Yehosua 5:1-15
5 Eci olosoma viosi via va Amori+ vina via kala konele yutakelo* wo Yordão lolosoma viosi via va Kanana+ via kala konele yokalunga via yeva okuti, Yehova wa takatisa ovava o Yordão kovaso ya va Isareli toke eci va yoka, ovio via fetika oku kuata usumba*+ kuenje ka via kuatele vali utõi* omo lia va Isareli.+
2 Kotembo yaco, Yehova wa sapuila Yehosua hati: “Panga olomoko via tua kuenda sevisa vali evamba+ omãla valume va Isareli.”*
3 Yehosua wa panga olomoko via tua kuenda wa seva evamba alume va Isareli ko Giveata-Haraloti.*+
4 Esunga lieci Yehosua a va sevisila evamba lieli okuti: Alume vosi pokati komanu vana va tunda Kegito, lalume vosi asualali,* va fila vekalasoko vungende wavo noke yoku tunda Kegito.+
5 Omanu vosi va tundile Kegito va seviwile ale evamba, pole, omanu vosi vana va citiwila vekalasoko osimbu va kala oku linga ungende noke yoku tunda Kegito, ka va seviwile evamba.
6 Va Isareli va enda eci ci soka 40 kanyamo+ vekalasoko toke eci omanu vosi va fa okuti, alume vosi asualali vana va tunda Kegito okuti, ka va pokuile kondaka ya Yehova.+ Yehova wa lisila kokuavo okuti, lalimue eteke a ka va ecelela oku mola ofeka+ yina Yehova a lisilile la vakukululu yavo oco a yece kokuetu okuti,+ ofeka yimue yi tumõha asenjele lowiki.+
7 Kuenje pomangu yavo wa piñainyapo omãla vavo,+ vana Yehosua a sevisa evamba; ovo va kala oviyamba momo ka va seviwile evamba osimbu va kala oku linga ungende.
8 Eci omanu vosi va seviwa evamba, ovo vamamako oku kala vovilombo viavo toke eci va kaya.
9 Noke Yehova wa sapuila Yehosua hati: “Etaili, ndopa kokuene esepu lia va Egito.” Omo liaco, ocitumãlo caco ci tukuiwa okuti Giligali*+ toke etaili.
10 Va Isareli vamamako oku kala vovilombo vio ko Giligali kuenda va linga ocipito co Paskoa keteke 14 yosãi,+ koñolosi, vanyãla o vekalasoko lio Yeriko.
11 Kuenje keteke likuavo noke yocipito co Paskoa, ovo va fetika oku lia ovaima o vofeka, lombolo+ ka yi kuete etumbisa kuenda olomema via kangiwa.
12 Noke ka kua kaile vali o mana keteke lia kuamamo eci va fetika oku lia apako amue o vofeka; o mana ya imũha pokati ka va Isareli,+ pole, va fetika oku lia ovaima o vofeka yo ko Kanana kunyamo waco.+
13 Eci Yehosua a kala ocipepi lo Yeriko, wa petula ovaso kuenje wa mola ulume umue+ wa kala kovaso yaye losipata peka liaye.+ Noke Yehosua wa amela kokuaye loku u pula hati: “Ove hẽ wa tiamẽla konele yetu ale konele yovanyãli vetu?”
14 Eye wa tambulula hati: “Sio, pole, nda tumiwa ndombuale* yolohoka via Yehova.”+ Noke Yehosua wa petamisa ocipala caye posi kuenda wo kekamẽla loku u pula hati: “Nye ñala yange a yongola oku sapuila upika waye?”
15 Ombuale yolohoka via Yehova ya tambulula Yehosua yiti: “Lula olohaku viove, momo ocitumãlo wa liata ci kola.” Kuenje Yehosua wa ci linga.+
Atosi Pombuelo
^ Lit., “konele yokalunga.”
^ Lit., “ovitima viavo via yenguluka.”
^ Lit., kuenda lomue wa kuata vali espiritu.
^ Lit., “oku seva vali evamba onjanja yavali.”
^ Ci lomboloka “Owulu Woviyuvuluila Vietimba.”
^ Ale “alume va kuete utunga woku enda kuyaki.”
^ Ci lomboloka “oku Tiñulula; Oku Tiñuluila Ocipãla.”
^ Ale “usongui.”
