Ukundi 3:1-22
3 Kuli otembo ya sokiyiwa oco ku tẽlisiwe ovina viosi,Otembo yovopange osi vemẽhi liovailu:
2 Otembo yoku citiwa kuenda otembo yoku fa;Otembo yoku kũla kuenda otembo yoku tukũla eci ca kũliwa;
3 Otembo yoku ponda kuenda otembo yoku sakula;Otembo yoku tungulula kuenda otembo yoku tunga;
4 Otembo yoku lila kuenda otembo yoku yola;Otembo yoku lisiõsiõla kuenda otembo yoku piluka;*
5 Otembo yoku inasi ovawe kuenda otembo yoku ongoluila pamosi ovawe;Otembo yoku lipupola kapepe kuenda yoku yuvula oku lipupola kapepe;
6 Otembo yoku sandiliya kuenda otembo yoku liwekapo oku sandiliya eci ca nyẽlela;Otembo yoku soleka kuenda otembo yoku inasi;
7 Otembo yoku tola+ kuenda otembo yoku tonga;Otembo yoku ũha+ kuenda otembo yoku vangula;+
8 Otembo yoku sola kuenda otembo yoku suvuka;+Otembo yuyaki kuenda otembo yombembua.
9 Onima yipi onalavayi yi tambula omo lialikolisilo aye osi?+
10 Nda mola upange Suku a eca komãla vomanu oco va sakalale lawo.
11 Ovina viosi eye wa vi linga okuti via posoka votembo ya sokiyiwa.+ Eye wa kapa onjongole yoku kala otembo ka yi pui* vutima wavo; ndaño ndoco omanu lalimue eteke va ka kuata elomboloko liupange wa Suku yocili, tunde kefetikilo toke kesulilo.
12 Ame nda kuata elomboloko liokuti, ka kuli lacimue ca velapo kokuavo nda hakusanjukako loku linga eci ciwa vokuenda kuomuenyo wavo,+
13 nda limbukavo okuti, omunu wosi o sukila oku lia loku nyua kuenda oku sanga esanju omo liupange waye wosi walua. Eci, ombanjaile ya Suku.+
14 Ame nda kũlĩha okuti, ovina viosi Suku yocili a panga, vi ka kala otembo ka yi pui. Omanu ka va pondola oku vokiya ale oku tepululako. Suku yocili wa linga ovina viosi lonjila eyi, oco omanu vo sumbile.+
15 Cosi ci pita, ca pita ale kuenda cosi ci keya, ca kalako ale;+ pole, Suku yocili amamako oku sandiliya uwa wa vana va kasi oku lambalaliwa.*
16 Ame nda molavo eci vemẽhi liekumbi: Pomangu yesunga pa kala ungangala kuenda pomangu yesunguluko pa kala ungangala.+
17 Omo liaco, nda popia vutima wange siti: “Suku yocili o ka sombisa ci kaile ukuesunga ci kaile ondingaĩvi,+ momo kuli otembo yimue yoku linga ovopange osi kuenda ovilinga viosi.”
18 Nda popiavo vutima wange catiamẽla komãla vomanu okuti, Suku yocili o ka va seteka loku lekisa kokuavo okuti, ovo va kasi ndovinyama,
19 momo eci ci pita lomãla vomanu, ci pitavo lovinyama; vosi yavo va kuete esulilo limuamue.+ Ndeci umue a fa, haico ukuavo a fa; kuenje vosi yavo va kuete ongusu yimuamue yomuenyo.*+ Omo liaco, omunu ka velelepo okuti ovinyama vi sule, momo ovina viosi esanda.
20 Vosi va ka enda kocitumãlo cimuamue.+ Vosi yavo va tunda koneketela+ kuenda vosi yavo va tiukila koneketela.+
21 Helie wa kũlĩha muẽle nda ongusu yomuenyo* womanu yi lamana kilu kuenda ongusu yomuenyo wovinyama yi lokila kilu lieve?+
22 Kuenje nda mola okuti, ka kuli lacimue ca velapo komunu nda hakusangako esanju liupange waye,+ momo eyi oyo onima* yaye; momo helie o pondola oku wecelela oku mola eci ci ka pita noke yolofa viaye?+
Atosi Pombuelo
^ Lit., “oku tẽha; oku tẽha tẽha.”
^ Ale “otembo yenda ño hũ.”
^ Ale pamue, “ceci ca pita.”
^ Ale “efuimo.”
^ Ale “efuimo.”
^ Ale “onepa.”
