Yeremiya 7:1-34
7 Ondaka ya Yehova yina yeya ku Yeremiya yeyi yokuti:
2 “Talama pombundi yonjo ya Yehova kuenda sandekapo esapulo liokuti: ‘Yeveleli ondaka ya Yehova amanu vosi vo ko Yuda ene wiñilili polombundi evi oco vu kekamẽli Yehova.
3 Ca popia Yehova ukualohoka, Suku ya Isareli ceci hati: “Pongololi olonjila viene kuenda ovilinga viene kuenje ndi ka ecelela okuti, ene vu amamako oku kala vocitumãlo cilo.+
4 Ko ka koleli kolondaka viuhembi loku popia hoti: ‘Eyi oyo* onembele ya Yehova, onembele ya Yehova, onembele ya Yehova!’+
5 Momo nda wa pongololi olonjila viene lovilinga viene; nda vu teyuila esunga li kasi pokati komunu lu a lisungue laye;+
6 nda ka vu talisa ohali ovingendeleyi, olosiwe,* lovimbumba;+ kuenda nda ka vu pesela osonde yomanu ka va kuete eko kocitumãlo cilo; nda ka vu kuama olosuku vikuavo oco vi ku nyõli;+
7 ndi ka ecelela okuti, ene wamamiko oku kala vocitumãlo eci, vofeka nda eca ku vakukululu yene otembo yosi.”’”*
8 “Ene vu kasi oku kolela kolondaka viene viuhembi,+ poku kolela kolondaka viaco, ka vi vu kuatisi.
9 Anga hẽ ene vu pondola oku nyana,+ oku ponda, oku linga ukahokolo, oku lisinga luhembi,+ oku eca ovilumba* ku Baale+ kuenda oku kuama olosuku vikuavo vina ka wa kũlĩhĩli,
10 noke wiyi loku talama kovaso yange vonjo yilo yi tukuiwa londuko yange loku popia hati: ‘Tu ka popeliwa,’ ndaño wa lingi ovina evi viosi viumbondo?
11 Anga hẽ onjo eyi yi tukuiwa londuko yange, ya linga ocilala covimunu kovaso ene?+ Kũlĩhi okuti ame muẽle ndi ci lete,” oco Yehova a popia.
12 “‘Omo liaco, cilo kuendi kocitumãlo cange ci kala ko Silo,+ kuna kua kala tete onduko yange+ kuenda limbuki eci nda linga kokuayo omo lievĩho liomanu vange va Isareli.+
13 Pole, ene wamamiko oku linga ovina evi viosi,’ oco Yehova a popia, ‘kuenda ndaño okuti nda vangula lene olonjanja vialua,* ka wa yeveli.+ Ndamamako oku vu vilikiyi, pole, ene ka wa tambuluili.+
14 Omo liaco, ndi ka linga lonjo yi tukuiwa londuko yange,+ yina ene wa koleli+ lo kocitumãlo eci nda eca kokuene kuenda vakukululu yene, ndeci nda linga lo Silo.+
15 Ndi ka vu tundisi kovaso yange ndeci nda tundisa vamanjene vosi okuti, ocitumbulukila cosi ca Efarimi.’+
16 “Catiamẽla kokuove, ku ka likutilileko omanu ava. Ku ka va lilileko, pamue oku va lombelako ndaño oku va pingilako kokuange,+ momo si ka ku yeva.+
17 Ove hẽ ku lete eci ovo va kasi oku linga valupale o Yuda kuenda volokololo vio Yerusalãi?
18 Omãla va kasi oku tiaña olohũi, va isia va siakãla ondalu kuenda akãi va tama osema oco va linge akende oku lumba ku Nasoma yo Kilu*+ kuenda ovo va pesela ovilumba vioku nyua kolosuku vikuavo, oco va ndi sanumũle.+
19 ‘Anga hẽ ame va kasi oku ndi sumuisa?’* oco Yehova a popia. ‘Siti ovo muẽle, oco va kutisiwe osõi?’+
20 Omo liaco, ca popia Ñala Tõlo Yehova ceci hati: ‘Tali! Onyeño yange yalua kuenda oku tema kuange, vi ka wengukila kocitumãlo eci,+ komanu, kovinyama, koviti viovusenge kuenda kapako ovapia; oyo yi ka taima kuenda ka yi ka imiwa.’+
21 “Ca popia Yehova ukualohoka, Suku ya Isareli ceci hati: ‘Kuendi kovaso kuenda kongeli ovilumba viene vioku pia elisi kumue lovilumba vikuavo kuenje li ene muẽle ositu.+
22 Momo keteke ndopa vakukululu yene vofeka Yegito, ame sia va sapuilile ndaño oku va handeleka cimue catiamẽla kovilumba vioku pia elisi kuenda ovilumba vikuavo.+
23 Pole, nda ecele kokuavo ocihandeleko eci: “Pokoli kondaka yange kuenje ame ndi ka linga Suku yene kuenda ene vu ka kala omanu vange.+ Olonjanja viosi endeli vonjila ndi vu handeleki, oco ovina viosi vi ende ciwa kokuene.”’+
24 Pole, ovo ka va yevele ndaño oku vonguila ovatũi avo;+ ovo va nõlapo oku endela volonjila* viavo, poku tamalãla oku kuama utima wavo wa vĩha+ kuenda ovo va njimba onyima kuenda ka va tiukile kokuange,
25 tunde keteke eci vakukululu yene va tunda kofeka Yegito toke etaili.+ Omo liaco, ndamamako oku tuma akuenje vange vosi ovaprofeto kokuene, nda enda oku va tuma eteke leteke, olonjanja viosi.*+
26 Pole, ovo va likala oku ndi yevelela, ovo ka va yevelele lutate.+ Handi vali, ovo va siva* kuenda ovilinga viavo vĩvi via piãlelepo vali okuti, via vakukululu yavo vi sule!
27 “Ove o ka va sapuila olondaka evi viosi,+ pole, ovo ka va ka ku yeva; o ka va vilikiya, pole, ka va ka ku tambulula.
28 Kuenje ove o ka va sapuila hati: ‘Eyi ofeka yina ka ya pokuile ku Yehova Suku yavo kuenda ya likala oku tava kepindiso. Ocili ca imũha kuenda ka ci tukuiwa vali pokati kavo.’*+
29 “Li pemũla esenya kuenda esinga liaco linasi kuenje imba ocisungo cimue celisiõsuĩlo* koviwulu ka kuli ovikũla, momo Yehova wa likala kuenda o ka yanduluka ocitumbulukila eci co temisa.
30 ‘Momo omanu vo ko Yuda va siata oku linga eci cĩvi kovaso ange,’ oco Yehova a popia. ‘Ovo va kapa oviteka viavo via vĩha vonjo yi tukuiwa londuko yange oco va yi vĩhise.+
31 Ovo va tunga ovitumãlo via lepa ko Tofete, yina yi kasi Vocimbota Comõla a Hinome,*+ oco va timĩhe omãla vavo valume kuenda omãla vavo vakãi vondalu,+ ocina cimue sia handelekele kuenda lalimue eteke ceyile vutima wange.’*+
32 “‘Omo liaco, tala! oloneke vi kasi oku iya,’ oco Yehova a popia, ‘eci ocitumãlo cilo ka ci ka tukuiwa vali okuti, Tofete ale Ocimbota Comõla a Hinome,* pole, ci tukuiwa hati, Ocimbota Coku Ponda. Ovo va ka kenda ko Tofete toke eci ka ku supi vali ocitumãlo.+
33 Kuenje ovivimbi viomanu ava vi ka linga okulia kuolonjila viovailu lo kovinyama vio kilu lieve kuenda lomue o ka vi lingisa usumba.+
34 Ndi ka kapa esulilo kocileñi conjolela kuenda kocileñi cesanju, kondaka ya sandombua kuenda kondaka ya ndombua+ valupale o Yuda kuenda volokololo vio Yerusalãi, momo ofeka yi ka siwa ovingululu.’”+
Atosi Pombuelo
^ Lit., “Ovio,” vi tiamisiwila kolosapalalo viosi vionembele via tungiwa.
^ Ale “omãla ka va kuete isia.”
^ Ale “tunde ka ku ci toke ka ku ci.”
^ Ale “oku tuimisa owisi wocilumba.”
^ Lit., “oku pasuka selo loku vangula.”
^ Onduko yosuku yimue yukãi ya fendeliwa la va Isareli olonanguluke; pamue osuku yukãi yuyali.
^ Ale “oku ndi sanumũla.”
^ Ale “velungulo.”
^ Lit., “eteke leteke oku pasuka selo loku tuma.”
^ Lit., “ovo va tĩlisa osingo yavo.”
^ Lit., “ca tetiwa komẽla wavo.”
^ Ale “ocisungo cesumuo.”
^ Tala Elomboluilo, “Ongehena.”
^ Ale “ka ca la kala vovisimĩlo viange.”
^ Tala Elomboluilo, “Ongehena.”
