Olonganji 4:1-24
4 Noke yolofa via Ehudi, va Isareli va linga vali eci cĩvi kovaso a Yehova.+
2 Omo liaco, Yehova wa va landisa peka lia Yavini soma yo Kanana,+ una wa vialele ko Hasore. Kesongo kolohoka viaye wa kala Sisera, una wa kala ko Haroseta+ yolofeka.*
3 Va Isareli va vilikiya ku Yehova,+ momo Yavini* wa kuata 900 kakãlu uyaki kumue lakãlu utale+ kuenje eye wa kangisa calua va Isareli+ vokuenda kueci ci soka 20 kanyamo.
4 Devora uprofeto umue ukãi,+ okuti ukãi wa Lapidoti, wa kala oku tetuluila o Isareli kotembo yaco.
5 Eye wa enda oku tumãla vemẽhi liuti weva wa Devora pokati ko Rama+ lo Betele+ kovaimbo a kasi kolomunda via Efarimi; va Isareli va siatele oku enda kokuaye oco a va lomboluile eci catiamẽla kasombiso a Suku.
6 Eye wa tuma oku vilikiya Baraka+ omõla a Avinoama ko Kedesi-Nafitali+ kuenda wo sapuila hati: “Yehova Suku ya Isareli ka ecele hẽ kokuove ocihandeleko? ‘Kuende, loña* Komunda Tavore kuenda ambata 10.000 kalume va Nafitali la va Sevulono.
7 Ndi kokela kokuove Sisera kesongo kolohoka via Yavini kumue lakãlu aye uyaki lasualali vaye kolui* luo Kisone+ kuenda ndu weca peka liove.’”+
8 Kuenje Baraka wo sapuila hati: “Nda ove enda lame, ame ngenda, pole, nda ku endi lame, si endi.”
9 Ukãi wa tambulula hati: “Ocili okuti ame ngenda love. Pole, ulamba ka u ka kala wove momo Yehova o ka ecelela ukãi umue oco a ponde Sisera.”+ Noke Devora wa votoka kuenda wa enda la Baraka ko Kedesi.+
10 Baraka wa kovongela Sevulono la Nafitali+ ko Kedesi kuenje ci soka 10.000 kalume vo kuama. Devora wa endavo laye.
11 Heveri u Keni wa litepele la va Keni,+ vana va kala ovitumbulukila via Hovava, ndatembo ya Mose+ kuenda ombalaka yaye ya tungiwile ocipepi luti umue unene ko Canani u kasi ko Kedesi.
12 Ovo va sapuila Sisera okuti Baraka omõla a Avinoama wa lamanela Komunda Tavore.+
13 Vonjanja yimosi, Sisera wongolola akãlu aye osi uyaki okuti 900 kakãlu kumue lakãlu utale kuenda asualali vosi vana va kala kumue laye oku upisa ko Haroseta yolofeka oco va ende toke kolui* luo Kisone.+
14 Devora wa sapuila Baraka hati: “Katuka, momo lilo olio eteke Yehova a ka eca Sisera peka liove. Yehova hayeko hẽ o ka pita kovaso yove?” Kuenje Baraka wa lokila oku upisa Komunda Tavore leci ci soka 10.000 kalume vana vo kuama.
15 Noke, Yehova wa kapa vombuanja+ Sisera kumue lakãlu aye osi uyaki lolohoka viosi kovaso yosipata ya Baraka. Oku sulako Sisera wa loka vekãlu liaye kuenje wa endela posi poku tila.
16 Baraka wa landula akãlu uyaki kuenda olohoka toke ko Haroseta yolofeka. Omo liaco, olohoka viosi via Sisera via kupuka losipata; lomue pokati kavo wa supapo.+
17 Pole, Sisera wa endela posi poku tila toke vombalaka ya Yaele+ ukãi wa Heveri+ u Keni momo pokati ka Yavini+ soma yo Hasore lonjo ya Heveri u Keni pa kala ombembua.
18 Noke Yaele wa tunda oku ka lisanga la Sisera kuenje wa popia laye hati: “Iñila a ñala yange, iñila mulo. Ku ka kuate usumba.” Omo liaco, eye wa iñila vombalaka yukãi kuenda wo sikĩlĩla lombilikiti.
19 Kuenje eye wa popia lukãi hati: “Mange ohenda nyĩheko ovava oku nyua momo ñuete enyona.” Omo liaco, ukãi wa yikula onjeke yocipa yi kuete asenjele kuenje wo wĩhako oco a nyue,+ noke liovina viaco ukãi wo sikĩlĩla vali.
20 Eye wa sapuila ukãi hati: “Talama puvelo wombalaka kuenda nda omunu umue wa ku pulisa hati: ‘Anga hẽ mulo muli ulume umue?’ popia okuti: ‘Sio!’”
21 Pole, Yaele ukãi wa Heveri, wa kuata ombambo yombalaka kuenda omatelo yimue. Kuenje osimbu Sisera a kala oku pekela otulo tuelume kuenda wa kavele, ukãi levando wa amela kokuaye kuenje wo valela ombambo yimue yinene pombandu yutue waye loku yi valela posi kuenje wa fa.+
22 Baraka wa endako oku landula Sisera kuenje Yaele wa tunda oku lisanga laye kuenda wo sapuila hati: “Enju kuenje ame ndu ku lekisa ulume o kasi oku sandiliya.” Eye wa enda kumue laye kuenje wa mola Sisera posi okuti wa fa kuenda o peleko yombambo ya kala vombandu yutue waye.
23 Omo liaco, keteke liaco Suku wa yula Yavini soma yo Kanana kovaso ya va Isareli.+
24 Eka lia va Isareli liamamako oku pama calua poku katukila Yavini soma yo Kanana,+ toke eci va kundula Yavini soma yo Kanana.+
Atosi Pombuelo
^ Ale “Haroseta-Goyimi.”
^ Lit., “eye.”
^ Ale “Kapa alume vove ko.”
^ Ale “ekango.”
^ Ale “ekango.”
