Olonganji 9:1-57
9 Vokuenda kuotembo Avimeleke+ omõla a Yerubaale, wa enda toke ku vamanji va inaye ko Sekeme kuenda wa popia lavo kumue lepata liosi lia sekulu* yaye hati:
2 “Mangi ohenda, pulisi kasongui* vosi vo ko Sekeme hati: ‘Nye ca sunguluka kokuene, hĩse u vialiwi lomãla vosi va Yerubaale va soka 70,+ ale hĩse oku vialiwa lulume umosi? Ivaluki okuti ame ndikepa kuenda ndisitu yene.’”*
3 Omo liaco, vamanji va inaye va pitiya olondaka viaye kasongui vosi vo ko Sekeme kuenje ovitima viavo via vetiyiwa oku kuama Avimeleke, momo va popia vati: “Eye manjetu.”
4 Noke va eca kokuaye 70 kolosiekele violopalata via tunda konjo* ya Baale-Beriti+ kuenje Avimeleke wa pañinya lavio alume vakuakutungayala kuenda olonjaki oco vo kuame.
5 Noke liovina viaco, eye wa enda toke konjo ya isiaye ko Ofira+ kuenda wa ponda vamanjaye okuti,+ omãla va Yerubaale va soka 70 kalume, kilu liewe limuamue. Umosi lika wa supapo okuti, Yotama omõla umalẽhe wa Yerubaale momo wa salamẽle.
6 Noke asongui vosi vo ko Sekeme lo Bete-Milo yosi va liongolola kuenje va vialeka Avimeleke+ oco a linge osoma ocipepi luti unene, ocipepi longunji ya kala ko Sekeme.
7 Eci va sapuila ovina viaco ku Yotama, eye wa enda vepuluvi liaco kuenda wa talama kilu Liomunda Gerisimi+ kuenje wa vilikiya londaka yimue yolukandi kokuavo hati: “Ndi yeveleli ene asongui vo ko Sekeme kuenje Suku o ku yeveleli.
8 “Eteke limue kua kala oviti vimue okuti, via enda oco vi li nõlele osoma yimue. Kuenje ovio via sapuila uti wo oliveira viti: ‘Tu viale.’+
9 Pole, uti wo oliveira wa va sapuila hati: ‘Anga hẽ ca sunguluka oku siapo ulela wange* una va siata oku kemãlisa lawo Suku kuenda alume oco ngende loku tuñunyila kilu lioviti vikuavo?’
10 Noke oviti via sapuila uti wukuyu viti: ‘Enju kuenda tu viale.’
11 Pole, uti wukuyu wa va sapuila hati: ‘Anga hẽ ca sunguluka oku siapo oku sõsa kuange kuenda epako liange liwa oco ngende loku tuñunyila kilu lioviti vikuavo?’
12 Noke oviti via sapuila uyuva viti: ‘Enju kuenda tu viale.’
13 Uyuva wa va tambulula hati: ‘Anga hẽ ndi sukila oku siapo ovinyu yange yokaliye yina yi sanjuisa Suku lomanu oco ngende loku tuñunyila kilu lioviti vikuavo?’
14 Oku sulako oviti viosi vikuavo via sapuila uti wocilavi viti: ‘Enju kuenda tu viale.’+
15 Omo liaco, uti wocilavi wa sapuila oviti vikuavo hati: ‘Nda ocili okuti ene vu kasi oku ndi waveka ndosoma yene enjui kuenda sandi ocivundilo vemẽhi liulembo wange. Pole, nda hacoko, ondalu yi tunde kuti wocilavi kuenda yi lie oviti viosedru vio ko Levanone.’
16 “Anga hẽ cilo wa lekisi esunguluko lesumbilo poku vialeka Avimeleke oco a linge osoma+ kuenda wa lekisi hẽ ohenda ku Yerubaale la vakuanjo yaye loku u tata ndomo eye a sesamẽla?
17 Eci isiange a ku yakeliko+ eye wa kapa kohele omuenyo waye oco a ku popeli peka lio Midiane.+
18 Pole, etaili wa ñualelipo vakuanjo ya isiange kuenda wa pondi omãla vaye va soka 70 kalume kilu liewe limuamue.+ Noke wa lingisi Avimeleke omõla wupika waye ukãi+ osoma yakulu vo ko Sekeme omo okuti, manjene.
19 Nda ene vu kasi oku lekisa esunguluko lesumbilo ku Yerubaale kuenda ku vakuanjo yaye keteke lietaili, sanjukili kumosi la Avimeleke kuenda eye a sanjukilevo kumosi lene.
20 Nda hacoko, ondalu yi tunde ku Avimeleke kuenje yi lie asongui vo ko Sekeme lava vo ko Bete-Milo+ kuenda ondalu yi tunde kasongui vo ko Sekeme lava vo ko Bete-Milo kuenje yi lie Avimeleke.”+
21 Noke Yotama+ wa tila kuenda wa enda ko Bere kuenje oko a kala omo lia manjaye Avimeleke.
22 Avimeleke wa viala* o Isareli vokuenda kuanyamo atatu.
23 Kuenje Suku wa ecelela okuti pokati ka Avimeleke lasongui vo ko Sekeme pa kala esuvu* kuenje ovo va lingila usuanji Avimeleke.
24 Eci ca lingiwila oco okuti, ungangala wa lingiwa komãla va soka 70 va Yerubaale u fetuluinyiwa, oco eko liosonde yavo yi wile ku manjavo Avimeleke omo lioku va ponda+ kuenda kasongui vo ko Sekeme omo lioku u kuatisa oku ponda vamanjaye.
25 Omo liaco, asongui vo ko Sekeme va kapa alume oco vo lavekele kilu liolomunda kuenje ovo va enda oku nyana omunu wosi wa enda oku pita ocipepi lavo vonjila. Vokuenda kuotembo, ovina viaco via sapuiwa ku Avimeleke.
26 Noke Gaala omõla a Evede kumue la vamanjaye, veya ko Sekeme+ kuenda asongui vo ko Sekeme va lekisa ekolelo kokuaye.
27 Ovo, va enda kepia kuenda vongolola loku kosa ayuva oviumbo viavo kuenje va linga ocipito cimue noke va iñila vonjo ya suku yavo,+ va lia va nyua kuenda va siñala Avimeleke.
28 Noke Gaala omõla a Evede wa popia hati: “Helie Avimeleke kuenda helie Sekeme okuti tu sukila oku u vumba? Haeyeko hẽ omõla a Yerubaale+ kuenda Sevulu haeyeko hẽ onumiwa yaye? Vumbi alume va Hamore isia ya Sekeme! Pole, momo lie vu sukilila oku u vumba?
29 Nda omanu ava va songuiwile lame ame nda nda tundisa Avimeleke.” Noke eye wa sapuila Avimeleke hati: “Vokiya asualali vove kuenda enju oku liyaka lame.”
30 Eci Sevulu ombuale yolupale a yeva olondaka via Gaala omõla a Evede, onyeño yaye ya wenguka.
31 Omo liaco, vuyombeki* wa tuma olomunga ku Avimeleke hati: “Tala! Gaala omõla a Evede kumue la vamanjaye cilo va kasi ko Sekeme kuenda kulo va kasi loku sosuiya olupale oco va ku ñualelepo.
32 Kaliye, enju luteke ove kumue lalume vove kuenda lavekela vepia.
33 Komẽle eci ekumbi li tunda ove o sukila oku votoka selo loku katukila olupale; kuenda eci eye kumue lalume vaye va tunda oku liyaka love, linga cosi o tẽla oco o va yule.”*
34 Omo liaco, Avimeleke kumue lomanu vosi va kala laye va katuka luteke kuenje ovo va lavekela Sekeme vovimunga vi soka vikuãla.
35 Eci Gaala omõla a Evede a tunda loku talama puvelo wombundi yolupale, Avimeleke kumue lomanu va kala laye va tunda kocitumãlo va kala oku lavekela.
36 Eci Gaala a mola omanu, wa sapuila Sevulu hati: “Tala! Kuli omanu va kasi loku loka oku tundilila kilu liolomunda.” Pole, Sevulu wo sapuila hati: “Ove o lete ovolembo olomunda ndu okuti alume.”
37 Noke Gaala wa popia hati: “Tala! Omanu va kasi loku loka oku tundilila vokati kolupale kuenda ocimunga cimue ci kasi oku iyilila vonjila yuti unene wa Meonenimi.”
38 Sevulu wo tambulula hati: “Cilo, oku litunula kuove ku kasi pi, eci wa popia hati: ‘Helie Avimeleke okuti tu sukila oku u vumba?’+ Havoko hẽ ava omanu wa likala? Kaliye tunda kuenda liyaka lavo.”
39 Omo liaco, Gaala wa tunda kovaso yasongui vo ko Sekeme kuenje wa liyaka la Avimeleke.
40 Avimeleke wo landula kuenda Gaala wa tila kuenje omanu valua va pondiwila vonjila toke puvelo wombundi yolupale.
41 Avimeleke wamamako oku kala ko Aruma kuenje Sevulu+ wa tundisa Gaala kumue la vamanjaye ko Sekeme.
42 Keteke lia kuamamo, omanu va enda kepia kuenje va sapuila Avimeleke catiamẽla kondaka yaco.
43 Omo liaco, eye wa tepa omanu vovimunga vitatu kuenda wa va kapa oku lavekela vepia. Eci a mola omanu okuti va kala oku tunda volupale, eye wa va katukila loku va ponda.
44 Avimeleke kumue lovimunga via kala laye, vamako kovaso kuenje va kala koku iñilila kuombundi yolupale osimbu okuti, ovimunga vivali via katukila vosi vana va kala kepia kuenda va va ponda.
45 Avimeleke wa yaka lolupale keteke liaco liosi kuenda wa lu tambula. Eye wa ponda omanu va kalamo noke wa lundula olupale+ kuenje wa lu waya omongua.
46 Eci asongui vosi vosapalalo yo ko Sekeme va yeva eci catiamẽla kondaka yaco, vepuluvi liaco va enda vocitililo* conjo* ya Beriti.+
47 Eci Avimeleke a yeva okuti asongui vosi vosapalalo yo ko Sekeme va liongoluila pamosi,
48 Avimeleke kuenda alume vosi va kala laye va lamanela toke Komunda Salimone. Avimeleke wa kuata ondiaviti kuenje wa teta ocanja cuti umue kuenda wa ci kapa kapepe kuenje wa sapuila alume hati: “Eci wa moli okuti oco nda linga, yayulikovo oku ci linga!”
49 Omo liaco, omanu vosi va tetavo ovianja kuenda va kuama Avimeleke. Noke va kapa ovianja volonẽle viocitililo kuenda va kapa ondalu vocitililo caco. Omanu vosi va kala kosapalalo yo ko Sekeme va favo okuti, va soka 1.000 kalume lakãi.
50 Noke Avimeleke wa enda toke ko Tevese; eye wa tunga ocilombo oco a liyake lo Tevese kuenda wa yi tambula.
51 Vokati kolupale mua kala osapalalo yimue ya pama kuenda alume vosi, lakãi oku kongelamo asongui vosi vo volupale, va tililamo. Ovo va li yikila vokati kosapalalo yaco kuenda va londa kolusoka luosapalalo yaco.
52 Avimeleke wa enda lonjila yaye toke kosapalalo kuenda wa yi katukila. Eye wa amela puvelo wosapalalo oco a yi yoke londalu.
53 Noke umue pokati kakãi wa imba ewe limue liombambo kutue wa Avimeleke kuenje wa nyanyõla ekõlokõlo liaye.+
54 Vepuluvi liaco, eye wa kovonga oñuatisi yaye una wa siata oku ambata ovimalẽho viaye viuyaki kuenda wo sapuila hati: “Somõla osipata yove kuenda ndi ponde oco ka va ka popie catiamẽla kokuange hati: ‘Ukãi umue wo ponda.’” Omo liaco, oñuatisi yaye yo toma kuenje wa fa.
55 Eci alume va Isareli va mola okuti Avimeleke wa fa, vosi yavo va tiukila konjo.
56 Suku wa fetuluinya Avimeleke omo liũvi wosi a lingilile isiaye poku ponda vamanjaye va soka 70.+
57 Handi vali, Suku wa lingisa okuti, ũvi wosi wa lingiwa lalume vo ko Sekeme, u kupukila kovitue viavo muẽle. Omo liaco, esiñalo lia Yotama+ omõla a Yerubaale+ lia va wila.
Atosi Pombuelo
^ Lit., “epata lionjo lia isia ya inaye.”
^ Ale pamue, “vamuẽle yofeka.”
^ Ale “ndukuepata liene liosonde.”
^ Ale “onembele.”
^ Ale “oku ima kuange.”
^ Ale “wa li lingisa ndombuale.”
^ Lit., “wa tuma espiritu lĩvi.”
^ Ale “latutu.”
^ Ale “linga laye eci eka liove lia seya oku linga.”
^ Ale “ocitumãlo ca koka.”
^ Ale “onembele.”
