Yeremiya 44:1-30
44 Ondaka yeya ku Yeremiya oco a yi sapuile va Yudea vosi va tungile vofeka Yegito,+ vana va tungile ko Migidolo,+ ko Tafanese,+ ko Nofe*+ kuenda kofeka yo Patirosi+ yeyi yokuti:
2 “Ca popia Yehova ukualohoka Suku ya Isareli ceci hati: ‘Ene wa moli ohali yosi nda nena vo Yerusalãi+ kuenda kalupale osi o Yuda kuenje etaili a siala ovingululu okuti, ka muli onungi layimue.+
3 Eci ca lingiwa omo liovina vĩvi ovo va linga oco va ndi sanumũle poku enda loku lumba ovilumba+ loku vumba olosuku vikuavo vina ovo ka va kũlĩhĩle, ci kaile ene ale vakukululu yene.+
4 Ame ndamamako oku tuma akuenje vange vosi ovaprofeto kokuene, poku va tuma olonjanja vialua* hati: “Lingi ohenda, ko ka lingi ovina evi via vĩha vina ame ndi nyãle.”+
5 Pole, ovo ka va yevele ale oku vonguila etũi liavo okuti, va tinduka koku linga ovina vĩvi, poku yuvula oku eca ovilumba kolosuku vikuavo.+
6 Omo liaco, onyeño yange kuenda oku tema kuange via wenguka kuenje nda yambula alupale o Yuda kuenda olokololo vio Yerusalãi kuenje ovio via linga ovingululu kuenda upolokoso ndeci vi kasi etaili.’+
7 “Kuenje ca popia Yehova Suku ukualohoka, Suku ya Isareli ceci hati: ‘Momo lie vu kasilili oku likokela ene muẽle ohali yalua, oco ulume wosi, ukãi, omõla kuenda oñaña va nyõliwe ko Yuda okuti, ka pa ku supili ocisupe lacimue?
8 Momo lie vu ndi sanumũila lovopange ovaka ene, poku eca ovilumba kolosuku vikuavo vofeka Yegito muna ene wa endi oku ka tunga? Ene vu ka nyõleha loku linga ocikuata cesiñalo kuenda esepu pokati kolofeka viosi vio kilu lieve.+
9 Anga hẽ wa ivaliko ovilinga vĩvi via vakukululu yene kuenda ovilinga vĩvi violosoma vio Yuda+ lovilinga vĩvi viakãi vavo,+ oku kongelamo ovilinga viene muẽle vĩvi kuenda ovilinga vĩvi viakãi vene,+ vina via lingiwa vofeka yo Yuda kuenda volokololo vio Yerusalãi?
10 Toke etaili ka va liketisile ovo muẽle,* ka va lekisile esumbilo kokuange+ ndaño oku endela vocihandeleko cange kuenda voviholo viange, vina nda kapa kovaso yene kuenda ku vakukululu yene.’+
11 “Omo liaco, ca popia Yehova ukualohoka Suku ya Isareli ceci hati: ‘Nda nõlapo oku nena ohali kokuene, oco ndi nyõle o Yuda yosi.
12 Ame ndi ka kuata ovisupe vio Yuda vina via nõlapo oku enda kofeka Yegito oco va ka kaleko kuenje vosi yavo va ka nyõleha vofeka Yegito.+ Ovo va ka kupuka losipata kuenda va ka nyõleha lonjala; oku upisa kutito toke kunene, ovo va ka fa losipata kuenda lonjala. Kuenje va ka linga esiñalo, ocikuata cimue cocinjoko, epembulo kuenda esepu.+
13 Ndi ka yambula vana va tunga vofeka Yegito ndeci nda yambula o Yerusalãi losipata, lonjala kuenda efengi.*+
14 Kuenje ocisupe co Yuda cina ca enda oco ci ka tunge vofeka Yegito, ka ci ka puluka ale oku supapo oco ci tiukile vofeka yo Yuda. Ovo va ka livela oku tiuka kuenda oku tungamo, pole, ka va ka tiuka, te lika vañamiñami va ka puluka.’”
15 Alume vosi vana va kũlĩhĩle okuti akãi vavo va eca ovilumba kolosuku vikuavo kuenda akãi vosi vana va talamako okuti, va linga ocimunga cimue cinene kumue lomanu vosi va kala vofeka Yegito,+ ko Patirosi,+ va tambulula Yeremiya vati:
16 “Ka tu ka yevelela ondaka wa tu sapuila vonduko ya Yehova.
17 Pole, tu ka tẽlisa muẽle ondaka yosi ovimẽla vietu via popia, poku eca ovilumba ku Nasoma yo Kilu* kuenda oku pesela ovilumba vioku nyua kokuaye+ ndeci etu, vakukululu yetu, olosoma vietu kuenda olombuale vietu va linga valupale o Yuda kuenda volokololo vio Yerusalãi, eci tuekutile lokulia kuenda ekalo liwa, eci ka tua muile ohali layimue.
18 Oku upisa kotembo tua liwekapo oku eca ovilumba ku Nasoma yo Kilu* loku pesila ovilumba vioku nyua kokuaye, tua sukile ovina viosi kuenje tua nyõliwa losipata kuenda lonjala.”
19 Akãi vamisako vati: “Alume vetu va tu ecelela oku eca ovilumba kuenda oku pesila ovilumba vioku nyua ku Nasoma yo Kilu,* loku pangavo olombolo vi kuete esetahãlo liosuku yukãi.”
20 Noke Yeremiya wa sapuila omanu vosi, alume lakãi vavo kuenda omanu vosi va kala oku vangula laye hati:
21 “Ovilumba vina ene, vakukululu yene, olosoma viene, olombuale viene kuenda omanu vo vofeka va linga valupale o Yuda lo volokololo vio Yerusalãi,+ Yehova wa vi ivaluka kuenda eye ka vi ivalele!*
22 Oku sulako Yehova ka pandikisile vali lovilinga viene vĩvi kuenda ovina via vĩha ene wa lingaingi kuenje ofeka yene ya linga ocitumãlo cupolokoso, ocikuata coku yokokisa kuenda cesiñalo okuti, ka muli onungi layimue ndeci ci kasi etaili.+
23 Omo okuti wa eci ovilumba evi kuenda wa lingili ekandu Yehova poku yuvula oku pokola kondaka ya Yehova loku kuama ocihandeleko caye, oviholo viaye kuenda olonjivaluiso viaye, ohali eyi yeya kokuene, ndeci ci kasi etaili.”+
24 Yeremiya wamamako oku sapuila komanu vosi kuenda kakãi vosi hati: “Yeveleli ondaka ya Yehova ene vosi vo ko Yuda, vu kasi vofeka Yegito.
25 Ca popia Yehova ukualohoka Suku ya Isareli ceci hati: ‘Eci ene kumue lakãi vene wa vanguli lovimẽla viene, wa ci tẽlisi lovaka ene, momo wa popi okuti: “Tu tẽlisa muẽle olohuminyo vietu poku eca ovilumba ku Nasoma yo Kilu* kuenda oku pesila ovilumba vioku nyua kokuaye.”+ Ene akãi, vu ka tẽlisa muẽle olohuminyo viene kuenda oku vi linga.’
26 “Omo liaco, yeveleli ondaka ya Yehova ene vosi vo Yuda wa tungi vofeka Yegito yokuti: ‘“Ndi lisila vonduko yange muẽle yinene,” oco Yehova a popia “okuti, onduko yange ka yi ka tukuiwa vali lomunu umue wo ko Yuda+ vofeka yosi Yegito poku popia hati: ‘Ndeci Ñala Tõlo Yehova a kasi lomuenyo!’+
27 Kaliye ndi yongola oku nena kokuavo ohali okuti, ocina cimue ciwa hacoko;+ omanu vosi vo ko Yuda va kasi vofeka Yegito, va ka nyõliwa losipata kuenda lonjala, toke eci ka va kalako vali.+
28 Vañami ñami lika va ka puluka kosipata kuenje va ka tiukila vofeka yo Yuda oku tunda vofeka Yegito.+ Noke ocisupe cosi co ko Yuda cina ceya kofeka Yegito oco ci tungeko, ci ka kũlĩha nda ondaka yelie ya linga yocili, nda yange ale yavo!”’”
29 “‘Kuenje eyi oyo ondimbukiso kokuene,’ oco Yehova a popia, ‘yokuti, ame ndi ka vu yambuli vocitumãlo eci oco vu kũlĩhi okuti, olondaka viange viohuminyo vioku vu neneli ohali, vi ka tẽlisiwa muẽle.
30 Ca popia Yehova ceci hati: “Ñasi oku eca Fareo Hofara, soma yo Egito, peka liovanyãli vaye kuenda peka lia vana va kasi oku sandiliya oku u ponda, ndeci nda eca Soma Sedekiya wo ko Yuda peka lia Soma Nevukandesa wo ko Bavulono, una wa kala unyãli waye haeye wa sandiliya oku u ponda.”’”+
Atosi Pombuelo
^ Ale “Mefise.”
^ Lit., “oku pasuka selo kuenda oku tuma.”
^ Ale “ka va likekembelele.”
^ Ale “uvei.”
^ Onduko yosuku yimue yukãi ya fendeliwa la va Isareli olonanguluke; pamue osuku yukãi yuyali.
^ Onduko yosuku yimue yukãi ya fendeliwa la va Isareli olonanguluke; pamue osuku yukãi yuyali.
^ Onduko yosuku yimue yukãi ya fendeliwa la va Isareli olonanguluke; pamue osuku yukãi yuyali.
^ Lit., “vieya vutima waye.”
^ Onduko yosuku yimue yukãi ya fendeliwa la va Isareli olonanguluke; pamue osuku yukãi yuyali.
