo liaco, ekongelo lia tumako 12.000 kalume va pamapo vali. Ovo va va handeleka vati: “Kuendi kuenda kunduli olonungi vio ko Yavesi-Gileada losipata ndaño muẽle akãi kuenda omãla.+
11 Eci vu sukila oku linga ceci: Ulume wosi kumue lukãi wosi okuti wa lipekelele ale lulume, vu sukila oku u kundula.”
12 Pokati kolonungi vio ko Yavesi-Gileada ovo va sanga 400 kafeko vosombo okuti lalimue eteke va lipekelele lulume umue. Omo liaco, ovo va va tuala toke kocilombo ko Silo,+ yina yi kasi kofeka yo Kanana.
13 Noke ekongelo liosi lia tuma esapulo ku va Benjamini kewe lia Rimone+ kuenda va va imbila oluiya luombembua.
14 Omo liaco, omãla va Benjamini va tiukila kofeka yavo vepuluvi liaco. Ovo va eca kokuavo akãi vana va popeliwa pokati kakãi vo ko Yavesi-Gileada,+ pole, ovo ka va sangele akãi va tẽla oco va va ece kokuavo.
15 Kuenje omanu va kuata ohenda omo lieci ca pita la Benjamini,+ momo Yehova wa linga etepiso limue pokati kovikoti via Isareli.
16 Akulu vohongele va popia vati: “Nye tu sukila oku linga oco tu ece akãi kalume vana va supapo, omo okuti akãi vosi va Benjamini va kunduiwa?”
17 Ovo va tambulula vati: “Vana va supapo ko Benjamini, va sukila oku kuata ocipiñalo cimue oco okuti ocikoti cimue ka ci imũha ko Isareli.
18 Pole, ka citava okuti tu eca kokuavo akãi pokati komãla vetu, momo omanu va Isareli va lisila vati: ‘Wa siñaliwa omunu wosi eca ukãi umue ku Benjamini.’”+
19 Noke ovo va popia vati: “Tali! Kuli ocipito cimue ca Yehova ci lingiwa unyamo lunyamo ko Silo,+ yina yi kasi konano yo Betele kuenda kutundilo wetapalo li lamana oku pisa ko Betele toke ko Sekeme kuenda kombuelo yo Levona.”
20 Omo liaco, ovo va handeleka alume va Benjamini vati: “Kuendi kuenda lavekeli voviumbo viayuva.
21 Eci ene vu mola afeko* vo ko Silo, okuti va tunda oco va piluke, omunu lomunu pokati kene, o sukila oku tunda voviumbo viayuva loku kuata ukãi umue pokati kafeko vo ko Silo kuenje vu sukila oku tiukila kofeka ya Benjamini.
22 Nda va isiavo ale vamanjavo veya oku lisiõsuĩla kokuetu, tu va sapuila tuti: ‘Tu lingi ohenda mekonda liavo, momo ka tua tẽlele oku eca komunu lomunu ukãi umue vuyaki+ kuenda nda wa eceli ukãi umue kokuavo nda wa kuati eko.’”+
23 Omo liaco, eci oco alume va Benjamini va linga kuenda omunu lomunu pokati kavo, wa kuata ukãi umue pokati kakãi vana va kala oku piluka. Noke liovina viaco, ovo va tiukila kocipiñalo cavo kuenda va tumbulula alupale avo+ loku tungamo.
24 Kuenje vepuluvi liaco, va Isareli va li sandola omunu lomunu kocikoti caye kuenda kepata liaye kuenje ovo va tundapo omunu lomunu kocipiñalo caye.
25 Koloneke viaco, ka kua kaile osoma ko Isareli.+ Omunu lomunu wa enda oku linga eci co sungulukila kovaso aye.*
