Yovi 41:1-34
-
Suku o lombolola eci catiamẽla ko Canjangombe ci komõhisa (1-34)
41 “Anga hẽ o pondola oku kuata Canjangombe*+ lonjolo,Ale oku kuta elimi liayo lukolo umue?
2 Ove hẽ o pondola oku kapa ukolo* umue vanyulu ayo,Ale oku tombola olombanjo viayo lonjolo?*
3 Anga hẽ oyo yi ka pinga ohenda kokuove,Anga yi ka vangula love lohenda?
4 Anga hẽ oyo yi ka linga ocisila cimue love,Oco ove o yi lingise upika wove otembo ka yi pui?
5 Anga hẽ ove o ka papala layo ndu okuti onjila yimue,Ale o ka yi kuta oco o yece komãla vove vafeko okuti, va papala layo?
6 Anga hẽ vakualomĩlu va ka likunda ondando yayo?
Anga hẽ vakualomĩlu va ka yi litepela?
7 Anga hẽ ove o ka tombola etimba liayo lovisongo viosevo,+Kuenda utue wayo lolonjelia vioku pipa?
8 Kapa okuokuo kuove kokuayo;Ove o ka ivaluka uyaki kuenda lalimue eteke o ka ci linga vali!
9 Elavoko liosi lioku yi viala, ka li kuete esilivilo.
Eci o yi mola ku kuata vali ongusu.*
10 Lomue o seteka oku yi sanumũla.
Omo liaco, helie o pondola oku tamãlala lame?+
11 Helie okuti, tete wa nyĩhile ocina cimue kuenje ndi sukila oku ci tiuwiya?+
Cosi ci kasi vemẽhi liovailu cange.+
12 Si ka liwekapo oku vangula catiamẽla kovimatamata viayo,Catiamẽla kunene wayo kuenda ketimba liayo ndomo ya pangiwa lonjila yimue yi komõhisa.
13 Helie wa lulisa ale uwalo wayo?
Helie o pondola oku amela ocipepi lomẽla wayo?
14 Helie o tẽla oku yulula apito omẽla* wayo?
Ovayo ayo a koka usumba.
15 Koñoño yayo kuli ovilala viakaka,*Akaka aco a likuata ciwa.
16 Ekaka lekaka li litokeka pamosi,Okuti, ndaño muẽle ofela ka yi piti pokati kavio.
17 Ovio via likakatela kumosi;Via likuatelela pamosi kuenda ka citava oku vi tepa.
18 Volohesi viayo mu tunda ociliakulo cocinyi,Kuenda ovaso ayo a kasi ndoku nina kuomẽle.
19 Vomẽla wayo mu tunda oviliakulo viocinyi;Kuenda olosãse viondalu.
20 Vanyulu ayo mu tunda owisi,Ndofolono yimue yi kuete ondalu.
21 Efuimo liayo li pepelela akala ondalu,Kuenda vomẽla wayo mu tunda ulienge.
22 Osingo yayo yi kuete ongusu yalua,Kuenda wosi o lisanga layo o kuata usumba walua.
23 Oku likonya kuetimba liayo kua litokeka ciwa;Okuo ku kasi ndutale okuti, ka ku sengiwa.
24 Utima wayo wa kõla ngõ ndewe,Ocili, wa kõla ngõ ndewe litito liombambo.
25 Eci oyo yi votoka, ndaño omunu wa pama o luluma;Oku lisenga senga kuayo ku koka esakalalo.
26 Layimue osipata yu lamba okuti, yi ka yula;Ndaño onjelia, ale unga, pamue ohonji.+
27 Kokuayo utale u kasi ndowangu wa kukuta,Osipi yi kasi ndevaya lia vola.
28 Ohonji ka yu kokela oku tila;Kokuayo ovawe a imbiwa lepipili a kasi ndovinene.
29 Ombueti yimue kokuayo yi kasi ndovinene,Kuenda oyo yi yola onjuela yunga.
30 Imo liayo li kasi ndovimuanyuĩla via songoloka viombia yotuma ya tetuka;Oyo yi pita vonata ndomakina yoku sasa.+
31 Oyo yi kokela ovava a longa oku feluka ndombia;Oyo yi feluluisa okalunga ndombia yonguendu.
32 Oyo yi kokela okuti, ovava a kasi konyima yayo a tunda efelefele osimbu oyo yi liteva,Omunu umue o pondola oku sima okuti, ovava a longa a kuete esinga li yela.
33 Kilu lieve ka kuli lacimue ca lisoka layo,Suku wa yi panga oco ka yi ka kuate usumba.
34 Oyo yi talama kovaso yovinyama viosi vi kuete epela.
Oyo soma yovinyama viosi vinene viovusenge.”
Atosi Pombuelo
^ Citava okuti, ongandu.
^ Lit., “olundeya lumue.”
^ Lit., “osongo.”
^ Ale “ove nda wa kunduiwa.”
^ Lit., “ocipala.”
^ Ale pamue, “Ovilala viakaka ovio epela liayo.”
