Yovi 29:1-25
29 Yovi wamamako lombangulo* yaye poku popia hati:
2 “Hĩse nda nda tiukilile kolosãi via pita,Koloneke Suku a enda oku ndi teyuila,
3 Eci eye a enda oku ecelela okuti, ondiyelo yaye yi tuila kilu liutue wange,Eci nda enda oku endela vowelema omo liocinyi caye,+
4 Eci nda kala umalẽhe kuenda nda pamele,*Eci ukamba wa Suku wa enda oku sumũlũisa onjo yange,+
5 Eci Ukuonene Wosi handi a kala lame,Eci omãla* vange vosi va ndi ñualele,
6 Eci olomãhi viange via enda oku sukuiwa vongundi,Kuenda asenje a enda oku pesela olondui viulela kokuange.+
7 Eci nda endaile pombundi yolupale+Kuenda oku tumãla komangu yange volokololo,+
8 Amalẽhe poku ndi mola, va enda oku amela* konyima omo liesumbilo kokuange,Kuenda ndaño muẽle akongo va enda oku votoka loku talama vilu.+
9 Olombuale via enda oku yuvula oku vangula;Via enda oku sitika omẽla lovaka avo.
10 Olondaka vialume va kemãla, viohĩsiwa;Alimi avo a lamẽlela vuliakusu wavo.
11 Wosi wa enda oku njeva, wa enda oku vangula ovina viwa viatiamẽla kokuange,Kuenda wosi wa enda oku ndi mola, wa ponduile oku njimbila uvangi.
12 Momo nda enda oku popela ohukũi ya enda oku kaluka oku pinga ekuatiso,+Lomõla ka kuete isia kuenda wosi una ka kuatele umue u kuatisa.+
13 Wosi o panda koku fa wa enda oku ndi sumũlũisa,+Kuenda nda enda oku sanjuisa utima wocimbumba.+
14 Nda enda oku wala esunga nduwalo;Esunguluko liange lia kala ndocikutu* kuenda ekofue.
15 Ame nda kala ovaso kolomekeKuenda olomãhi kovilema.
16 Ame nda kala isia umue kohukũi;+Nda enda oku kuatisa omanu vana sia kũlĩhĩle oku sanga esunga.+
17 Nda enda oku teya olombanjo viondingaĩvi+Kuenda oku tukũla vovayo aye ocinyama ca kuatiwa.
18 Nda enda oku popia hati: ‘Ndi ka fila vonjo yange muẽle,*+Kuenda oloneke viange vi ka lua ndeseke.
19 Olombombo viange vi ka lisanduila toke vovava,Kuenda owume wange u ka pita uteke wosi kovianja viange.
20 Ulamba wange lalimue eteke u takata,Kuenda peka liange ohonji yi kamamako oku hasa.’
21 Omanu va enda oku ndi yevelela lutate,Loku kevelela elungulo liange loku ũha.+
22 Eci nda enda oku mala oku vangula, ka va kuataile vali lacimue coku vangula;Olondaka viange via enda oku sanjuisa* ovatũi avo.
23 Va enda oku ndi kevelela ndeci ci keveliwa ombela;Va enda oku yikula ciwa omẽla wavo ndu okuti, va nyua ombela yomandavela.*+
24 Eci nda enda oku yola kovaso avo, ovo ka va endaele oku tava;Ocinyi cupolo wange ca enda oku va kavuluisa.*
25 Nda enda oku eca kokuavo onumbi ndusongui wavo,Kuenda nda kala ndosoma pokati kasualali vavo,+Nda una o lembeleka vana va lila.+
Atosi Pombuelo
^ Lit., “olusapo.”
^ Lit., “koloneke vio.”
^ Ale “oloñuatisi.”
^ Lit., “va enda oku salama.”
^ Ale “esanya ka li kuete ovoko.”
^ Lit., “vocanju cange.”
^ Lit., “oku nõsa.”
^ Ale “ombela yatete.”
^ Ale pamue, “Ovo ka va endaele oku tekãvisa ocinyi cupolo wange.”
