Ukundi 9:1-18
9 Omo liaco, nda kapa vutima ovina viaco viosi kuenje nda limbuka okuti, vakuesunga la vakualondunge, oku kongelamo ovopange avo, va kasi povaka a Suku yocili.+ Omanu ka va tẽla oku limbuka ocisola kuenda esuvu via kalako osimbu ka va citiwile.
2 Vosi va kuete esulilo limuamue,+ ukuesunga londingaĩvi,+ omunu uwa lu wa yelisua kuenda u wa vĩha, vana va eca ovilumba la vana ka va eci ovilumba. Omunu uwa wa lisoka lukuakandu; una o linga ocisila cimue, wa lisoka la una o lekisa utate koku linga ocisila cimue.
3 Eci ocina cimue ci sumuisa ci lingiwa vemẽhi liekumbi: Momo vosi va kuete esulilo limuamue,+ utima womanu weyuka ũvi; kuenda vutima wavo muli uyui vokuenda kuomuenyo wavo, noke ovo va fa!*
4 Kuli elavoko ku una o kasi pokati kava va kasi lomuenyo, momo ombua yi kasi lomuenyo ya velapo okuti, ohosi ya fa yi sule.+
5 Momo ava va kasi lomuenyo va kũlĩha* okuti, va ka fa,+ pole, ava va fa ka va kũlĩhĩle lacimue,+ ndaño onima* yimue ka va kuete vali, momo onjivaluko yavo yosi ya nyõleha.*+
6 Handi vali, ocisola cavo, esuvu liavo kuenda esepa liavo via nyõleha kuenje ovo ka va pangi vali onepa layimue kovina vi lingiwa vemẽhi liekumbi.+
7 Kuende, lia okulia kuove lesanju kuenda nyua ovinyu yove lutima wa sanjuka,+ momo Suku yocili wa sanjukila ale ovopange ove.+
8 Uwalo wove otembo yosi u kale wevala li yela* kuenda ku ka liwekepo oku kapa ulela kutue wove.+
9 Sanjukila omuenyo kumosi lukãi wove+ una o sole oloneke viosi viomuenyo wove wesanda, vina Eye a eca kokuove vemẽhi liekumbi okuti, oloneke viosi viesanda liove, momo eyi oyo onepa yove komuenyo kuenda kupange wove walua una ove o likolisilako oku u linga vemẽhi liekumbi.+
10 Cosi eka liove lia sanga oku linga, ci linga longusu yove yosi, momo lomue o pondola oku linga upange, esokiyo, oku lilongisa, ale oku kuata elomboloko liocina cimue Vonjembo*+ muna ove wenda.
11 Ame nda mola vali ocina cikuavo vemẽhi liekumbi okuti, ukuanjanga ka yuli olupesi otembo yosi, ndaño yuna wa pama ka yuli uyaki+ otembo yosi, ndaño ukualondunge ka kuete okulia otembo yosi, una wa loñoloha ka kuete ukuasi otembo yosi,+ vana va kuete ukũlĩhĩso ka va litundi ciwa otembo yosi,+ momo otembo kuenda ovina viya ño ocipikipiki, vi va veta vosi.
12 Momo omunu ka kũlĩhĩle otembo yaye.+ Ndeci olõsi vi kuatiwa vowanda umue u nyõla kuenda olonjila vi kuatiwa voviliva, haico omãla vomanu va kuatiwavo kotembo yocilunga,* eci ci va kuata ocipikipiki.
13 Eci nda molavo catiamẽla kolondunge vemẽhi liekumbi kuenje ca ndi komõhisa ceci:
14 Kua kala olupale lumue lutito mua kala etendelo litito lialume; kuenje osoma yimue ya pama ya katukila olupale luaco kuenda ya lu ñuala ocingonja kuenje ya tunga ocimbaka cimue cinene oco ci ñuale olupale.
15 Volupale luaco, mua sangiwile ulume umue ohukũi, pole, wa kala ukualondunge kuenje wa popela olupale lolondunge viaye. Pole, lomue wa ivaluka ulume waco ohukũi.+
16 Kuenje nda popia vutima wange siti: ‘Olondunge via velapo, unene u sule;+ ndaño ndoco, olondunge viulume ohukũi vi pembuiwa kuenda olondaka viaye ka vi yeviwa.’+
17 Ca velapo oku yevelela olondaka vievando viukualondunge okuti, oku kaloloka kua una o viala pokati kaveke ku sule.
18 Olondunge via velapo okuti ovimalẽho viuyaki vi sule, pole, omunu umosi ukuakandu o pondola oku nyõla ovina vialua viwa.+
Atosi Pombuelo
^ Lit., “kuenda noke yovina evi, ku vana va fa!”
^ Ale “va limbuka.”
^ Ale “ofeto.”
^ Lit., “momo onjivaluko yavo yosi ya ivaliwa.”
^ Okuti, uwalo u yela u situlula esanju okuti, huwaloko wonambi.
^ Okuti, ocitumãlo mu kendiwa omanu va fa.
^ Ale “yohali.”
