Yehosua 2:1-24
2 Noke Yehosua omõla a Nune, wa tuma alume vavali vuyombeki oku upisa ko Sitimi+ ndolondavululi. Eye wa va sapuila hati: “Kuendi kuenda ka kũlĩhĩsi ofeka, ca piãla enene o Yeriko.” Omo liaco, ovo va enda kuenje va pitĩla konjo yukãi umue ocipuepue o tukuiwa hati, Rahava+ kuenda oko va sikĩla.
2 Soma yo Yeriko, vo sapuila hati: “Tala! Alume va Isareli veya mulo kuteke ulo oco va kũlĩhĩse ofeka.”
3 Kuenje soma yo Yeriko wa tuma esapulo limue ku Rahava liokuti: “Tundisila posamua alume vana veya haivo va sikĩla vonjo yove, momo ovo veyilila oku kũlĩhĩsa ofeka yosi.”
4 Pole, ukãi waco wambata alume vaco vavali kuenje wa va salamisa. Noke eye wa popia hati: “Ocili, alume veyile kokuange, pole, ame sia kũlĩhĩle oku va tundilila.
5 Eci kua kala oku tekãva kelivala lioku yika olombundi violupale, alume vaco va enda. Sia kũlĩhĩle oku alume vaco va endela, pole, nda wa va landuli lonjanga, vu ka va sanga.”
6 (Pole, ukãi wa va londisa kolusoka kuenda wa va salamisa pokati kovitungu violinyu via kala kolusoka.)
7 Noke alume va va landula oku endela kolonepa viosi vioku yoka o Yordão+ kuenje ombundi yolupale ya yikiwa eci vana va kala oku landula va tunda.
8 Osimbu alume ka va pekelele handi, Rahava wa enda toke kokuavo kolusoka.
9 Eye wa sapuila alume vaco hati: “Nda kũlĩha okuti, Yehova o laika oku eca ofeka yilo+ kokuene kuenda tu vu kueteli usumba walua.+ Olonungi viosi viofeka via sumua mekonda liene,+
10 momo tua yeva ndomo Yehova a takatisa ovava o Vokalunga Kakusuka kovaso ene eci wa tundi Kegito+ kuenda ovina wa lingi kolosoma vivali via va Amori okuti, Sihoni+ la Oge,+ vana wa kunduli konele yikuavo* yo Yordão.
11 Eci tua yeva ovina viaco, tua fetika oku kuata usumba* kuenda lomue wa kuata vali utõi* mekonda liene, momo Yehova Suku yene, eye Suku kovailu kuenda palo posi.+
12 Cilo, lisili lame vonduko ya Yehova okuti ndeci ame nda lekisa kokuene ocisola ka ci pongoloka, ene vu ka lekisavo ocisola ka ci pongoloka ku vakuanjo ya isiange; kuenda vu sukila oku eca kokuange ondimbukiso* yimue oco ndi kũlĩhe okuti vu ka tẽlisa ondaka yene.
13 Popeli omuenyo wa isiange, wa ina yange, wa vamanjange alume, wa vamanjange akãi lowu wa vosi va tiamẽla kokuavo kuenda tu popeli kolofa.”+
14 Kuenje alume vo sapuila vati: “Tu ka eca omuenyo wetu omo liene! Nda kua sapuile lacimue catiamẽla kungende wetu, tu ka lekisa ocisola ka ci pongoloka kuenda esunga kokuene eci Yehova a tu ĩha ofeka.”
15 Noke eye wa va lowisila lukolo umue ponjanela, momo onjo yaye ya kala konele yimue yocimbaka colupale. Eye wa tungile kilu liocimbaka colupale.+
16 Noke wa va sapuila hati: “Kuendi kovaimbo a kasi volomunda kuenda li salami kocitumãlo caco vokuenda kuoloneke vitatu oco okuti, vana va kasi oku vu landuli ka vo sangi. Kuenje eci vana va kasi oku vu landuli va tiuka, ene wendi lonjila yene.”
17 Alume vo sapuila vati: “Ka tu ka kuata eko omo liohuminyo eyi ove wa tu lingisa oku lisila+
18 nda eci tu iñila vofeka yilo kua kutile ukolo owu wohusu ponjanela wa tu lowisila. O sukila oku ongolola isiove, ina yove, va manjove kuenda vosi vakuanjo ya isiove kumue love vokati konjo.+
19 Kuenje nda omunu umue wa tundila posamua yonjo yove, eye o kuata eko omo liolofa viaye* kuenje etu ka tu kuata eko. Pole, nda cimue cĩvi ca pita* lomunu umue okuti, wa kala love vonjo etu tu kuata eko omo liolofa viaye.
20 Pole, nda ove wa sapula eci catiamẽla kungende wetu,+ ka tu kuata eko omo liohuminyo eyi ove wa tu lingisa oku lisila.”
21 Eye wa tambulula hati: “Ci lingiwe ndolondaka viene.”
Kuenje eye wa va tuma oku enda, yu va enda lonjila yavo. Noke eye wa kuta ukolo wohusu ponjanela.
22 Ovo va tunda kuenje va enda kovaimbo a kasi kolomunda kuenda va kalako oloneke vitatu toke eci vana va kala oku va landula va tiuka. Vana va kala oku va landula va va sandiliya volonjila viosi, pole, ka va va sangele.
23 Noke alume vaco vavali va tunda kovaimbo a kasi kolomunda kuenda va yoka olui kuenje va enda toke ku Yehosua omõla a Nune. Ovo vo sapuila ovina viosi via pita lavo.
24 Kuenje va sapuila Yehosua vati: “Yehova wa eca kokuetu ofeka yosi.+ Eli olio esunga lieci olonungi viosi viofeka yaco via sumuila omo lietu.”+
Atosi Pombuelo
^ Okuti, konele yutundilo.
^ Lit., “ovitima vietu via yenguluka.”
^ Lit., “kuenda espiritu ka lia katukile kulume laumue.”
^ Ale “ondimbukiso yimue ya koleliwa.”
^ Lit., “osonde yaye yi wila kutue waye muẽle.”
^ Ale “nda eka limue lia lamba ko.”
