Olonganji 7:1-25
7 Noke Yerubaale okuti haeye Gideone+ kumue lasualali vosi vana va kala laye, va katuka selo kuenje va tungila ocilombo ocipepi locisimo co Haroda osimbu ocilombo co Midiane ca kala konano yocilombo ca Gideone kowulu wo Morehi vocimbota co vetapi.*
2 Yehova wa sapuila Gideone hati: “O kasi lasualali valua oco ngece Midiane peka liove.+ Sanga Isareli o litunula kuenje o popia lame hati: ‘Eka liange muẽle lia mopela.’+
3 Kaliye, linga esapulo kovaso yomanu liokuti: ‘Omunu wosi o kasi lusumba haeye o kasi oku luluma, a tiukile konjo.’”+ Omo liaco, Gideone wa va kapa voseteko. Kuenje 22.000 kasualali, va tiukila konjo kuenda pa siala 10.000.
4 Handi vali, Yehova wa sapuila Gideone hati: “Handi kuli asualali valua. Lokila lavo kovava oco ndu ku kuatise oku va seteka kocitumãlo caco. Eci ame ndi popia love siti: ‘Omunu u enda love,’ eye enda love, pole, eci ndi popia love siti ‘Omunu u ka endi love,’ eye ka endi love.”
5 Omo liaco, eye wa ambata asualali toke kovava.
Noke Yehova wa sapuila Gideone hati: “Tepa wosi una o nyua ovava lelimi ndeci ombua yi linga, pokati ka vana va kekama kolongolo poku nyua.”
6 Etendelo liasualali vana va nyua ovava loku lesa, poku kapa ovaka avo komẽla lia kala 300 kalume. Pole, asualali vakuavo va kekama kolongolo poku nyua.
7 Noke Yehova wa sapuila Gideone hati: “Ame ndu ku popeli leci ci soka 300 kasualali, vana va nyuila ovava peka liavo kuenda ame ndi ka eca o Midiane peka liove.+ Pole, ecelela okuti asualali vosi vakuavo va tiukila konjo.”
8 Noke lioku tambula okulia kuenda olombinga kasualali, eye wa tuma alume vosi vakuavo va Isareli oku tiukila konjo kuenda wa siala lika leci ci soka 300 kalume. Ocilombo co Midiane ca kala kombuelo yaye vocimbota co vetapi.+
9 Vokuenda kuteke waco, Yehova wo sapuila hati: “Katuka kuenda katukila ocilombo, momo nda ceca peka liove.+
10 Pole, nda o kasi lusumba woku katukila, lokila kocilombo caco kumue la Pura oñuatisi yove.
11 Yevelela ovina va kasi oku popia kuenje o ka kuata utõi* woku katukila ocilombo.” Noke eye kumue la Pura oñuatisi yaye, va lokila toke kesulilo liocilombo colohoka.
12 Midiane kuenda Amaleke lomanu vosi vo Kutundilo+ va liyala vocimbota co vetapi ndondunda yolohuma kuenda olongamelo viavo oku vi tenda ka ci tẽliwa,+ via luile calua ndeseke li kasi kohulo yokalunga.
13 Eci Gideone a pitĩla, kua kala esualali limue lia kala oku lomboluila onjoi yimue kekamba liaye kuenda lia popia liti: “Eyi oyo onjoi nda lota. Kua kala ombolo yimue yosevata yi kasi ndombunge okuti ya ñuala ñuala kocilombo ca Midiane. Oyo ya pitĩla kombalaka yimue kuenda ya veta longusu ombalaka yaco kuenje ya kupuka.+ Ombolo yaco, ya lingisa okuti ombalaka yi tiñuha okuti ci kasi kilu ciya kosi kuenje ombalaka ya kupuka.”
14 Noke ekamba liaye lia popia liti: “Citava lika okuti osipata ya Gideone,+ omõla a Yoasi ulume umue u Isareli. Suku wa eca Midiane kuenda ocilombo cosi peka liaye.”+
15 Eci Gideone a yeva elomboluilo lionjoi kumue lesituluilo liaco,+ eye wa petama oco a fendele. Noke liovina viaco, eye wa tiukila kocilombo co Isareli kuenda wa popia hati: “Katuki momo Yehova wa eca ocilombo co Midiane peka liene.”
16 Noke eye wa tepa 300 kasualali vovimunga vitatu kuenda wa eca ku vosi yavo olombinga+ kuenda asanga anene kumue lovitonga vokati kasanga aco.
17 Kuenje wa va sapuila hati: “Lavululi kuenda lingi eci ndi linga. Eci ame ndi pitĩla kesulilo liocilombo ene vu sukila oku linga ndomo ndi linga.
18 Eci ame kumue la vosi va kasi lame tu sika olombinga, ene vu sukilavo oku sika olombinga kolonele viosi viocilombo kuenda kaluki hati: ‘Ca Yehova kuenda ca Gideone!’”
19 Gideone kumue leci ci soka 100 kasualali vana va kala laye, va pitĩla toke kesulilo liocilombo kefetikilo liundavululi* wavali kuteke, noke yoku pongolola olondavululi. Ovo va sika olombinga+ kuenda va tetola asanga anene ana a kala povaka avo.+
20 Omo liaco, ovimunga vitatu via sika olombinga kuenda via tetola asanga anene. Ovio via kuata ovitonga leka liepĩli kuenda via sika olombinga leka liondio kuenje via vilikiya lolukandi viti: “Osipata ya Yehova kuenda ya Gideone!”
21 Ulume lulume wa talama pocitumãlo caye konele yosi yocilombo kuenda olohoka viosi via fetika oku lupuka loku kaloloka osimbu va kala oku tila.+
22 Osimbu 300 kalume vamamako oku sika olombinga Yehova wa lingisa okuti, osipata yomunu lomunu yi ñualelapo omunu lukuavo vocilombo;+ kuenje olohoka via tila toke ko Bete-Sita, ko Serera toke kongave yo Abele-Maholati+ ocipepi lo Tabata.
23 Noke asualali va Isareli va kovongiwa oku upisa ko Nafitali, ko Asiyere lo ko Manase yosi+ kuenje va landula va Midiane.
24 Gideone wa tuma olomunga kovaimbo osi a kasi kolomunda via Efarimi poku popia hati: “Loki oco vu katukili Midiane kuenda tambuli olonjila vioku yoka ovava toke ko Bete-Bara kuenda o Yordão.” Omo liaco, asualali vosi va Efarimi va kongeliwa pamosi kuenje va tambula olonjila vioku yoka ovava toke ko Bete-Bara kuenda o Yordão.
25 Ovo va kuatavo olombuale vivali vio Midiane okuti, Oreve la Seve; ovo va pondela Oreve kewe lia Oreve+ kuenda va ponda Seve pocikoselo cayuva ca Seve. Ovo vamamako oku landula Midiane+ kuenda va nena ovitue via Oreve la Seve ku Gideone vofeka yo Yordão.
Atosi Pombuelo
^ Ale “etapi lia vomba.”
^ Lit., “ovaka ove a ka pama.”
^ Oku upisa kowola 10 kuteke toke kowola 2 komẽle.
