Olosapo 7:1-27
7 Amõlange, pokola kolondaka viange,Kuenda seleka ovihandeleko viange vutima wove.+
2 Pokola kovihandeleko viange kuenje o kala lomuenyo;+Seleka onumbi* yange ndomõliso liove.
3 Vi kutila kovimuine viove;Vi soneha vutima wove.+
4 Sapuila olondunge hati: “Ove wumanjange ukãi,”
Kuenda tukula elomboloko hati: “wungandiange,”
5 Oco vi ku lave kukãi ukuovasi,*+Kuenda kukãi ukuevĩho* lo kolondaka viaye vielimbi.*+
6 Ponjanela yonjo yange,Ponjanela yange nda vanja posi,
7 Osimbu nda kala oku vandekela ku vana va kamba olondunge,Pokati kamalẽhe nda muilapo umalẽhe umue eveke.*+
8 Eye wa pita ocipepi lokololo yukãi waco,Kuenje eye wa kala oku loña konjo yukãi
9 Ca kala kelivala lio pokati koku iñila kuekumbi loñolosi okuti kuteke,+Eci uteke wa kala oku iya kuenda owelema.
10 Noke nda mola ukãi umue wa li sanga laye,Ukãi waco, wa liposuisa* ndocipuepue+ haeye wa kala lutima umue wetutu.
11 Ukãi waco, ukuambuanja haeye wa siva.+
Eye lalimue eteke a kala* konjo.
12 Vepuluvi limue o kasi kosamua, vepuluvi likuavo o kasi volokololo,Eye o lavekela ocipepi lavindi osi.+
13 Eye o kuata umalẽhe waco kuenje u sipula;Locipala cutõi, ukãi u sapuila hati:
14 “Nda sukilile oku eca ovilumba viombembua.+
Etaili nda tẽlisa olohuminyo viange.
15 Eli olio esunga lieci nda tundila oco ndi li sange love,Loku ku sandiliya kuenje nda ku sanga!
16 Nda yala ohama yange lolombilikiti via fina,Haivio viovalatanya vio Kegito,+ vi kuete avala alua.
17 Pula wange nda nyanyapo omura, ocandala kuenda okanela.+
18 Enju, tu sanjuisiwe locisola cetu toke komẽle;Tu sanjukile kumosi locisola calua,
19 Momo ulume wange ka kasi konjo;Eye wa linga ungende umue wupãla.
20 Eye wambata ocipete colombongo,Kuenda ka ka tiuka toke keteke osãi yi linga ongalo.”
21 Ukãi o yonja umalẽhe lolondaka vioku tavisa.+
Eye u tamba lolondaka vielimbi.
22 Vocipikipiki, eye o kuama konyima yukãi ndongombe ya loña kepondelo,Ndeveke limue li yambuiwa kuti,*+
23 Toke eci usongo umue u toma vomuma yaye;Ndeci onjila yi lupukila konjanjo, umalẽhe ka kũlĩhĩle okuti eci ci kapa kohele omuenyo waye.+
24 Kaliye amãla vange, njeveleli;Yeveleli kolondaka ndi popia.
25 Utima wove ka u ka kunamẽle kolonjila viukãi waco.
Ku ka wile volonjila viaye,+
26 Momo eye wa koka olofa viomanu valua,+Kuenda omanu a ponda valua.+
27 Onjo yaye yi tuala Konjembo;*Oyoz yi lokila kocitumãlo ku kasi ava va fa.
Atosi Pombuelo
^ Ale “ocihandeleko.”
^ Ale “vioku yapuisa.”
^ Lit., “ka kuete utima.”
^ Ale “luwalo wo.”
^ Lit., “Olomãhi viaye lalimue eteke vi kala.”
^ Ale “kalienge.”
^ Okuti, ocitumãlo mu kendiwa omanu va fa.
