Yeremiya 32:1-44
32 Kunyamo 10 wa Soma Sedekiya wo ko Yuda okuti, kunyamo 18 wa Nevukandesa,+ Yeremiya wa tambula ondaka ya tunda ku Yehova.
2 Kotembo yaco, olohoka via soma yo Bavulono, via ñualele o Yerusalãi ocingonja kuenda uprofeto Yeremiya wa yikiwile Kocitali Colondavululi+ vonjo* ya soma yo Yuda.
3 Momo Soma Sedekiya wo ko Yuda wo yikile poku popia+ hati: “Momo lie wimbila owanji lonjila eyi? Ove o popia hati: ‘Ca popia Yehova ceci hati: “Ndi ka eca olupale olu peka lia soma yo Bavulono kuenje eye o ka lu tambula,+
4 noke Soma Sedekiya wo ko Yuda ka ka puluka ku va Kaldea, momo eye o ka eciwa muẽle peka lia soma yo Bavulono kuenje eye o ka vangula laye polo la polo kuenda va ka li vanja vaso la vaso.”’+
5 ‘Eye o kambata Sedekiya ko Bavulono kuenje oko a ka kala toke eci ndi nõlapo eci ndi linga laye,’ oco Yehova a popia. ‘Ndaño okuti ene wamamiko oku liyaka la va Kaldea, ene ka vu ka yula.’”+
6 Yeremiya wa popia hati: “Ondaka ya Yehova yeya kokuange yiti,
7 ‘Hanamele omõla a Sialume inanu* yove, o keya kokuove loku popia hati: “Li landela epia liange ko Anatote,+ momo ove o kuete omoko yatete yoku li yovola.”’”+
8 Hanamele omõla a inanu yange weya kokuange, ndomo Yehova a ci popele Vocitali Colondavululi kuenje wa ndi sapuila hati: “Linga ohenda, landa epia liange ko Anatote kofeka ya Benjamini, momo ove o kuete omoko yoku li tambula kuenda yoku li yovola. Li landa oco li linge liove.” Kuenje nda limbuka okuti, ya kala ondaka ya Yehova.
9 Omo liaco, nda landa epia ko Anatote ku Hanamele omõla a inanu yange. Ame nda pesalisa olombongo+ oco vi eciwe kokuaye okuti, olosiekele* epanduvali kuenda ekũi liolopalata.
10 Noke nda soneha ukanda umue,+ nda kapako ondimbukiso, nda kovonga olombangi+ kuenda nda pesalisa olombongo kombalãsa.
11 Nda tikula ukanda woku landa una wa kapiwa ondimbukiso ndomo ci likuata locihandeleko kuenda olonumbi vi kisikiwa, oku kongelamo una ka wa kapiwile ondimbukiso,
12 kuenje nda eca ukanda woku landa ku Baruke+ omõla a Neriya+ omõla a Maheseiya, kovaso a Hanamele omõla a inanu yange, kovaso yolombangi vina via soneha vukanda woku landa kuenda kovaso ya va Yudea vosi va tumãlele Vocitali Colondavululi.+
13 Nda handeleka Baruke kovaso yavo siti:
14 “Ca popia Yehova ukualohoka, Suku ya Isareli ceci hati: ‘Tikula ovikanda evi okuti, ukanda woku landa wa kapiwa ondimbukiso kuenda ukanda ukuavo ka wa kapiwile ondimbukiso kuenje vi kapa vesanga limue liotuma oco okuti, vi kala otembo yalua.’
15 Momo ca popia Yehova ukualohoka Suku ya Isareli ceci hati: ‘Olonjo kuenda ovapia kumue loviumbo viayuva, vi ka landiwa vali vofeka yilo.’”+
16 Noke yoku eca ukanda woku landa ku Baruke omõla a Neriya, nda likutilila ku Yehova hati:
17 “Avoyo we, A Ñala Tõlo Yehova! Tala! Ove wa panga ovailu kumue longongo lunene wove walua+ kuenda lokuokuo kuove kuolõha. Ka kuli lacimue kokuove ka ci tẽliwa,
18 Una o lekisa ocisola ka ci pongoloka kolohulukãi, pole, o feta oku lueya kua va isia komãla* vavo noke liavo,+ Suku yocili, ukuolamba haeye Suku ukuonene una okuti, onduko yaye Yehova ukualohoka.
19 Ove unene kelungulo* kuenda ukuonene kovilinga,+ ove una okuti, ovaso ove a lete olonjila viosi viomanu,+ oco wece komunu lomunu ndomo ci likuata lolonjila viaye kuenda eci a linga.+
20 Ove wa linga olondimbukiso lovikomo kofeka Yegito, vina via kũlĩhĩwa toke etaili kuenje wa li lingila onduko yimue ko Isareli kuenda pokati komanu,+ ndeci ci kasi etaili.
21 Kuenje ove wopa omanu vove va Isareli vofeka Yegito, lolondimbukiso, lovikomo, leka lia pama, lokuokuo kuolõha kuenda ovilinga vi lingisa usumba.+
22 “Vokuenda kuotembo, wa eca kokuavo ofeka eyi, yina wa lisilile oku eca ku vakukululu yavo+ okuti, ofeka yimue yi tumõha asenjele lowiki.+
23 Kuenje ovo va iñilamo kuenda va tambula ofeka yaco, pole, ka va pokuile kondaka yove ale oku endela vocihandeleko cove. Cosi wa va handeleka oku linga, ovo ka va ci lingile, omo liaco, wa va nenela ohali eyi yosi.+
24 Tala! Omanu va kasi oku iya lovimbaka vioku katukila oco va tambule olupale+ kuenje omo liosipata,+ lionjala kuenda liefengi,*+ olupale lu ka kupukila muẽle peka lia va Kaldea vana va kasi oku liyaka laluo; ovina viosi wa popia via tẽlisiwa ndomo o ci lete cilo.
25 Pole, ove A Ñala Tõlo Yehova, wa ndi sapuila hati: ‘Li landela epia lolombongo kuenda kovonga olombangi,’ ndaño okuti olupale lu ka eciwa muẽle peka lia va Kaldea.”
26 Kuenje ondaka ya Yehova yeya ku Yeremiya yiti:
27 “Ame ndi Yehova, Suku yomanu vosi.* Anga hẽ kuli ocina cimue ka ci tẽliwa kokuange?
28 Omo liaco, ca popia Yehova ceci hati: ‘Ñasi oku eca olupale olu ku va Kaldea kuenda peka lia Soma Nevukandesa wo ko Bavulono kuenje eye o ka lu tambula.+
29 Kuenje va Kaldea vana va kasi loku liyaka lolupale olu, va ka iñila kuenda va ka kapa ondalu volupale olu loku lu timĩha+ kumue lolonjo vina okuti, kalusoka aco, omanu va lumbilako Baale ovilumba kuenda va pesailako ovilumba vioku nyua kolosuku vikuavo oco va ndi sanumũle.’+
30 “‘Momo omanu va Isareli kuenda va Yuda va linga lika eci cĩvi kovaso ange tunde vutila wavo;+ omanu va Isareli vamamako oku ndi sanumũla lupange wovaka avo,’ oco Yehova a popia.
31 ‘Momo olupale olu, tunde keteke lua tungiwa toke etaili, lua siata oku wengula onyeño yange kuenda oku tema kuange,+ omo liaco, ndu lu nyõla kovaso ange,+
32 omo liovilinga viosi vĩvi omanu va Isareli kuenda vo ko Yuda va siata oku linga, oco va ndi sanumũle, ovo, olosoma viavo,+ olombuale viavo,+ ovitunda viavo, ovaprofeto vavo+ kuenda omanu vo ko Yuda kumue lolonungi vio Yerusalãi.
33 Ovo vamamako oku njimba olonyima viavo okuti, ovipala viavo havioko;+ ndaño okuti, nda seteka oku va longisa olonjanja vialua,* lomue pokati kavo wa yevelela oco a tambule epindiso.+
34 Kuenje ovo va kapa oviteka viavo via vĩha vonjo yi tukuiwa londuko yange, oco va yi vĩhise.+
35 Handi vali, ovo va tunga ovitumãlo via lepa via Baale Vocimbota Comõla a Hinome,*+ oco va yoke omãla vavo valume kuenda omãla vavo vakãi vondalu ndocilumba* ku Moleke+ okuti, ocina cimue sia va handelekele oku linga+ kuenda lalimue eteke ceyile vutima* wange oku linga ocina caco ca vĩha, poku kokisa Yuda oku linga ekandu.’
36 “Omo liaco, ca popia Yehova Suku ya Isareli catiamẽla kolupale olu, luna vu kasi oku popia okuti, lu ka eciwa peka lia soma yo ko Bavulono losipata, lonjala kuenda lefengi ceci hati:
37 ‘Ndi ka vongolola oku upisa kolofeka viosi nda va sanduila lonyeño yange, lekaka liange kuenda oku tema kuange kualua+ kuenje ndi ka va nena vali vocitumãlo eci loku ecelela okuti, va tunga loku kolapo.+
38 Kuenje ovo va ka linga omanu vange kuenda ame ndi ka linga Suku yavo.+
39 Kuenje ndi ka va ĩha utima umuamue+ kuenda onjila yimuamue okuti, va ndi sumbila olonjanja viosi, oco va kuate ekalo liwa kumue lomãla vavo noke liavo.+
40 Ndi ka linga lavo ocisila cimue cotembo ka yi pui,+ si ka liwekapo oku va lingila ovina viwa;+ kuenje ame ndi ka kapa esumbilo liange vovitima viavo oco okuti, ka va ndi yanduluka.+
41 Ndi ka sanjukila oku va lingila ovina viwa+ kuenda ndi ka va kokela oku amamako oku tunga vofeka eyi+ lutima wange wosi kuenda longusu yange yosi.’”
42 “Momo ca popia Yehova ceci hati: ‘Ndeci nda nenela omanu ava ohali yosi eyi yalua, haico ndi ka va nenela uwa wosi* ndi kasi oku likuminya kokuavo.+
43 Kuenje ovapia a ka landiwa vali vofeka eyi+ ndaño okuti ene vu kasi oku popia hati: “Oyo ya siala upolokoso okuti ka muli omanu ndaño ovinyama kuenda ya eciwa peka lia va Kaldea.”’
44 “‘Ovapia a ka landiwa lolombongo, ovikanda vioku landa vi ka sonehiwa kuenda vi ka kapiwa ondimbukiso kuenje olombangi vi ka kovongiwa kofeka ya Benjamini+ kovaimbo a lisungue lo Yerusalãi, valupale o Yuda,+ kovaimbo a kasi kolomunda, kalupale a kasi vemẽhi+ kuenda kalupale o kombuelo, momo ame ndi ka nena vali olomandekua viavo,’+ oco Yehova a popia.”
Atosi Pombuelo
^ Ale “velombe.”
^ Okuti, inanu konepa ya isia.
^ Osiekele yimosi yi soka 11.4 kolograma. Tala Alombo. B14.
^ Lit., “ponete yomãla.”
^ Ale “unene ndomo ci likuata locipango cove.”
^ Ale “uvei.”
^ Lit., “ositu yosi.”
^ Lit., “oku pasuka selo loku longisa.”
^ Ale “ka ca la iñila vovisimĩlo viange.”
^ Lit., “oku pitisa vondalu.”
^ Tala Elomboluilo, “Ongehena.”
^ Ale “ovina viwa.”
