Yehosua 1:1-18
1 Noke yolofa via Mose ukuenje wa Yehova, Yehova wa sapuila Yehosua*+ omõla a Nune oñuatisi+ ya Mose hati:
2 “Mose ukuenje wange wa fa.+ Kaliye katuka, yoka o Yordão ove kumue lomanu vosi ava kuenda kuendi kofeka yina ndi laika oku eca kokuavo okuti, komanu va Isareli.+
3 Ovitumãlo viosi olomãhi viene vi ka liatela, ndi ka vi eca kokuene, ndeci nda likuminyile ku Mose.+
4 Ocikanjo cene ci kopisa vekalasoko toke ko Levanone kuenda kolui lunene okuti olui Ferati, ofeka yosi ya va Hiti+ kuenda toke Kokalunga Kanene* kutakelo.*+
5 Lomue o ka tẽla oku tamalãla love, osimbu o kasi lomuenyo.+ Ndeci nda kala la Mose, haico ndi kalavo love.+ Ame si ka ku siapo, ale oku ku yanduluka.+
6 Kuata utõi kuenda pama,+ momo ove o ka songuila omanu ava oco va ka piñale ofeka ame nda lisila la vakukululu yavo okuti, ndi yeca kokuavo.+
7 “Kuata ño utõi loku pama kuenda kapako lutate Ocihandeleko cosi Mose ukuenje wange a ku handeleka. Ku ka yapukile kondio ndaño kepĩli,+ oco o lekise olondunge kuosi wenda.+
8 Elivulu eli Liocihandeleko ka li ka tunde vomẽla wove,+ o sukila oku li sokolola utanya luteke, oco o kapeko lutate ovina viosi via sonehiwamo;+ kuenje onjila yove yi ka sumũlũha kuenda o ka lekisa olondunge kovina viosi o linga.+
9 Ame sia ku handelekele hẽ okuti, kuata utõi kuenda pama? Ku ka yokoke ale oku kuata usumba, momo Yehova Suku yove o ka kala love kuosi wenda.”+
10 Noke Yehosua wa handeleka asongui vomanu hati:
11 “Piti vocilombo cosi kuenda eci komanu ocihandeleko eci: ‘Pongiyi olohuta vioku lia, momo vokuenda kuoloneke vitatu, vu ka yoka o Yordão oco wendi oku piñala ofeka yina Yehova Suku yene a kasi oku eca kokuene ndocipiñalo.’”+
12 Kuenje ku va Ruvene, la va Gadi kuenda konepa yimue yocikoti ca Manase, Yehosua wa popia hati:
13 “Ivaluki ovina Mose ukuenje wa Yehova a ku handeleki viokuti:+ ‘Yehova Suku yene eca kokuene epuyuko kuenda wa ku ĩhi ofeka yilo.
14 Akãi vene, omãla vene kuenda oviunda viene, vi ka kala vofeka Mose a eca kokuene konele yilo* yo Yordão,+ pole, vosi yene okuti wasualali+ va pama, vu sukila oku yoka ndovimunga viasualali kovaso ya vamanjene.+ Vu sukila oku va kuatisa
15 toke eci Yehova a eca ku vamanjene epuyuko, ndeci a ecavo kokuene kuenda toke eci va piñalavo ofeka Yehova Suku yene a kasi oku eca kokuavo. Noke tiukili vofeka va ku ĩhi oco vu yi tambuli loku yi piñala, ofeka yina Mose ukuenje wa Yehova a ku ĩhi konele yutundilo wo Yordão.’”+
16 Ovo va tambulula Yehosua vati: “Tu ka linga cosi wa handeleka kuenda tu enda kuosi o tu tuma.+
17 Ndeci tua yevelela ovina viosi Mose a tu sapuila, haico tu ka ku yevelelavo. Kovina viosi, Yehova Suku yove a kale love, ndeci a kala la Mose.+
18 Omunu wosi o sinĩla olonumbi viove kuenda ka pokola kocihandeleko cosi ove eca kokuaye, o pondiwa.+ Kuata ño utõi kuenda pama.”+
Atosi Pombuelo
^ Ci lomboloka, “Yehova Upopeli.”
^ Okuti, o Mediterraneo.
^ Ale “konele ku iñilila ekumbi.”
^ Okuti, konele yutundilo.
