Yehosua 3:1-17
-
Va Isareli va yoka o Yordão (1-17)
3 Yehosua wa pasuka selo komẽle kuenda eye kumue la va Isareli* vosi vakuavo, va tunda ko Sitimi+ kuenje va pitĩla toke ko Yordão. Ovo va pitako uteke osimbu handi ka va yokele.
2 Noke yoloneke vitatu, asongui+ va pita kocilombo
3 kuenda va handeleka omanu vati: “Eci vu mola ocikasia covisila via Yehova Suku yene okuti ci kasi oku ambatiwa la va Lewi ovitunda,+ vu sukila oku tunda vovitumãlo viene kuenda oku ci kuama.
4 Pole, vu sukila oku kala ocinãla ci soka 2.000 kovikeya* locikasia caco; ko ka ameli ocipepi laco, oco vu kũlĩhi onjila vu sukila oku kuama, momo lalimue eteke wa pitili vonjila yaco.”
5 Yehosua wa sapuila omanu hati: “Li kolisi ene muẽle+ momo hẽla Yehova o ka linga ovina vi komõhisa pokati kene.”+
6 Kuenje Yehosua wa sapuila ovitunda hati: “Tikuli ocikasia+ covisila kuenda piti kovaso yomanu.” Omo liaco, ovo va tikula ocikasia covisila kuenda va pita kovaso yomanu.
7 Noke Yehova wa sapuila Yehosua hati: “Keteke lietaili, ame ndi fetika oku ku kemãlisa kovaso yo Isareli yosi,+ oco ovo va kũlĩhe okuti, ndi ka kala love+ ndeci nda kala la Mose.+
8 O sukila oku eca ocihandeleko eci kovitunda vi kasi oku ambata ocikasia covisila cokuti: ‘Eci vu pitĩla kohulo yo Yordão, vu sukila oku iñila vovava kuenda oku talama vo Yordão.’”+
9 Kuenje Yehosua wa sapuila va Isareli hati: “Enjui kulo kuenda yeveleli olondaka via Yehova Suku yene.”
10 Noke Yehosua wa popia hati: “Omo liovina evi, vu ka kũlĩha okuti, Suku umue o kasi lomuenyo, o kasi pokati kene+ kuenda eye o ka tundisa muẽle kovaso ene va Kanana, va Hiti, va Hivi, va Perisi, va Girigasi, va Amori kuenda va Yevusi.+
11 Tali! Ocikasia covisila ca Ñala yilu lieve liosi, ci kasi oku pita kovaso yene pokati ko Yordão.
12 Cilo, nõli 12 kalume pokati kovikoti via va Isareli, kocikoti locikoti ku tunde ulume umosi,+
13 kuenda eci olomãhi viovitunda vina viambata ocikasia ca Yehova Ñala yilu lieve liosi vi lamba* vovava o Yordão, ovava o vo Yordão ana a tunda konano a kotuiwa kuenje a ka talama ondunda ndociva* cimue.”+
14 Omo liaco, eci omanu va tunda volombalaka viavo osimbu ka va yokele o Yordão, ovitunda vina via kala oku ambata ocikasia+ covisila via pita kovaso yomanu.
15 Eci vana va kala oku ambata ocikasia va pitĩla vo Yordão kuenda ovitunda vina viambata ocikasia via kapa olomãhi viavo kohulo yovava (momo koloneke viosi vioku ungula, o Yordão yi samõhaila kolohulo+ vialio),
16 ovava a tunda konano a talama. Ovava aco a linga ondunda ndociva* cimue ocipãla calua lo Adama, olupale lua kala ocipepi lo Saretana, osimbu ovava a kala oku lokila vokalunga ko Araba, Okalunga Komongua* ka takata. Ovava a talama kuenda omanu va yoka kovaso o Yeriko.
17 Osimbu ovitunda vina via kala oku ambata ocikasia covisila via Yehova viamamako oku talama posi ya kukuta+ vokati ko Yordão, o Isareli yosi ya yoka posi ya kukuta+ toke eci ofeka yosi ya mala oku yoka o Yordão.
Atosi Pombuelo
^ Lit., “omãla va Isareli.”
^ Ci soka 890 kolometulu. Tala Alombo. B14.
^ Lit., “oku puyuka.”
^ Ale “ocimbaka.”
^ Ale “ocimbaka.”
^ Okuti, Okalunga ka ka Kuete Akimba.
