Yehosua 7:1-26
7 Pole, va Isareli ka va pokuile konumbi yatiamẽla kovina via nõliwila oku nyõliwa, momo Akani+ omõla a Karimi, omõla a Savidi, omõla a Sera, ukuacikoti ca Yuda, wopa ovina vimue via nõliwile oku nyõliwa.+ Kuenje onyeño ya Yehova ya wengukila va Isareli.+
2 Kuenje Yehosua wa tuma alume oku upisa ko Yeriko oco va ende ko Hai,+ yi kasi ocipepi lo Beta-Vene kuenda kutundilo wo Betele+ poku va sapuila hati: “Kuendi ka kũlĩhĩsi ofeka. Kuenje alume va enda kuenda va kũlĩhĩsa o Hai.
3 Eci va tiuka ku Yehosua, vo sapuila vati: “Ka ci sukila okuti olohoka viosi vi enda. Ku sukiliwa lika ci soka olohulukãi vivali ale olohulukãi vitatu vialume, oco va kundule o Hai. Ku ka kavise olohoka viosi poku vi tuma oku endako momo omanu va kasiko vatito.”
4 Kuenje ci soka 3.000 kalume va endako, pole, va tila alume vo ko Hai.+
5 Alume vo ko Hai va ponda 36 kalume kuenda va va landula oku upisa kosamua yombundi yolupale toke ko Sevari* kuenda vamamako oku va pondela vociloka. Kuenje ovitima viomanu via fetika oku luluma kuenda va pua utõi.*
6 Noke Yehosua wa tola tola ocikutu caye, wa petamisa ocipala caye posi kovaso Yocikasia ca Yehova toke koñolosi, eye wa ci linga kumue lakulu va Isareli kuenda va imba oneketela kovitue viavo.
7 Yehosua wa popia hati: “Avoyo we, a Ñala Tõlo Yehova, momo lie wa ecelela okuti, omanu vosi ava va yoka o Yordão, oco o tu ece povaka a va Amori okuti tu nyõliwa? Hĩse nda tua sanjukilile oku amamako oku kala konele yikuavo* yo Yordão!
8 Ngecele, A Yehova, nye ndi popia cilo okuti, Isareli wa tila* ovanyãli vaye?
9 Eci va Kanana kuenda omanu vakuavo vo vofeka va ka ci yeva, ovo va ka tu ñuala ocingonja kuenda va ka imũla onduko yetu kilu lieve kuenje o ka teyuila ndati onduko yove yinene?”+
10 Yehova wa tambulula Yehosua hati: “Votoka! Momo lie wa petamisila ocipala cove posi?
11 Va Isareli va linga ekandu. Ovo va sinĩla ocisila+ cange cina ame nda va handelekele oco va ci lave. Ovo, vopa ovina vimue via nõliwila oku nyõliwa+ poku vi nyana+ kuenda va vi kapa pokati kovikuata viavo vuyombeki.+
12 Omo liaco, va Isareli ka va ka tẽla oku tamalãla lovanyãli vavo. Ovo va ka tila ovanyãli vavo, momo va li lingisa ocina ca nõliwila oku nyõliwa. Ame, si kala vali lene te lika nda wa kunduli pokati kene ocina ca nõliwila oku nyõliwa.+
13 Votoka kuenda yelisa omanu!+ Va sapuila hoti: ‘Hẽla liyelisi ene muẽle, momo ca popia Yehova Suku ya Isareli ceci hati: “Ocina ca nõliwila oku nyõliwa ci kasi pokati kove A Isareli. Ene ka vu ka tẽla oku yula ovanyãli vene toke eci vu kundula pokati kene ocina ca nõliwila oku nyõliwa.
14 Ene vu sukila oku liongolola lomẽle, ocikoti locikoti kuenje ocikoti Yehova a ka nõla,+ ciya kovaso, epata lepata kuenda epata Yehova a ka nõla, liya kovaso onjo lonjo kuenje onjo Yehova a ka nõla, yiya kovaso ulume lulume.
15 Omunu una wa sangiwa locina ca nõliwila oku nyõliwa, o pondiwa noke o timĩhiwa vondalu+ eye kumue lovina viosi via tiamẽla kokuaye, momo wa sinĩla ocisila+ ca Yehova kuenda wa linga ocina cimue ci kutisa osõi ko Isareli.”’”
16 Kuenje Yehosua wa pasuka selo komẽle yeteke likuavo kuenda wongolola va Isareli, ocikoti locikoti kuenje ocikoti ca Yuda ca nõliwa.
17 Eye wa lingisa okuti epata lia Yuda liya ocipepi kuenje epata lia Sera+ lia nõliwa, noke wa lingisa okuti, epata lia Sera liya ocipepi, ulume lulume kuenje Savidi wa nõliwa.
18 Oku sulako, eye wa lingisa okuti, onjo ya Savidi yiya ocipepi, ulume lulume kuenje Akani omõla a Karimi, omõla a Savidi, omõla a Sera, ukuacikoti ca Yuda wa nõliwa.+
19 Kuenje Yehosua wa sapuila Akani hati: “Amõlange, mange ohenda, muisa ulamba Yehova Suku ya va Isareli kuenda litavela kokuaye. Mange ohenda, ndi sapuile eci wa linga. Ku ka ci ndimbike.”
20 Akani wa tambulula Yehosua hati: “Ocili okuti, ame muẽle nda lingila ekandu Yehova Suku ya Isareli kuenda eci nda linga ceci:
21 Eci nda mola pokati kovina via pundiwa ocikutu cimue ca posoka haico ci likasi co ko Sinare+ kuenda 200 kolosiekele* locinimbu cimue culu ci lema 50 kolosiekele, nda vi livela yu nda vi nyañulapo. Ovio via selekiwa vombalaka yange, via lembikiwa posi kuenda olombongo vi kasi kosi yaco.”
22 Vepuluvi liaco, Yehosua wa tuma olomunga kuenje ovio via lupukila vombalaka kuenda vombalaka yaco, omo mua selekiwile ocikutu okuti, olombongo via kala kosi yaco.
23 Omo liaco, ovo va tikula ovina via kala vombalaka kuenje va vi nena ku Yehosua kuenda ku va Isareli vosi, yu va vi kapa kovaso a Yehova.
24 Kuenje Yehosua la Isareli vosi, va kuata Akani+ omõla a Sera kumue lopalata, locikutu ci likasi, locinimbu culu,+ lomãla vaye valume, lomãla vaye vakãi, lolongombe viaye, lovimbulu viaye, loviunda viaye, lombalaka yaye kuenda ovina viaye viosi kuenje vambatiwa toke Kocimbota* co Akore.+
25 Yehosua wa popia hati: “Momo lie wa nenela eyambulo* kokuetu?+ Yehova o ku nenela eyambulo keteke lietaili.” Kuenje o Isareli yosi yo sõsõla lovawe+ noke va va timĩha londalu.+ Omo liaco, vosi yavo va va sõsõla lovawe.
26 Kuenje ovo va katuila ondunda yovawe kilu lietimba lia fa lia Akani okuti, yi kasiko toke etaili. Noke onyeño ya piãla ya Yehova ya tulumũha.+ Eli olio esunga lieci ocitumãlo caco ci tukuiwila hati, Ocimbota co Akore* toke etaili.
Atosi Pombuelo
^ Ci lomboloka “Ocitumãlo Coku Tetuila Ovawe.”
^ Lit., “ovitima viomanu via yenguluka kuenda via linga ndovava.”
^ Okuti, konẽle yutundilo.
^ Ale “wa imba onyima.”
^ Osiekele yimosi yi soka 11.4 kolograma. Tala Alombo. B14.
^ Ale “Ketapi Lia Vomba.”
^ Ale “ovitangi; oku yandulukiwa.”
^ Ci lomboloka “Ocilunga; oku yandulukiwa.”
