Yehosua 6:1-27
6 Olombundi viosi vio Yeriko via yikiwile omo lia va Isareli; lomue wa ponduile oku tunda ale oku iñila.+
2 Omo liaco, Yehova wa sapuila Yehosua hati: “Tala, nda eca kokuove o Yeriko kumue losoma yaco kuenda asualali vaco va pama.+
3 Ene vosi walume vuyaki, vu sukila oku ñuala olupale, loku lu ñuala onjanja yimosi. Eci oco vu sukila oku linga vokuenda kuoloneke epandu.
4 Nõla ovitunda epanduvali, oco vi ambate anguena epanduvali olombinga violomeme kovaso Yocikasia. Pole, keteke liepanduvali, vu ñuala olupale olonjanja epanduvali kuenda ovitunda vi sukila oku sika anguena olombinga.+
5 Eci anguena olombinga violomeme vi sikiwa kuenje vu yeva ocileñi* caco, asualali vosi va sukila oku kaluka lolukandi ndoku kaluka kuomanu va kasi kuyaki. Noke ovimbaka violupale vi ka kupuka+ kuenje omunu lomunu o sukila oku enda loku amako kovaso.”
6 Noke Yehosua omõla a Nune wongolola ovitunda kuenda wa vi sapuila hati: “Tikuli ocikasia covisila kuenje ovitunda epanduvali, vi sukila oku ambata anguena olombinga epanduvali violomeme kovaso Yocikasia ca Yehova.”+
7 Kuenje wa sapuila asualali hati: “Kuendi, ñuali olupale kuenda asualali+ va limalẽha va pite kovaso Yocikasia ca Yehova.”
8 Ndomo Yehosua a sapuila asualali, ovitunda epanduvali vina viambata anguena olombinga epanduvali violomeme kovaso a Yehova, via enda kuenda via sika anguena olombinga kuenje ocikasia covisila via Yehova ca kala oku va kuama.
9 Noke asualali vana va limalẽha, va pita kovaso yovitunda via kala oku sika anguena olombinga kuenda asualali vakuavo va kuama konyima Yocikasia loku ci teyuila, osimbu anguena olombinga a kala oku amamako oku sikiwa.
10 Yehosua wa handelekele asualali hati: “Ko ka kaluki kuenda olondaka viene ka vi ka yevale. Vovimẽla viene, ka mu ka tunde ondaka layimue toke eteke ndu sapuili siti, ‘Kaluki!’ Kuenje vu kaluka.”
11 Eye wa handeleka okuti, Ocikasia ca Yehova ci ñuala olupale luosi, loku lu ñuala onjanja yimosi. Noke va tiukila vali vocilombo kuenda omo va pita uteke.
12 Eci kua ca, Yehosua wa pasuka omẽle kuenje ovitunda via tikula Ocikasia+ ca Yehova,
13 kuenda ovitunda epanduvali vina viambatele anguena epanduvali olombinga violomeme, via pita kovaso Yocikasia ca Yehova kuenda viamamako oku sika olombinga. Asualali va limalẽha, va pita kovaso yavo kuenda asualali vakuavo va kuama konyima Yocikasia ca Yehova loku ci teyuila osimbu anguena olombinga a kala oku amamako oku sikiwa.
14 Keteke liavali, va ñuala olupale onjanja yimosi, noke va tiukila vocilombo. Va ci linga vokuenda kuoloneke epandu.+
15 Keteke liepanduvali, va pasuka omẽle eci ekumbi lia tunda, noke va ñuala olupale ndeci va lingaile ale, pole, va ci linga olonjanja epanduvali. Keteke liaco, oco lika va ñuala olupale olonjanja epanduvali.+
16 Konjanja yepanduvali, eci ovitunda via sika olombinga, Yehosua wa sapuila asualali hati: “Kaluki,+ momo Yehova wa eca kokuene olupale!
17 Olupale lovina viosi vi kasimo, vi nyõliwe;+ momo ovina viosi via tiamẽla ku Yehova. Te lika Rahava+ ocipuepue eye o kala lomuenyo, eye la vosi va kasi laye vonjo, momo wa salamisa olomunga vina tua tumĩle.+
18 Pole, kali ocipãla lovina via sokiyiwila oku nyõleha,+ oco ka vu ka liveli cimue ca sokiyiwila oku nyõleha loku ci kuata.+ Sanga vu lingisa okuti, ocilombo ca va Isareli ci linga ocina cimue ca sokiyiwila oku nyõliwa poku nena eyambulo* kokuayo.+
19 Pole, opalata yosi lulu kuenda ovikuata viosi viosipi levi viutale, vi kola ku Yehova.+ Vu sukila oku viambata vohondo yoku seleka ukuasi wonjo ya Yehova.”+
20 Kuenje asualali va kaluka eci anguena olombinga a sikiwa.+ Eci asualali va yeva ocileñi canguena olombinga leci va kaluka lolukandi ndoku kaluka kuomanu va kasi kuyaki, ovimbaka via kupuka.+ Noke liovina viaco, asualali va enda volupale, esualali lesualali lia amako kovaso kuenje va tambula olupale.
21 Ovo va kundula ovina viosi via kala volupale losipata ndeci: alume, akãi, amalẽhe, akulu, olongombe, olomeme kuenda ovimbulu.+
22 Yehosua wa sapuila alume vavali vana va ka kũlĩhĩsile ofeka hati: “Iñili vonjo yukãi ocipuepue, neni ukãi waco kuenda vosi va kasi laye vonjo ndeci wa lisili laye.”+
23 Omo liaco, amalẽhe olondavululi, va iñila kuenda va nena Rahava kumue la isiaye, ina yaye, vamanjaye kuenda vosi vana va kala laye vonjo; ovo va nena epata liaye liosi+ kuenda va vambata kocitumãlo cimue ca koka kosamua yocilombo ca va Isareli.
24 Noke ovo va yoka londalu olupale kuenda ovina viosi via kalamo. Pole, opalata lulu kuenda ovikuata viosipi levi viutale, va vi eca vohondo yoku seleka ukuasi wonjo ya Yehova.+
25 Rahava ocipuepue, la vakuanjo ya isiaye kuenda vosi vana va kala laye konjo, ovo lika ka va pondiwile la Yehosua;+ eye o kasi ko Isareli toke etaili,+ momo wa salamisa olomunga Yehosua a tumĩle oco vi kũlĩhĩse o Yeriko.+
26 Kotembo yaco, Yehosua wa linga ocisila* cokuti: “Wa siñaliwa kovaso a Yehova omunu wosi o tumbulula olupale luo Yeriko. Eci eye a ka tunga ociseveto caco, o feta omuenyo wonuñulu yaye kuenda eci a ka kapa apito aco, o feta omuenyo womõlaye umalẽhe.”+
27 Kuenje Yehova wa kala la Yehosua+ kuenda ekemãlo liaye lia lisanduila kilu lieve liosi.+
Atosi Pombuelo
^ Ale “ocileñi camamako.”
^ Ale “ovitangi; oku yandulukiwa.”
^ Ale pamue, “wa vetiya omanu oku linga ocisila eci.”
