Olonganji 8:1-35
8 Noke alume va Efarimi va popia laye vati: “Nye wa linga kokuetu? Momo lie kua tu vilikiyile eci wa endele oku ka liyaka lo Midiane?”+ Kuenje va fetika oku lihoyisa calua laye.+
2 Pole, eye wa va sapuila hati: “Nye ame nda linga okuti ca velapo vali ovina ene wa lingi? Ovisupe viayuva a Efarimi+ ka via velelepo hẽ oku ungula kuayuva a Aviyesere?+
3 Suku wa eca olombuale vio Midiane okuti, Oreve la Seve peka liene+ kuenda nye ame nda linga okuti ca velapo vali ovina ene wa lingi?” Eci eye a popia lonjila* yaco, ovo va tulumũha.*
4 Noke Gideone weya ko Yordão kuenje wa yoka. Eye leci ci soka 300 kasualali vana va kala laye, ndaño va kavele, pole, vamamako oku landula ovanyãli vavo.
5 Omo liaco, eye wa sapuila alume vo ko Sukote hati: “Mangi ohenda, eci olombolo komanu va kasi oku ndi kuama, momo ovo va kava kuenda ame ñasi oku landula Seva la Salimuna olosoma vio Midiane.”
6 Pole, olombuale vio ko Sukote via popia viti: “Anga hẽ Seva la Salimuna* va kasi ale peka liove oco tu ece olombolo kolohoka viove?”
7 Kuenje Gideone wa tambulula hati: “Omo liovina viaco, eci Yehova a eca Seva la Salimuna peka liange, ndi ka ku tipuli lolosongo kuenda locambanda co vekalasoko.”+
8 Noke eye wa lamanela oku upisa kocitumãlo caco toke ko Penuele kuenje wa linga epingilo limuamue, pole, alume vo ko Penuele, va eca etambululo limuamue ndeli lialume vo ko Sukote.
9 Kuenje eye wa sapuilavo alume vo ko Penuele hati: “Eci ame ndi tiuka lombembua, ndi lundula osapalalo eyi.”+
10 Seva la Salimuna va kala ko Karikore lolohoka viavo, vina vi soka 15.000 kalume. Ava ovo vosi vana va supilepo pokati kolohoka viosi viomanu vo Kutundilo,+ momo ci soka 120.000 kalume vana va limalẽha lolosipata va pondiwa.
11 Gideone wamamako oku lamanela vonjila ya vana va tunga volombalaka kutundilo wo Nova kuenda wo Yogibeha+ kuenje wa katukila ocilombo cina ka ca kuatele olondavululi.
12 Eci Seva la Salimuna va tila, eye wa va landula kuenje wa kuata olosoma viaco vivali vio Midiane okuti, Seva la Salimuna kuenda wa kokela usumba ocilombo cosi.
13 Noke Gideone omõla a Yoasi wa tiuka kuyaki vonjila yi lamanela ko Heresi.
14 Vonjila eye wa kuata umalẽhe umue wo ko Sukote kuenda wo pula kuenje umalẽhe waco wo sonehela olonduko violombuale kuenda viakulu vo ko Sukote va soka 77 kalume.
15 Noke eye wa enda toke kalume vo ko Sukote kuenda wa va sapuila hati: “Seva la Salimuna vava, vana ene wa ndi fuanguili poku popia hati: ‘Anga hẽ Seva la Salimuna* va kasi ale peka liove oco tu ece olombolo kalume vove va kava?’”+
16 Noke eye wa kuata akulu vo volupale kuenje lolosongo kuenda ocambanda co vekalasoko wa kangisa alume vo ko Sukote.+
17 Kuenje eye wa lundula osapalalo ya Penuele+ kuenda wa ponda alume vo volupale.
18 Eye wa pula Seva la Salimuna hati: “Alume ene wa pondi ko Tavore va kala ndati?” Ovo va tambulula vati: “Ovo va kala ndove, omunu lomunu pokati kavo wa molẽhele ndomõla wosoma.”
19 Noke wa va sapuila hati: “Ovo va kala vamanjange okuti omãla va ina yange. Ocili, ndeci Yehova a kasi lomuenyo nda wa popeleli ovimuenyo viavo nda sia ku pondeli.”
20 Kuenje wa sapuila Yetere omõlaye uveli hati: “Katuka, va ponda.” Pole, umalẽhe kopile osipata yaye; eye wa kala lusumba momo wa kala handi umalẽhe.
21 Omo liaco, Seva la Salimuna va popia vati: “Katuka ove muẽle kuenda tu ponde, momo ulume o sombisiwa omo liunene* waye.” Kuenje Gideone wa katuka yu wa ponda Seva la Salimuna+ kuenda wa tikula ovikuata vioku liposuisa vi kasi ndosãi yokaliye vina via kala kosingo yolongamelo viavo.
22 Noke alume va Isareli va sapuila Gideone vati: “Tu viale, ove kumue lomõla wove kuenda onekulu yove, momo ove wa tu popela peka lio Midiane.”+
23 Pole, Gideone wa va sapuila hati: “Hameko ndu ku viali, ndaño omõlange layevo ka ku viali. Yehova eye o ku viali.”+
24 Gideone wamisako hati: “Ngeceleli oku linga epingilo limue kokuene: omunu lomunu pokati kene, a nyĩhe ocimbilingu cimosi co kenyulu pokati kovina viaye via pundiwa.” (Vana va yuliwa va kuatele ovimbilingu viulu vio kenyulu momo va kala va Isameli.)+
25 Ovo va tambulula vati: “Etu tu vi eca kokuove.” Omo liaco, ovo va yala ocikutu cimue kuenje ulume lulume wa imbapo, ocimbilingu cimosi co kenyulu copiwa kovina viaye via pundiwa.
26 Oku lema kuovimbilingu viulu vio kenyulu vina eye a pinga kua sokele 1.700 kolosiekele* viulu. Pole, ovikuata vioku liposuisa vi kasi ndosãi yokaliye, ovimbilingu, ovowalo a vumbula* a enda oku waliwa lolosoma vio Midiane kuenda olomota violongamelo, ka via tendiwile.+
27 Gideone wa talavaya lulu waco oco a tonge evendalia limue+ kuenje wa li kapa volupale luaye okuti, o Ofira;+ kuenda o Isareli yosi ya linga lalio upuepue konepa yespiritu kocitumãlo caco+ kuenda lia kala ndonjanjo ku Gideone lo kuvakuanjo yaye.+
28 Omo liaco, o Midiane+ ya yuliwa la va Isareli kuenje ka va va katukilile* vali; kuenje ofeka ya kuata epuyuko* vokuenda kueci ci soka 40 kanyamo koloneke via Gideone.+
29 Kuenje Yerubaale+ omõla a Yoasi wa tiukila konjo yaye kuenda oko amamako oku kala.
30 Gideone wa linga isia yeci ci soka 70 komãla,* momo wa kuatele akãi valua.
31 Ukama waye ko Sekeme wo citilavo omõla umue ulume kuenje wo luka hati Avimeleke.+
32 Kuenje Gideone omõla a Yoasi wa fa noke yoku kala komuenyo otembo yalua kuenje wa kendiwa veyambo lia Yoasi isiaye ko Ofira ya va Aviyesere.+
33 Noke lioku fa kua Gideone, va Isareli va linga vali upuepue konepa yespiritu la va Baale+ kuenda va nõla Baale-Beriti ndosuku yavo.+
34 Va Isareli ka va ivalukile Yehova Suku yavo+ una wa va yovola peka liovanyãli vavo vosi vana va va ñualele;+
35 kuenda ka va lekisile ocisola ka ci pongoloka ku vakuanjo ya Yerubaale okuti Gideone ndaño lovina viosi viwa eye a lingila o Isareli.+
Atosi Pombuelo
^ Lit., “ondaka.”
^ Lit., “espiritu liavo lia tulumũha kokuaye.”
^ Lit., “eka lia Seva kuenda lia Salimuna.”
^ Lit., “eka lia Seva kuenda lia Salimuna.”
^ Ale “ndomo ulume a kasi, haico ci kasi ongusu yaye.”
^ Osiekele yimosi ya kuatele ocilemo ci soka 11.4 kolograma. Tala Alombo. B14.
^ Okuti, a pangiwa lovonya ovinyama.
^ Ale “ombembua.”
^ Lit., “ka va petuile vali utue wavo.”
^ Lit., “wa kuatele 70 komãla vana va tunda kocikalo caye.”
