Yovi 19:1-29
19 Yovi wa tambulula hati:
2 “Toke otembo yipi vu kamamako oku ndi lingisa onyeño,+Loku popia ovina vi lemẽha utima wange?+
3 Wa ndi lemẽli ale olonjanja ekũi;Ene ka vu kuete osõi yoku ndi tata lãvi.+
4 Nda nda lueya muẽle,Oku lueya kuange ku kale lame.
5 Nda vu amamako oku li lekisa okuti, wa mbelipo,Loku popia okuti, nda sesamẽlele esepu liaco,
6 Kũlĩhi okuti Suku eye wa ndi kemba,Kuenda wa ndi kuata lonjanjo yaye.
7 Tala! Ndi amamako oku kaluka siti: ‘Ungangala!’ pole, lomue wa nambulula;+Ndi amamako oku kaluka oku pinga ekuatiso, pole, ka kuli esunga.+
8 Eye o sitika onjila yange locimbaka cimue covawe kuenda si tẽla oku pita;Wa sikĩlĩla olonjila viange lowelema.+
9 Eye wa ndi lulisa ulamba wange,Kuenda wa njupa ekolowa kutue wange.
10 Eye o ndi teya teya kolonele viosi toke eci ndi nyõleha;O tukũla elavoko liange nduti umue.
11 Onyeño yaye ya ndi katukila,Kuenda o ndi tenda ndunyãli waye.+
12 Asualali vaye veyilila kumosi kuenda va ndi ñuala ocingonja,Kuenje va tunga ovilombo viavo kolonele viombalaka yange.
13 Eye wa kapa vamanjange ocipãla lame,Kuenda vana va ndi kũlĩha va ndi yanduluka.+
14 Akamba* vange va enda,Kuenda vana nda kũlĩhĩle ciwa va njivala.+
15 Akombe vonjo yange+ kuenda apika vange vafeko va ndi tenda ndomunu ka kũlĩhĩwile;Ame nda linga ocingendeleyi kovaso yavo.
16 Nda vilikiya ukuenje wange, pole, eye ka tambulula;Lomẽla wange ndu pinga ohenda.
17 Efuimo liange li lingisa onyanya kukãi wange,+Kuenda ndilemba lĩvi ku vamanjange.
18 Ndaño muẽle omãla, va ndi pembula;Eci ndi katuka, ovo va fetika oku ndi yola epembe.
19 Akamba vange vosi va ndi suvuka,+Kuenda vana nda solele, va ndi katukila.+
20 Akepa ange a kakatela kekova liange kuenda kositu yange,+Kuenje nda sia pulukile kolofa.*
21 Ndekisi ohenda ene akamba vange, ndekisi ohenda,Momo eka lia Suku lia ndi lamba.+
22 Momo lie vu amamelako oku ndi katukila ndeci Suku a linga,+Loku ndi lambalala otembo yosi?*+
23 Olondaka viange nda via sonehiwile ño, nda hĩse,Nda via sonehiwile ño velivulu limue, nda hĩse!
24 Nda ovio via sokotuiwile otembo ka yi pui vesenje,Lopena yutale kuenda osumbu, nda hĩse!
25 Momo nda kũlĩha ciwa okuti, upopeli* wange+ o kasi lomuenyo;Noke eye o keya kuenda o ka talama kilu lieve.
26 Noke liekova liange oku nyõliwa,Osimbu ñasi lomuenyo ndi ka mola Suku,
27 Ame ndi ko mola muẽle,Una ovaso ange muẽle a ka mola okuti, ovaso omunu ukuavo hacoko.+
Pole, vokati kange nda pekengua!
28 Ene vu pula vati: ‘Lonjila yipi tu kasi oku u lambalala?’+
Momo va sima okuti ono yovitangi ame.
29 Ene vu sukila oku kuata usumba wosipata,+Momo osipata yi nena ekangiso kukuakulueya;Ene nda wa kũlĩhĩli okuti, kuli onganji yimue.”+
Atosi Pombuelo
^ Ale “Vangandiange.”
^ Lit., “Nda puluka lekova liovayo ange.”
^ Lit., “Kuenda ka vu tẽla lositu yange?”
^ Ale “ukuakuyovola.”
