Olonganji 3:1-31
3 Evi ovio via kala olofeka Yehova a ecelela okuti viamamako oco vi seteke va Isareli vosi vana okuti, ka va la panga onepa kovoyaki o ko Kanana+
2 (eci ca lingiwila oco ovitumbulukila via va Isareli vi lilongise oku yaka okuti, vana ka va la pita lovina viaco kosimbu):
3 olombiali vitãlo via va Filisiti,+ la va Kanana vosi, va Sidono+ kuenda va Hivi+ vana va kala olonungi vio Komunda Levanone+ oku upisa Komunda Baale-Herimone toke ko Lebo-Hamati.*+
4 Olofeka evi via kala oseteko yimue ku va Isareli oco ku eciwe uvangi nda va Isareli va ponduile oku pokola kovihandeleko via Yehova, vina via eciwile ku va isiavo pocakati ca Mose.+
5 Omo liaco, va Isareli va kala pokati ka va Kanana,+ la va Hiti, la va Amori, la va Perisi, la va Hivi kuenda va Yevusi.
6 Va Isareli va enda oku kuela lomãla vakãi volofeka viaco kuenda va enda oku eca omãla vavo vakãi komãla valume volofeka viaco kuenje va fetika oku vumba olosuku viavo.+
7 Omo liaco, va Isareli va linga ovina vĩvi kovaso a Yehova kuenje va ivala Yehova Suku yavo kuenda va vumba va Baale+ kumue lolombueti viavo vi kola.*+
8 Kuenje onyeño ya Yehova ya wengukila o Isareli noke wa va landisa peka lia Kusiana-Risiatayimi soma yo ko Mesopotamia.* Va Isareli va talavayela Kusiana-Risiatayimi vokuenda kueci ci soka anyamo ecelãla.
9 Eci va Isareli va pinga ekuatiso ku Yehova,+ Yehova wa va katuila upopeli umue oco a yovole va Isareli+ okuti, Otiniyele+ omõla a Kenasi manji umalẽhe wa Kalembe.
10 Espiritu lia Yehova lio wila+ kuenje eye wa linga onganji yo Isareli. Eci eye a tunda oku ka linga uyaki, Yehova wa eca peka liaye Kusiana-Risiatayimi soma yo Mesopotamia* kuenje wa yula Kusiana-Risiatayimi.
11 Noke liovina viaco, ofeka ya kuata epuyuko* vokuenda kueci ci soka 40 kanyamo. Kuenje Otiniyele omõla a Kenasi wa fa.
12 Va Isareli va fetika vali oku linga ovina vĩvi kovaso a Yehova.+ Omo liaco, Yehova wa ecelela okuti Egilone soma yo Moavi+ o pama vali okuti va Isareli ci sule, momo ovo va linga ovina vĩvi kovaso a Yehova.
13 Handi vali, Egilone wa nena kokuavo va Amoni+ kuenda va Amaleke.+ Ovo va katukila o Isareli kuenda va tambula olupale luoviti vieva.+
14 Va Isareli va talavayela Egilone soma yo Moavi ci soka 18 kanyamo.+
15 Noke va Isareli va pinga ekuatiso ku Yehova+ kuenje Yehova wa va katuila upopeli umue+ okuti, Ehudi+ omõla a Gera u Benjamini+ okuti wa kala ukuepĩli.+ Vokuenda kuotembo, va Isareli vo tuma oku tuala ulambu ku Egilone soma yo Moavi.
16 Votembo yaco, Ehudi wa lipangela eye muẽle osipata yimue ya tua olonele vivali haiyo yi kuete ukeya* umosi koku lepa kuenje wa yi kutila vocikalo caye condio kosi yuwalo waye.
17 Noke eye wa eca ulambu ku Egilone soma yo Moavi. Egilone wa kala ulume umue wa lẽla calua.
18 Eci Ehudi a mala oku eca ulambu, eye wa enda kumue lomanu vana va ambatele ulambu waco.
19 Pole, eci a pitĩla koviñumañuma* vio ko Giligali,+ eye wa tiukila konyima loku popia hati: “Ñuete esapulo limue lio vuyombeki lioku eca kokuove, A soma.” Kuenje soma wa popia hati: “Ũhĩko!” Noke liovina viaco, akuenje vaye vosi va tunda kovaso aye.
20 Omo liaco, Ehudi wamẽla kokuaye osimbu eye a kala oku tumãla lika liaye vohondo yosapalalo mu talala. Noke Ehudi wa popia hati: “Ñuete esapulo limue lioku eca kokuove lia tunda ku Suku.” Omo liaco, eye wa loka kocalo* caye.
21 Noke Ehudi wa somõla osipata ya kala vocikalo caye condio leka liaye liepĩli kuenda wa yi toma vimo lia soma.
22 Osipata yosi ya iñila oku kongelamo ocikundo caco kuenje ulela wa lu sitika, momo Ehudi kopile osipata vimo liaye kuenda aniña a tunda.
23 Ehudi wa tundila vocimbimbi* kuenje wa yika apito ohondo yosapalalo poku tunda kuenda wa a pangeka.
24 Noke lioku tunda, akuenje va soma va tiuka kuenda va mola okuti apito ohondo yosapalalo a pangekiwa. Omo liaco, ovo va popia vati: “Citava okuti o kasi kusenge* vohondo ya talala yo vokati.”
25 Ovo vamamako oku kevelela toke eci va sakalala, pole, eci va limbuka okuti eye ka kaile oku yikula apito ohondo yosapalalo, ovo vopa osapi loku a yikula kuenje va mola okuti cime cavo wa kupukila posi* kuenda wa fa.
26 Ehudi wa puluka osimbu ovo va kala oku cilua kuenda eye wa pita ocipepi loviñumañuma*+ kuenje wa pitĩla ciwa ko Seira.
27 Eci eye a pitĩla, wa sika ombinga+ kovaimbo a kasi kolomunda via Efarimi;+ kuenje va Isareli va loka kovaimbo a kasi kolomunda kumue laye kuenda eye wa kala kovaso yavo.
28 Noke, eye wa va sapuila hati: “Ñuami, momo Yehova wa eca peka liene ovanyãli vene va Moavi.” Omo liaco, ovo vo kuama kuenje va tambula olonepa viosi vioku yoka o Yordão oco va Moavi ka va ka puluke kuenje ovo ka va ecelele laumue oku yoka.
29 Vepuluvi liaco, ovo va kundula 10.000 ya va Moavi+ okuti, alume vosi va pama haivo vakuotõi; lomue pokati kavo wa pulukapo.+
30 Omo liaco, Moavi wa yuliwa keteke liaco peka lia Isareli; kuenje ofeka ya kuata epuyuko* vokuenda kueci ci soka 80 kanyamo.+
31 Noke lia Ehudi, kueya Siamigara+ omõla a Anate, una wa kundula 600 kalume va Filisiti+ lombueti yimue ya songoloka yoku songuila olongombe;+ eye wa popelavo va Isareli.
Atosi Pombuelo
^ Ale “koku iñilila ko Hamati.”
^ Tala Elomboluilo.
^ Lit., “Arama-Naharayimi.”
^ Lit., “Arama.”
^ Ale “ombembua.”
^ Pamue ukeya umue wambuta u kuete 38 kolosentimetulu. Tala Alombo. B14.
^ Ale pamue, “kovawe a songiwa.”
^ Ale “komangu.”
^ Ale pamue, “ponjanela.”
^ Lit., “oku sikĩlĩla ovolu vaye.”
^ Lit., “ongongo.”
^ Ale pamue, “ovawe a songiwa.”
^ Ale “ombembua.”
