Yovi 40:1-24
40 Yehova wamamako oku tambulula Yovi hati:
2 “Ukuakuvetela evelo o pondola hẽ oku liyaka Lukuonene Wosi?+
Una o yongola oku pisa Suku, a tambulule.”+
3 Yovi wa tambulula Yehova hati:
4 “Tala! Ame si silivila.+
Nye ndu ku tambulula?
Ñapa eka liange komẽla wange.+
5 Nda vangula onjanja yimosi, pole, si tambulula vali;Olonjanja vivali, pole, si vangula vali.”
6 Kuenje Yehova wa tambulula Yovi pocakati cehunguhungu liofela hati:+
7 “Itika pimo ndulume wa pama;Ame ndi ka ku pula kuenda o ka ndi tambulula.+
8 Ove hẽ o ka patãla esunga liange?
O ka ndi pisa hẽ oco ove o kuate esunga?+
9 Ove hẽ o kuete okuokuo kua pama calua ndoku kua Suku yocili,+Ale ondaka yove yi tẽla oku lemĩla ndeyi yaye?+
10 Mange ohenda, li posuisa ove muẽle lulamba kuenda lekemãlo;Wala uwale kuenda eposo.
11 Imbapo onyeño yosi o kuete;Vanja komunu wosi ukuakulivelisapo kuenda u kutisa osõi.
12 Vanja komunu wosi ukuakulivelisapo kuenda u kutisa osõi,Kuenda liatela olondingaĩvi oku vi kasi.
13 Vosi yavo o va lembikila voneketela;Va kutila* vocitumãlo cowelema,
14 Ndaño muẽle ame, ndi ka tava kokuove*Okuti eka liove liondio li pondola oku ku yovola.
15 Tala Ongeve yina nda panga, ndeci nda ku panga.
Oyo yi lia lia owangu ndongombe.
16 Tala ongusu yi kasi vombunda yayo,Kuenda unene u kasi volonumba vietimba liayo!
17 Ucĩla wayo wa kõla ndosedru;Asipa ovikalo viayo a kasi ndu okuti, a vindiwa.
18 Akepa ayo a kasi ndu a pangiwa losipi;Ovolu ayo a kasi ndolongunji viutale.
19 Oyo yi kasi pocitumãlo catete kovopange a Suku;Lomue o tẽla oku yi ponda losipata te lika Una wa yi panga.
20 Momo okulia kuayo ku tunda kolomunda,Kuna ovinyama viosi viovusenge vi papalela.
21 Oyo yi pekela vemẽhi liovisapa vi kuete olosongo,Vociteyuilo colondeya vonata.
22 Ovisapa vi kuete olosongo, vi yi sikĩlĩla lulembo walio,Kuenda avunge ocimbota* a yi ñuala.
23 Nda olui lueyuka calua oyo ka yi sakalala.
Oyo ya kolela, ndaño o Yordão+ yi samohaila komẽla wayo.
24 Anga hẽ omunu umue o tẽla oku yi kuata osimbu oyo yi vanja,Ale oku tombola enyulu liayo lonjolo?*
