Yeremiya 36:1-32
36 Kunyamo wakuãla wa Yehoyakimi+ omõla a Yosiya soma yo Yuda, Yeremiya wa tambula ondaka ya tunda ku Yehova yokuti:
2 “Tikula ociña* cimue kuenda sonehamo olondaka viosi nda ku sapuila, viatiamẽla ko Isareli lo ko Yuda+ kuenda kolofeka viosi,+ tunde keteke liatete nda vangula love koloneke via Yosiya toke etaili.+
3 Pamue eci vakuanjo ya Yuda va yeva ohali yosi ndi laika oku nena kokuavo, ovo va ka tinduka kolonjila viavo vĩvi, oco ndi ecele oku lueya kuavo lekandu liavo.”+
4 Noke Yeremiya wa vilikiya Baruke+ omõla a Neriya kuenje Yeremiya wa popia olondaka viosi Yehova o sapuilile kuenda Baruke wa vi soneha vociña.*+
5 Noke Yeremiya wa handeleka Baruke hati: “Ame nda tatekiwa kuenda si tẽla oku iñila vonjo ya Yehova.
6 Omo liaco, ove o sukila oku iñila loku tanga lolukandi olondaka via Yehova vina nda popia okuti, wa vi soneha vociña. Vi tangela kovaso yomanu, vonjo ya Yehova keteke lioku likandangiya oku lia; kuenje o ka vi tangelavo komanu vosi vo ko Yuda vana va kasi oku iya oku upisa valupale avo.
7 Pamue epingilo liavo liohenda, li ka pitĩla ku Yehova kuenda va ka tinduka omunu lomunu konjila yaye yĩvi, momo onyeño kuenda oku tema kuna Yehova a tukuila omanu ava, vialua.”
8 Omo liaco, Baruke omõla a Neriya wa linga cosi uprofeto Yeremiya o handelekele; eye wa tanga lolukandi vociña* olondaka via Yehova vonjo ya Yehova.+
9 Kunyamo watãlo wa Yehoyakimi+ omõla a Yosiya, soma yo Yuda, kosãi yecea, omanu vosi vo Yerusalãi lomanu vosi vana veya vo Yerusalãi oku upisa kalupale o Yuda, va fetika oku likandangiya oku lia kovaso a Yehova.+
10 Noke Baruke wa tanga lolukandi vociña* olondaka via Yeremiya vonjo ya Yehova, vohondo* ya Gemariya+ omõla a Siafane+ ukuavisonehua, vocitali co konano, puvelo wombundi yokaliye yonjo ya Yehova,+ kovaso yomanu vosi.
11 Eci Mikaya omõla a Gemariya omõla a Siafane a yeva olondaka viosi via Yehova oku upisa vociña,*
12 eye wa lokila konjo* ya soma, vohondo yusonehi. Olombuale viosi* omo via tumãlele okuti: Elisiama+ usonehi, Delaya omõla a Semaya, Elinatana+ omõla a Akibore,+ Gemariya omõla a Siafane, Sedekiya omõla a Hananiya kuenda olombuale viosi vikuavo.
13 Mikaya wa va sapuila olondaka viosi a yeva eci Baruke a kala oku tanga ociña* kovaso yomanu.
14 Noke olombuale viosi via tuma Yehundi omõla a Netaniya omõla a Selemiya omõla a Kusi ku Baruke oku popia hati: “Enju kuenda nena ociña cina wa tangela kovaso yomanu.” Baruke omõla a Neriya wa kuata ociña peka liaye kuenje wa enda kokuavo.
15 Ovo vo sapuila vati: “Linga ohenda tumãla kuenda ci tangela kokuetu lolukandi.” Omo liaco, Baruke wa va ci tangela.
16 Eci va yeva olondaka evi viosi, va li vanja omunu lukuavo lusumba kuenje va sapuila Baruke vati: “Tu sukila muẽle oku sapuila soma olondaka evi viosi.”
17 Kuenje ovo va pula Baruke vati: “Linga ohenda tu sapuileko. Pi wopa olondaka evi viosi? Anga hẽ eye wa ku vi sapuila?”
18 Baruke wa va tambulula hati: “Eye wa ndi sapuila olondaka evi viosi kuenje nda vi soneha lotinda vociña* cilo.”
19 Olombuale via sapuila Baruke hati: “Kuendi, li salami ove la Yeremiya kuenda ko ka eceleli okuti, omunu umue o kũlĩha apa vu kasi.”+
20 Noke ovo va iñila ku soma kocitali kuenda va soleka ociña vohondo ya Elisiama usonehi kuenje va sapuila soma ovina viosi va yeva.
21 Omo liaco, soma wa tuma Yehundi+ oco a kope ociña kuenje eye wa ka cupile vohondo ya Elisiama usonehi. Yehundi wa fetika oku ci tangela kovaso ya soma kuenda kolombuale viosi via kala ocipepi la soma.
22 Soma wa kala oku tumãla vonjo yaye vocitumãlo muna eye a siata oku kala kotembo yombambi, kosãi yecea* kuenje ondalu ya kala oku taimĩla pociyo kovaso aye.
23 Eci Yehundi a mala oku tanga ovolala atatu ale akuãla, soma wa enda oku teta onepa yaco lomoko yusonehi loku yimba vondalu ya kala oku taimĩla pociyo, toke eci ociña cosi ca puila vondalu ya kala pociyo.
24 Kuenje soma kuenda akuenje vaye vosi vana va yeva olondaka evi viosi ka va kuatele usumba; ka va tolele ovowalo avo.
25 Ndaño okuti Elinatana,+ Delaya+ kuenda Gemariya+ va livondela ku soma oco ka ka timĩhe ociña, eye ka va yevelile.
26 Handi vali, soma wa handeleka Yerahimele omõla a soma, Seraya omõla a Asiriyele kuenda Selemiya omõla a Avidigele oco va kuate Baruke usonehi kuenda Yeremiya uprofeto, pole, Yehova wa va vundisa.+
27 Kuenje noke lia soma oku timĩha ociña mua kala olondaka Baruke a sonehele vina via sapuiwa la Yeremiya, ondaka ya Yehova yeya vali ku Yeremiya+ yiti:
28 “Tikula ociña cikuavo kuenda sonehamo olondaka viosi vimuamue via kala vociña catete, cina Soma Yehoyakimi wo ko Yuda a timĩha.+
29 Kuenje ove o sukila oku popia eci catiamẽla ku Soma Yehoyakimi wo ko Yuda okuti: ‘Ca popia Yehova ceci hati: “Ove wa timĩha ociña eci kuenda wa popia hati: ‘Momo lie wa sonehelamo okuti soma yo Bavulono o keya muẽle kuenda o ka kundula ofeka yilo loku nyõlamo omanu kumue lovinyama”?’+
30 Omo liaco, ca popia Yehova catiamẽla ku Soma Yehoyakimi wo ko Yuda ceci hati: ‘Lomue pokati kovitumbulukila viaye o ka supapo oco a tumãle kocalo ca Daviti+ kuenje etimba liaye li ka kala ño ndoto vowuya kutanya kuenda vombambi kuteke.+
31 Eye kumue lovitumbulukila* viaye kuenda akuenje vaye, ndi ka va yambula omo liakulueya avo kuenda ndi ka nena kokuavo lo kolonungi vio Yerusalãi lo komanu vo ko Yuda ohali yosi nda popia yatiamẽla kokuavo,+ momo ovo ka va yevelele.’”’”+
32 Noke Yeremiya wa tikula ociña cikuavo kuenje wa ceca ku Baruke omõla a Neriya usonehi+ kuenda ndomo Yeremiya a kala oku popia, eye wa sonehamo olondaka viosi viociña* vina Soma Yehoyakimi wo ko Yuda a timĩha vondalu.+ Kuenje kua vokiyiwa olondaka vialua vikuavo via lisoka.
Atosi Pombuelo
^ Lit., “ociña celivulu.”
^ Lit., “vociña celivulu.”
^ Ale “elivulu.”
^ Ale “elivulu.”
^ Ale “vohondo yoku lilamo.”
^ Ale “elivulu.”
^ Ale “vakesongo kelombe.”
^ Ale “kelombe.”
^ Ale “elivulu.”
^ Ale “elivulu.”
^ Onepa ya sulako ya Kuvala kuenda onepa yatete ya Cembanima. Tala Alombo. B15.
^ Lit., “ombuto.”
^ Ale “elivulu.”
